Esusën Uan ismiaid 22

Nuquin Papa yacno acte ismiaid

1Aden ismeboshombic Nuquin Papabëd icquidën padpiden ismeuaposhi. Adoac acte Nuquin Papabëd tabadmetequid uënësenquio icmetequid icposh. Acte bëdambocquid acte actectsëcquio isadquid nushan nibëdquidquio chëuëdsho ispombi. Aidi Nuquin Papabëd Obecabimbuecquid tsadte dapan tabadacnouëshquio choec chëuëdposh. 2Shubu dadpen icquid bëdamboshëcquid podquied tapa nënantanquio aid acte chëuëdposh. Aid cuëma aucbidaidi matses uënëstiapimbo icmetequid cute icposh. Aidi baded badedquiec bacuëquidquio neposh. Inchëshën uëshë choan choanquiec bacuëquidquio neposh. Aid cute podobi nidaid utsi utsiec yacno tabadquido nënquido bëdanmetequid neposh. 3Ambo cuidmetequid nibëdquio iquendac. Adquid nibëdnuc shubu dadpen yacno aton tsadte dapan tsadquid Nuquin Papabëta Obecabimbuecquid tantiaquiec abi nashunquido tabadendac. 4Aido#22.4 Cun bacuëbo nec, quequin naic. Nuquin Papan abi cuëmëdquid dada uaquin bësiaido yec Nuquin Papambo bëisquiec tabadendac. 5Ambo inchështe nibëdendac. Nuquin Papa bëchamauanquiec icquidëmbi uëshëmbouidquio icnuc inchështe nibëdquio iquendac. Adecbidi badiadën uëshë chënquequid nibëdnuc matsesën tabote taboaid nibëdendac. Adshumbic abi tantiaquido chuiquid tapabo icmiac ënenquio icquin namebanendac, quequin ismeposhi.

IX. DËNAINQUIN CHIAID

(22.6-21)

6Adshumbic Nuquin Papabëd icquidën naden chuiuaposhi: Muesambo icquin umbi abimbo chiaid tantiatequidquio nec. Nuquin Papan Nuquin Icbombo icquin aton Mayanën tantiamiac: Iuecash nadquid iquendac, quequin ambi oncamiaido Nuquin Papan chuimepampic. Adembidi Nuquin Papa nashunquido abimbo chuiquin dadpen ismebanombi. Nëbi nadquid iquendac. Iuecash utsi nadquid iquendac, quequin tantiamenuen mibi ismebanombi, queposh Nuquin Papabëd icquid.

Esus nëbi chote chiaid

7Adnubien Esusënquio naden chuiposhi: Nëbimbobi nidaid yacno budebique.

Chieshtoenquio icquin ubi tantiata. Aden ubi tantiasho bëdambo icmendambi. Nëid umbi: Nuquin Papan namiac nadquid iquendac, quequin dada uamebued isquin ubi tantiaquiota, quequin Esusën chuiposhi.

8Uan nebi. Umbi isbuedbëta umbi tantiabued abimbo chuiquin nëid dada uaombi. Aden Nuquin Papabëd icquidën chuibanquin ënquimbi ismiaquini: Nuquin Papa padquidien nechitec, quetanec aid ismec dannëshën tinquebudpoc. 9Adshobini: Padi, Aden ubi ismenda. Mibi padquid Nuquin Papan iuabidi nebique. Ëndenquimboshë Nuquin Papan oncamiampido min tsusedpabo isadaidbo aidën iuabidi nepampic. Nëbi umbi ismebued tantiaquin Nuquin Papan chiacpadombuen naquido aton iuabobidi neque. Nuquin Papauidtsëqui tantiaquin aden ismeta, caposhi Nuquin Papabëd icquidën.

10Adashic padpidec onquec: Utsibon issun tantianushe, quenquiocquin umbi chuibambuedbëta umbi ismebuedtedi chuiquin dada uata. Nëid dada uaid isec onquequin ma Esus tantiaquidon tantianu: Nëbi adquid yannushe. Chieshtoenquio icquin Esus tantiec ma tabadnu, queshun dada uata. 11Ma icsambuen naquidon ma adembidi icsambuen napanuna. Ma icsambuen tantiaquidon ambi icsambuen tantiacpadombuen napanuna.

Ma bëdambuen naquidon ma adembidi bëdambuen napanuna. Nuquin Papa chiacpadombuen naquidën ma udictsëc Aid tantiaquin ambi chiacpadombuen napanuna, queposh Nuquin Papabëd icquid.

12Adsho Esusënquio chuiuaposhi: Ai, nëbimbobini nidaid yacno budendac. Adec budshun matsesën naidtedi tantiaquin icsambuen naquido cuidquimbi ubi tantiaquido bëdamboshëcquid menequin ubëdi tabadmendambi. 13Nuquin Papapadquidquiobidi nebi. Umbi tantiacmaid nibëdnuc abitedi cumapenen tantiaquidquio nebi. Ëndenquimboshë icpampid iquequi nibëdantiapimbocquid nebi. Nidaid uabi yec ictednedi nëbi adquidquio yec nibëdantiapimbocquid nebi. Adquid icquin abitedimbo nainendambi.

14Matsesën aton dashcute bëchishaid panacbimbuen ambi icsambuen naid ënsho Nuquin Papan bëdambo icmendac. Adoac shubu dadpen icquid bëdamboshëcquid yacno puduedash cute bacuë uënëstiapimbo icmetequid chec aid yacno tabadendac. 15Adec aido tabadnubi nadquidtedi ambo puduedtiapimbo yec umanucquio tabadendac. Nëidic icsambocquid yec chieshëmënquido. Nëidic nënëchoquido. Nëidic aton dada utsibëdi chichudnanquido. Nëidic aton chidopenquio chudquido. Nëidic aton bënëpenquio chudmequido. Nëidic aton chido utsibëd dachudnanquido. Nëidic chieshëmënec cuessunnianquido. Nëidic ambi nacnenaid papa caquin tantiaquido. Nëidic abi bunaiduidquio naic mua uanquido. Adquidotedi Nuquin Papa yacno puduedtiapimbo iquendac.

16Adashic padpidec Esus onquec: Umbi chiacpadombuen naquid ubëd icquidën ma ubi tantiaquidon iste dada uanu, quequin umbi chiacpadombuen mibi ismebamposh. Umbi dada uamiac Dabidën tsiuecquid yec abitedimbo chuiquid tapa iquendac, quequin chiampid nebi. Badiadte anoentsëc uispa dapa isquidquio chënquec choded chodedacbimbuecquid nebi,#22.16 Isadaidbon cainaidquio nebi, quequin chiaid istiadquio icquin. I.T. 24.17 isbanta. queposh Esus.

17Adsho tantiashun Nuquin Papan Mayambëtan Obecabimbuecquidën chidobimbuecquidën: Cho, cun Icbo Esus, capec. Adembidi chuibansho Esus tantiaquidotedishun: Cho, cun Icbo Esus, capec. Adshumbic: Acte bundoash ubi acte acme, quesho: Piucquid bec cho, quenquio icquin acte ushumbocquid cushtoshon acmiacbimbuen ënëdenquio icnuc abëd tabadmendac.#22.17 Esus tantiesabo acte bunacbimbuec Esus tantiate bunsho Nuquin Papan bëdambuen isendac. Nuquin Papa bëdambuen ismenuen menete nibëdnuc Esusuidtsëqui tantiasho Nuquin Papan bëdambuen isquin abëdi tabadmendac.

18Tantia, umbi chuibued tantiaquidotsen chuinu. Nadquid nëbi iquendac. Iuecash utsi nadquid iquendac, quequin ubi ismebuedtedi chuiquin dada uaombi. Aden umbi dada uabued tsitënquin ambembi chiaid utsi chuiquin dada uainda. Umbi chuibocpadombuen nasho Nuquin Papan ambi ubi dada uamequin chuibocpadombuen mibi cuidquiotsiashe. 19Adembidi umbi dada uabued nactiacbimbuen abitedi chienquio icsho issun umbi chuibocpadombuen Nuquin Papan cute bacuë uënëstiapimbo icmetequid mibi chemenquio ictsiashe. Adembidi abi tabadaid shubu dadpen icquid bëdamboshëcquid yacno abëdi tabadmenquio mibi ictsiashe. Aden nainda.

20Ma aidtedi tantianu, quequin ubi chuibanquid yec: Ai, nëbimbobini nidaid yacno budendac, queposh.

Adsho tantiashun: Amen. Ai, abimbo mimbi caique. Chota, Cun Icbo Esus. Capombi.

21Ma Nuquin Icbo Esusën abitedi bëdambuen isquin bëdambo icmepanuna. Aidted chuiquin dada uaombi.

Currently Selected:

Esusën Uan ismiaid 22: mcfNT

Highlight

Copy

Compare