Esusën Uan ismiaid 3

Saddes yacnocquido Esusën chiaid

1Naden padpiden chuiuaposhi: Saddes yacnoshon ubi chuibanquidën iste chuinu. Dada uata. Nuquin Papan mayan 7tedbëta uispa 7tedbidi sananquin ismebuedën naden chioshibique. Tantia, Saddes yacnocquido. Mibitedi chuinu: Mimbi naidtedi tantiembi. Uënësacbimbuen mimbi ubi bëdambuen tantienquio iquec. Matsesën: Bëdambuen tantiaquidquio nec, mibi canubi umbien padenquio iquec. 2Isucunshun tantiacbimbuen ubi padpiden tantiabenuata. Uënësacbimbuen mimbi ubi tantienquio icquin icsambuen nasho isombique. Nuquin Papan chiacpadquiec bëdambuec tabadnuna, cananta. 3Mimbi umbi naid chuibansho tantiabenondacpadombuen ubi padpiden tantiabenuata. Bëshunenda. Nëbi mibi icsaid ënshun umbi chiacpadombuen nauata. Isucunenquio yacbimbuen ubi padpiden tantienquio icshoembi mibi cuidendac. Ampequid choec, quequin tantienquio yacbimbuen tantienquio icsho mibi cuidtsiambique. Ubi tantiaquiota.

4Mibi yacno matses daëdpactsëc aton dashcute bëchish ucacbimbuen ambi icsambuen naid ënash icsainquio yec bëdambuec tabadquid iquec. Adquido icsho issun ubëdi tabadmequin dashcute ushumbocquid dasiuinquin icsaisa icmendambi. 5Mayan Icsa Satanasën: Icsamenu, caqui chieshtoenquio icquin ubi ënenquio icquin tantiaquid icsho ubëdi tabadmequin dashcute ushumbocquid dasiuinquin icsaisa icmendambi. Adoshon aidon cuëmëdquid cuëmëdquidquien dadauate dapan aidon cuëmëdquid uquenquio iquendambi. Adoshon: Nëido ubi tantiaquidotedi neque. Nuquibëd tabadmenuna, Papa, quequin chiendambi Nuquin Papabëd icquidon tantianuc. 6Nëbi ubi tantiaquido utsibotsen chuinu. Umbi chuibocpadombuen cun Mayanën mibitsen tantiametsiashe. Bëdambuen tantiate bunquin umbi chuibued tantiata, quequin Esusën chuiposhi.

Pidadedpia yacnocquido Esusën chiaid

7Padpiden naden chuiuaposhi: Pidadedpia yacnoshon ubi chuibanquidën iste chuinu. Dada uata. Tantia, Pidadedpia yacnocquido. Icsaisambo yec abimbo chuiquidquio icquin Nuquin Papan Chomiaidën naden chuiposhi: Cun tsusedpa Dabid yampicpadquid matses namequidquio yec aid abentsëqui Nuquin Papa yacno puduedmianquid Mesias nec, utsibon: Padi, catiapimbo icnuc. Umbi shëcniaid utsin shëcnandotiapimbo iquec. Adembidi umbi shëcnandoaid utsin shëcnetiapimbo iquec.#3.7 Adembidi Nuquin Papan naid matsesën utsi uatiapimbo yampid Obon chuipampic. Aid iste bunquin Obo 12.14 ista. 8Mimbi naidtedi tantiembique. Tantia. Chuinu. Mibi yacno umbi shëcuë shëcniaid utsibon shëcnandotiapimbo iquec. Adquid icnuc: Tantiatiapimbo iquebi, quenquio mibi iccoc. Adec chieshtoenquio icquin ubi tantiasho umbi mibi uidënquio icmiac umbi naid mimbi chuibanendac utsibon ënmetiapimbo icnuc. Mibi yacno ubi tantiaquido daëdpactsëc icnubi ubi mimbi tantiaquioc. 9Tantia. Mibi yacnoshon Mayan Icsa Satanasën tantiamiac: Isadaidbo nebi, quequin mibi mua uaquido yec Mayan Icsa Satanasën iuabo nendac. Umbimbo namiac mibi yacno chochosho mimbi chuibanendac. Adoac dannëshën tinquebudshun mibi chuiquin: Esusën tantiaidombo mibi nec, caindac.#3.9 Isadaidbon utsibo bëdambuen iste chiaid istiadquio icquin Isa. 49.23 ista. 10Umbi chiacpaden utsi uainquio icquin ubi tantiasho issun mibi cudasquin dayun uaindambi. Mayan Icsa Satanasën: Mibi icsamenu, quequin: Tannu, queshun natiamboshë icmendac. Adoshobi mibi cudasquin dayun uaindambi. Adembidi nidaid utsi utsiec yacno tabadquido abitedi natiamendac.

11Tantia, nëbimbobi choendabi. Mimbi bëdambuen nabocpadombuen chieshtoenquio icquin ubi tantiata. Utsibon chieshënaqui mibi icbocpadquiec chieshtoenquio yec bëdambuec tabadta. Adquid icsho cuidenquio icquin utsibon mënchictiapimbo icnuc mibi bëdamboshëcquid menequin ubëdi tabadmendambi. 12Mayan Icsa Satanasën: Icsamenu, caqui chieshtoenquio icquin ubi tantiasho ubëdi tabadmendambi. Aden chieshtoenquio icquin ubi tantiaquido utsibo abitedi Nuquin Papa tabadte shubu dapa yacno iuedendambi. Buintad nitsinaid chiquidtiapimbo yacbimbuecnuc cun shubun icquido mibi icmendambi auëshquio cuentiapimbo icnuc. Adoshon mibitedi: Cuna nec, quequin Nuquin Papan cuëmëdquid min dadan dada uaindambi. Adembidi Nuquin Papa yacnouësh abucuësh budtequid shubu dadpen icquid Edusaden chuca caid yacno tabadtequidombo nec, quequin min dadan aid cuëmëdquid dada uaindambi. Ubi cuëmëdquid chuca adembidi min dadan dada uaindambi. 13Tantia. Nëbi ubi tantiaquido utsibotsen chuinu. Umbi chuibocpadombuen cun Mayanën mibitsen tantiametsiashe. Bëdambuen tantiate bunquin umbi chuibued tantiata, quequin Esusën chuiposhi.

Daudisea yacnocquido Esusën chiaid

14Naden padpiden chuiuaposhi: Daudisea yacnoshon ubi chuibanquidën iste chuinu. Dada uata. Tantia, Daudisea yacnocquido. Ubien Esusquio yec icsaisambo yec abitedishun naid tantiaquidquio nec. Adquid icquin Nuquin Papan bëdambuen iste tantiamequidquio yec abimbo chuiquidquio nebi. Nidaidbëta abitedi uaquid yec abitedishun Icbombo icquin mibitedi chuinu. 15Mimbi naidtedi tantiembi. Chieshtoenquio icquin ubi tantiatiadquidi mibi nec. Ubi caic: Mibi tantiaquid nebi, quiondaidëmbi mimbi naiduidi dadpen naquin mimbi ubi bëdiactsëc tantiatsec. Dayacquiocquin ubi tantiapashun, mibi caimbi. 16Umbi adoaqui ubi tantienquiocsho issun icsambo nuadquid shëdshun ucbudacbimbuen Nuquin Papa yacno ubëdi tabadmenquio icquin mibi cuenmendambi. 17Nuquin Papan Chiaid niac niaquec icsambocquid nechitebi, quetiadquidi: Cuna dadpen bedshun umbi dayun uaid icnuc utsi bunenquio yec bëdambo iquebi, mibi quepoc. Adsho umbi isac piucquid nibëdnuc dashcute dasiuidenquiocquid yacbimbuec icsambo mibi iquec. Esus tantienquio yec Nuquin Papabëd tabadtiapimbo icchitebi, quetiadquidi mibi adenquio iccoc. Bëchish ucambo yacbimbuen mimbi icsambuen naid ënenquio icsho mibi bëdambuen istiapimbo iquebi. Pacuënnëdacbimbuen ubi tantienquio icquido yec mibi dashcute dasiuidenquio yacbimbuec iquec. 18Adquid icsho mibi chuinu. Tantia: Ubi tantiaquid icnuen bëchish nibëdquiocnoc cute nëdënquequidën dapichicac bëdamboshëcquid icsho cun shocosh piu piupactsëcquid odo caid bedta. Adosho mibi mitsana dadpenquiocquid icmendambi. Ubi tantiaquid icquin dashcute nibëdquio icbuedi bëchish nibëdquiocquid cun dashcute ushumboshë icquid dasiuidnun bedash aid dasiuidash mibi dacuëdenquio iquendac. Ubi tantiaquid icquin cun dauë bëpasquenun bed. Adshun mimbi bëdambuen isquin umbi naid tantiendac.

19Mimbi icsambuen naic, quequin aton papan aton bacuë ënmiacbimbuen ubi tantiaquidon icsambuen nasho issun: Ambi icsambuen naid ënmenu, quequin natiambo icmembique. Nuquin Papabëta ubi padpidembuen tantiabenuaquin mimbi icsambuen naid ënash bëdambuec tabadta. 20Tantia. Mibi chuinu. Min shubu shëcuë cuëman nidtuidshun: Shëcuë shëcne, quec ubi cuënsho tantiashun: Pudued, quequin mimbi shëcuë shëcnesho isash min shubun puduedash mibëdi pec tabadendabi. 21Mayan Icsa Satanasën: Icsamenu, caqui chieshtoenquio icquin ubi tantiaquid icsho ubëd tabadmequin ubëtambi chuiquid icmequin ubëdi chuiquid tapan tsadte dapan tsadmendambi. Adoacbimbuec chieshtoenquio icquin Cun Pan chiaidtedi naquin nainash aidbëdi tabadquin aidbëtambi abitedishun icbombo nebi. 22Nëbi ubi tantiaquido utsibotsen chuinu. Umbi chuibocpadombuen cun Mayanën mibitsen tantiametsiashe. Bëdambuen tantiate bunquin umbi chuibued tantiata, quequin Esusën chuiposhi.

Currently Selected:

Esusën Uan ismiaid 3: mcfNT

Highlight

Copy

Compare