Esusën Uan ismiaid 21

Abu chucabëta nidaid chuca ismiaid

(21.1—22.5)

1Aden ismeboshombic padpiden ismeuac abubëd nidaid chucambo icsho ispombi. Abubëdi nidaid shëni nibëdnuc adecbidi acte dapa mad caidtsen nibëdquio icposh.

VIII. SHUBU DADPEN ICQUID EDUSADEN CHUCA ISAID

(21.2—22.5)

2Adnubien bëdamboshë isadquid shubu dadpen icquid Edusaden chuca caid Nuquin Papa yacnoësh abucuësh budsho ispombi. Aidi chidon: Ma ubi bednu, quequid dada bedmequin cuishoncamiacbimbuec bëdamboshë isadposh. 3Adnubien aton tsadte dapan tsadacnouëshquio cumapenec naden chiec onquesho tantiapombi: Cun matses nec, quiash nëmbo aidobëd cuëshëdenquio yec Nuquin Papa tabadendac. Adsho issun aton iuabo icquin abitedishun: Nuquin Papauidtsëqui nuqui tantiaidquio icsho aid Nuquin Papa caindac. 4Nëmbo tabadec bëun bëucacbimbuec matses shubitiapimbo iquendac. Nidaid shënin tabadec abitedi uënëstequiduidquio icbuedi nëuëshquio matses uënëste nibëdendac. Adecbidi sedenquec shubite nibëdendac. Adecbidi uënësquio icmiantequidbëd paëmbo icte nibëdendac. Adec ënden nidaidën iccondaidtedi nibëdquio iquendac, queposh.

5Adnubien Nuquin Papa aton tsadte dapan tsadquid nadec onquedoposh: Aden abitedimbo utsi uaquin chuca uaindambi, queposh.

Adshumbic naden chuiposhi: Umbi muesambo icquin abimbo chiaid tantiatequidquio neque. Dada uata, queposh.

6Adashic padpidec onquec: Umbi chuiboctedimbo nainquin naindambi. Ëndenquimboshë icpampid iquequi nibëdantiapimbo icquid nebi. Adquid icquin umbi uaidtedi nainendambi. Adquid yec ubi chiec acte bundoash: Ubi acte acme, quesho: Piucquid bec cho, quenquio icquin nidaidënuësh acte ushumbo pududquequid cushtoshon amiacbimbuen ënëdenquio yec ubëd tabadtequid icmendambi. 7Mayan Icsa Satanasën: Icsambuen namenu, caqui chieshtoenquio icquin ubi tantiaquido icsho Aton Icbo icquin: Cun mado nec. Cun champi nec, queshun bëdamboshë yacno ënëdenquio yec ubëdi tabadmendambi.

8Adoshombic nadquidtedi cuidendambi. Nëidic dacuëdquin ubi tantiauidbuedo. Nëidic Esus tantiesabo abitedi. Nëidic chieshëmënquido. Nëidic chieshëmënec cuessunnianquido. Nëidic aton dada utsibëdi chichudnanquido. Nëidic chido daëd dachudnanquido. Nëidic aton chidopenquio chudquido. Nëidic aton bënëpenquio chudmequido. Nëidic nënëchoquido. Nëidic ambibi nacnenaidi papa caquin tantiaquido. Nëidic mua uanquido. Aidotedi chian dapa ënëdenquio yec annëdënquequid icsamboshë nuadquid asupede caid padpidec uënëste caid yacno nësecaindambi, queposh.

Edusaden chuca chiaid

9Nuquin Papabëd icquid 7ted icquidon 7tedi dëshoten Nuquin Papan matses cuidte 7 tedi cushtoaid sanambued abentsëc choshon naden chuiposhi: Isec cho. Chidon: Ma ubi bednu, quequid dada bedmequin cuishoncamiacbimbuen Obecabimbuecquid cuishoncamec tabadquido mibi ismenu, queposh. 10Adshumbic Nuquin Papan Mayanën ushquin isacbimbuecnuc naden ismeposhi. Nuquin Papabëd icquidën ubi buanquin ismeposhi. Aden buanshun macuësh tapa abucquiocquid mannanënquio tsadumposhi. Adoac ashunquio isac abucuësh shubu dadpen icquid bëdamboshë isadquid Nuquin Papa yacnouësh budposh. Aidi Edusaden chuca nec, caposh. 11Aid shubutedi Nuquin Papa isadacpadquiecbidi abichobi bëchamauanquiec isadposh. Casëdo bëdambocquid isadacbimbuec acte actectsëcquio isadequi isquid isquidquio diamantebimbuecquid icposh. 12Shubu abitedi nënantan icnuc abichobi tsicatequin abuc daquënë uaid nuamboshë icposh. Daquënë uaid puduedte shëcuë 12ted icposh. Aid shëcuë icbo icbuen isquid yec Nuquin Papabëd icquido 12tedbidi icposh. Aid shëcuë bëtashten bëtashtenquien Acobo cashumbic Nuquin Papan Isadaid quequin cuënaidën mado 12ted icquidon cuëmëdquid cuëmëdquidquien dada uabampaccosh. 13Aid tsicatequin daquënë uaid puduedte shëcuë uëshë choauc 3ted icposh. Uëshë nibëdauc nodte yauc aidtedbidi shëcuë icuaposh. Uëshë budauc 3tedbidi shëcuë icposh. Uëshë nibëdauc sud yauc aidtedbidi shëcuë icposh. 14Aid shubu daquënë uadonon sandoaid nidaid cuënote nuamboshëcquid 12ted icnuc sandobanaidën Obecabimbuecquidën: Ubi chuibenneta, caido 12ted icquidon cuëmëdquid cuëmëdquidquien aid cuënoten dada uabampaccosh.

15Adshumbic ubëd onquebued Nuquin Papabëd icquidën shocosh bëshpiu bëshpiucquid odo caid cuestebimbuecnuc nacnenaid tambante sanamposh. Aidëmbi shubu tambanquin daquënë uaidbëtabi puduedte shëcuë tambanten tambannu, queposh. 16Aid shubu cuëma abitedi Nuquin Papabëd icquidën tambansho isac cuëma tiombi tiombimbuec icposh. Cuëma auc abentsëc tanac 2mid 200 quidometedo cactiombi icposh. Aid tionuidi cuëma abitedi icposh. Adoshombic abuc yacmi cuembo indoquin tanac aid tionquiobidi icposh. 17Adshumbic cuënote nuamboshëcquid tapa tsindoquin daquënë uaid bitsipambo icquidtsen tanac nuamboshë bitsi icposh. Matsesën tambante nacnenaidën Nuquin Papabëd icquidën tanac 65metodo cactembi icposh.

18Tsicatequin daquënë uaid abichobi cuënote bëdamboshëcquid diamante caid nacnenaid acte actectsëcquio yec bëdamboshë isadposh. Adquid icnubi shubu abitedi shocosh bëshpiu bëshpiucquid odo caid nacnenaiduidquio yec nacnacquio icposh. 19Aid daquënë uaquin tauaquin sandoaid cuënote dapa casëdobimbuecquid bëdambo isadquid utsi utsien dabitaccabanaid neposh. Bedanquin diamante caid acte actectsëcquiocquid dabitaccabampaccosh. Utsibic sapido caid umumbocquid. Utsibic acata caid ushumbocquid. Utsibic esmedadda caid umumbocquid utsi. 20Utsibic onise caid piumbocquid. Utsibic dubi caid piumboshëcquid. Utsibic quidisodito caid bëshpiu bëshpiupactsëcquid. Utsibic bedido caid umu umupactsëcquid utsi. Utsibic topasio caid piu piupactsëcquid utsi. Utsibic quidisopadasa caid ushma ushmapactsëcquid. Utsibic asinto caid umumbocquid utsi. Utsibic amatista caid umumbocquidbidi. Adquidtedi dabitaccabampaccosh. 21Daquënë uaid puduedte shëcuë 12ted icposh. Aid bëtashtetedi acten icquid chiun dapan nacnacquiocquid casëdobimbuec icquidën nuacquid tapambo abichobi abichobien nacnenaid neposh. Aid shubu dadpen icquid nënantanquio podquied icposh. Aid podqued shocosh bëshpiu bëshpiupactsëcquid acte actectsëcquio icnuc odo caid nacnenaid neposh.

22Ambobi Nuquin Papa tabadte shubu dapa nibëdquiocsho ispombi. Ad icnuc Nuquin Icbo Obecabimbuecquidbëta Nuquin Papa nadatiambocquid bëisquioquin tantiec ambocquidotedi tabadendac. 23Ambobidi inchështanec badiadenquio iquendac. Badiadën uëshë isadenquio iquendac. Inchëshën uëshëtsen isadenquio iquendac. Nuquin Papa uëshëmbo yec bëchamauanquiec icquidëmbi ambo uëshëmbouidquio iquendac. Adecbidi Obecabimbuecquid tabotebimbuec iquendac. 24Adec bëchamauanquiec uëshëmbocquidën sedac matses nidaid utsin utsinquiec tabadquido nidash capuendac. Chuiquid tapatedishun ambi dayun uaid atona bëdamboshëcquid dadpen icquidtedi Nuquin Papa menendac. 25Ambobidi inchështanec badiadenquio icnubi shëcuë bëtashenquio iquendac. Shëcniacchobi iquendac. 26Nidaid utsi utsiec yacno tabadquidon ambi dayun uaid bëdamboshëcquidtedi bëbëec chochoshon Nuquin Papa menendac. 27Ambo Nuquin Papan: Icsambuen naic, caido puduedtiapimbo iquendac. Ambi papa canun nacnenaid tantiaquido adecbidi puduedtiapimbo iquec. Obecabimbuecquid tantiaquidoen puduedendac. Aden tantiaquid icsho: Cun Pa yacno tabadmetequid nëid nec, queshun dadauate dapan aton cuëmëdquid dada uaidouidtsëqui ambo puduedendac.

Currently Selected:

Esusën Uan ismiaid 21: mcfNT

Highlight

Copy

Compare