Esusën Uan ismiaid 4
4
III. 7TED ICNUC BITACCAID ISMIAID
(4.1—8.1)
Nuquin Papan Uan ismiaid
1Asia yacnocquido Esusën ënquin chuibon abuc isquin shëcuë shëcniacsho ispombi. Adsho issumbien umbi bëyuc tantiabued shoncate shoncacbimbuec cumapenec onquequin: Nëmbo dectato. Nadquid nëbi iquendac. Nadec iuecash iquendac, quequin mibi dadpen ismenu, quequin chuiposhi.#4.1 Esequiedbëtan Isayasën adembidi Nuquin Papa abitedishun Icbo yec dacuëdampambuec tsadsho ispampic. Aden chiaid istiadquio icquin Isa. 6bëta Ese. 1 isbanta.
2Adoac Nuquin Papan Mayanën buanshun ismiac ushquin isacbimbuen ispombi. Adshun isaquien aton tsadte dapanquio tsudain tsadposh. 3Aidi bëdamboshëcquid nec, camenuec matses bunaidquio casëdobimbuec nacnacquiocquid diamantebëd casëdo utsi dubi piumbo icquid bëdambo isadacbimbuec bëdamboshë isadposh. Abi tsadaid nënantanquio icnuc uen podquied uenquebudacbimbuecquid casëdo esmedadda caid umu umupambocquid icposh. 4Adecbidi aton tsadte dapan tsadquid nënantan icnuc aid dacuenadec chuiquid tapa tsadte utsi 24ted icposh. Aid tsadten icbo icbuec tsësiobo 24ted icquido tabadcuededposh. Aido abëdi tabadmequin Nuquin Papan icsaisa icmiaido yec dashcute ushumboshë icquiduidquio dasiuidcuededposh. Chuiquid tapan mauetembo shocosh bëshpiu bëshpiucquid odo caid nacnenaid isquid isquidquiocquid mauecuededposh.#4.4 Aid tsësiobo Acobon mado docetedibëta Esusbëd icquido docetedbidi tantiamenuec tsësiobo ismepanëdash. 5Adnubien Nuquin Papa tsadacnouësh bedbedquetannec abu tesquianniacbimbuec nua cuëdtoposh. Abitedishun Icbombo nec, camenuec adec cuëdposh. Ambobi tabote taboaid 7ted icnuc tabëcaid icposh. Aidi Nuquin Papan Mayan 7ted iquec, quequin ismiaid neposh. 6Ambobidi actepenquio chian dapa madbimbuecquid acte actectsëcquio isadquid icposh.
Nuquin Papa tsadaid anoentsëc daëd abi dacuenadec aben icquidbimbuecquid 4ted icposh. Dadano ëshë ictsëcquiec icquido neposh. Abitedimbo adquiduidquio icposh. Cachoc icnubi tacbiduc adquiobidi ëshë icposh. 7Bëyucquiocquid bëdi dapa tëbuchoquidbimbuec isadquid icposh. Utsibic baca bënëbimbuec isadquid icposh. Utsibic matsesën bëtantetebimbuec bëisadquid icposh. Utsibic chiqui dapabimbuec cuenquid icposh. 8Icbo icbuec aton podo uicchunën podobimbuec 6ted icposh. Podonotsen adquiobidi ëshëuidquio isadposh. Podo ananquio adquiobidi icposh. Aidonquiobi ënenquio icquin Nuquin Papa chuiposh nadec cuëdënquin:
Icsaisa, icsaisa icsaisambo Cun Icbo nec.
Abitedishun Icbombo nadatiambocquid mibi icnuc mibi padquid utsi nibëdec.
Abitedimbo tantiaquidquio mibi icnuc mimbi tantiacmaid utsi nibëdec.
Matses uabi yec icpampidi mibi nec. Nëbi adquid yec mibi nibëdantiapimbo icquidquio nec. Nëbi adquid iquequi choendac,
quec badiadquidën badiadquidënquiec cuëdënashic adecbidi inchëshquidën inchëshquidënquiec cuëdëndedneposh.#4.8 Nuquin Papan ismiac: Nuquin Papa nadquio iquec, quequin chuisho adembidi Isayasën tantiapampic. Isa. 6.3 ista.
9Aden dadanobi ëshëcquidon: Mimbi nac bëdambo iquebi. Mibi bëdamboshë iquec, Papa. Adembidi abitedishun: Mibi bëdambo iquec, mibi cac bëdambo ictsiash, Papa, quequin aidon Nuquin Papa chuibedednubi 10tsësiobo 24ted tabadquidotsen aid ismec dannëshën tinquebudcuededec nidaidën bëccuësquebudcuededposh. Adtanquimbic mauete chicbededtanquin Nuquin Papan tayun sambededposh: Abitedishun Icbombo mibiuidtsëqui nec, quequin. Adotanec aidotsen naden chiec cuëdënuaposh:
11Mibi bëdamboshë iquec, Papa. Adembidi abitedishun mibi: Bëdambo iquec, capashun.
Abitedishun Icbombo mibiuidtsëqui nec.
Chuiquid tapambo abentsëcquiobi mibi nec.
Nadatiambo icquin nabanquidquio icquin mimbi abitedimbo uapampic.
Mimbi tantiacpadombuen mimbiuidtsëcquiobi abitedi uapampic.
Adoac mimbi tantiacpadequi mimbi uaido nibëdanambo abi iquec, Papa,
quec tsësiobo cuëdëncuededposh.
Currently Selected:
Esusën Uan ismiaid 4: mcfNT
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
