Esusën Uan ismiaid 19

Abucuësh cuishonquiaid

1Aden Nuquin Papabëd icquidën abucshun chuisho tantiaboshombic auëshquiobidi matses dadpenquioshë cumapenen naden chiec cuëdëncuededsho tantiauapombi:

¡Adeduya! Nuquin Papa bëdamboshë iquec.

Aidëmbi nadatiambocquid icquin matses abëd tabadmete bunquin

abi dëniacte bunquido mënchicshun abi yacno tabadmendac.

Adquid icsho: Nuquin Icbombo nec, quequin ënenquio icquin tantianuna.

2Muesambocquid icquin ambi chiacpadombuen matses cuidquidquio nec.

Abi tantiesabo chido piucquid bedec chudadquidbimbuecquido icquin

matsesën nacnenaid: Cun papa nec, camete bunquin icsambuen naquin ënenquio icsho cuidquidquio nec.

Adquid icquin: Icsamboshë iquec, quequin matses utsibo

icsamequido chido piucquid bedec chudadquidbimbuecquido icsho

Babidonia yacnocquido cuidquioposh.

Nuquipadquid Nuquin Papa tantiaquido cuessun secaquido icsho cuidosh,

quec cuëdëncuededposh.

3Adashic padpidembuec:

¡Adeduya! Nuquin Papa bëdamboshë iquec.

Is. Ënëdenquio yec pushud pushudpambo icnuc nëdëncaquin chido piucquid bedec chudadquidbimbuecquid icsho Babidonia yacnocquido ambi icsambuen naid ënenquiocsho cuidquieque,

quec dadpenquioshë cuëdëncuededposh.

4Adsho tantiashien Nuquin Papa aton tsadte dapan tsadacno dacuenadec tabadquido: Nuquin Papa Nuquin Icbombo nec, quequin ismec tsësiobo 24ted icquidobëd dadanobi ëshëcquid 4ted icquido dannëshën tinquebudec nidaidën bëccuësquebudcuededposh. Adec tinquebudcuededequi: Amen. Abimbo caic. Adeduya. Nuquin Papa bëdamboshë iquec, quecuededposh. 5Adnubi ashunquiobidi abentsëcshun naden chuisho tantiapombi:

Nuquin Papa Nuquin Icbombo nec, quequin ënenquio icquin tantianuna.

Aid tantiaquidtedi icquin nuquitedi: Nuquin Papa bëdamboshë iquec, canuna.

Aton iuabo icquin adonona.

Chuiquid tapabo yec chuiquidpenquio icquimbi nuquitedi: Nuquin Papa bëdambo iquec, canuna,

queposh.

Nuquin Papa tantiec cuëdënte chiaid

6Adembidi abu tesquianniacbimbuec acte nua chododoquiacbimbuec matses dadpenquio naden chiec cuëdëncuededsho tantiapombi:

Adeduya. Nuquin Papa bëdamboshë iquec. Aidi abitedishun Icbombo yec nadatiambocquid icquin

Ambentsëqui abitedimbo namebanendac.

7Nuquitedi cuishonquequionona.

Mibi bëdamboshë iquec, Papa, canuna. Adembidi: Mibi bëdambo iquec, Icbo, canuna.

Dadan aton chido buntacquio beduanacbimbuen Obecabimbuecquidën abi tantiaquido beduanshun abi yacno tabadmendac.

8Nëbi cun bënën ubi bedec, quiash

chido dashcute bëdambocquid

bëchish nibëdec ushumbocquid nacnacquio icquid

dasiuidec nacnemëdacbimbuec:

Esus tantiaquido yec bëdambuen nabanec tabadec,

quec cumapenec cuëdëncuededposh.

9Adnubi Nuquin Papabëd icquidën naden chuiuaposhi: Isadaidbon aton chido bedquin aton matses chochomiash pemec cuishonquec bëdambuec tabadquid. Adembidi abi tantiaquido Obecabimbuecquidën beduanshun abi yacno tabadmendac. Adoac cuishonquequiec tabadendac, quequin chuiquin dada uata, caposhi. Adtanequic: Abimbo caimbi. Nuquin Papan Chiaidquio chiec nebi, queposh Nuquin Papabëd icquid.

10Adsho tantiatanequini: Cun Icbombimbuec onquec, queshun ismenuec dannëshën tinquebudpoc. Adshobini: Aden ubi ismenda. Nuquin Papauidtsëqui aden ismeta. Mibi padquid Nuquin Papan iuabidi nebique. Aidëmbidi namiaid yec mibipadquidbidi Esusën iua nebique. Ubi aden ismenda. Nuquin Papa tantiata, queposh Nuquin Papabëd icquid.

Adembidi Esus chuiquin Nuquin Papan Mayan Bëdan tantiamiac ambi oncamiaidon chuipampic.

Cabachu ushu catsadquid isaid

11Adshumbic abuc isquin abu shëcniacchobi icsho ispombi. Adshun isaquien auëshquio cabachu ushumbo icquid catsadec choposh. Aid catsadquid icsaisambo yec abimbo chuiquid nec, quequin chuiposh. Aidi chuiquid tapa icquin aton matses bëdambuen nameposh. Adecbidi utsibo icsambocquidobëd cuesnanquin dëniacquid bëdambocquid neposh. 12Matsesën ompodëntiapimbo icquidquio nec, camenuec cute nëdënquequidbimbuec isquid isquidquio aton ëshë icposh. Abitedishun chuiquid tapambo nebi, quec mauete dadpen maueposh. Adquid icnubi cuëmëdquid abentsëc dada uaid tantiadenquiocquid icposh. Utsibon tantiatiapimbo icnuc ambentsëqui tantiate neposh. 13Aidi Nuquin Papapadquidquiobidi yec abibi tantiamianquidquio nec, quequin cuënaid neposh. Aton dashcute bëntsecquid intaquën punaid piumboshëcquid dasiuidposh. 14Aid bëyuc nidnuc aid tsibanec cabachu ushumbocquid catsadquido Nuquin Papan sondadotedi dashcute bëdambocquid bëchish nibëdquidquio ushumbocquid dasiuidcuededposh. 15Bëyuc nidquidën ana shëcuënuëshquio chështe cuënumbo icquid cueshqueposh. Adquid icquin nidaid utsi utsiec yacno tabadquido icsaquido icsho uesquin seshun secaindac. Adembidi matses chuiquid tapan shocosh cueste sananquin namesho utsibon dëniacquin: Umbiquien namenu, catiapimbo iquendac. Nuquin Papa nadatiambocquid icquin icsaquido nëishënquioshon shancuimbiecquid uba caid nua ënë icnuc tishtishacbimbuen cuidquin nua intac icnuc seshun secaindac. 16Aton dashcute bëntsecquidbëtambi aton bëusudquidën naden dada uapaccosh: Abitedishun chuiquid tapambo yec abitedishun Icbombo nec, quequin chuiquin dada uapaccosh.

Acte ëquëducuësh chobued cuidte chiaid

17Adshumbic Nuquin Papabëd icquid utsi badiadën uëshën nidtosho ispombi. Aidëmbi pisenaid chequid utsi utsiec abuc capusho cumapenec cuëdquin naden chuiposh: Nuquin Papan cuidquin cuessun secaidon nami chec chocho, caposh. 18Adoac chochoshon nëidtedshun nami mimbi chendac. Nëidic matses utsi utsien chuiquid tapabo. Nëidic sondadon chuiquid tapabo. Nëidic dada cuesabo. Nëidic cabachu chedo abi catsadquidobëtabi. Nëidic matses utsibo. Nëidic matses iuabo. Nëidic matses iuapenquio. Nëidic chuiquid tapabo aton iuabobëtabi mimbi chiendac.

19Adshumbic padpiden ispombi. Acte ëquëducuësh chobued aben icquid tapabëd nidaid utsi utsiec yacno tabadquidon chuiquid tapa aton sondadobëd tsidadash chochoposh. Cabachu ushumbocquid catsadquidbëta aton sondado cuessun secanu, quec chochoposh. 20Adshobien acte ëquëducuësh chobued aben icquid tapa icsamboshëcquid bedposh. Adotanquimbic aid tantiamequid nidaid shëcuënuësh chobued muaquin oncamiaidtsen bedposh. Aidi nadatiambocquin nabanquin muaquin aton chuiquid tapa icsamboshëcquidën chiacpadombuen matses namequidquio neposh. Adec muaquin aton chuiquid tapabimbuecnuc nacnenmequidtsen neposh. Adecbidi: Cun chuiquidën iuabo nec, quequin matses dadpen bësiadmequimbi mësiadmequid neposh. Adec icsamianquidquio icsho bedposh. Aton chuiquidbëta bedshun cuessunniambobi ënëdenquio yec chian annëdënquequid icsamboshë nuadquid yacno nësecaposh. 21Adshumbic cabachu ushumboquid catsadbuedën ana shëcuënuësh chështe cuënumbo icquid cueshquebuedën chochobued sondado abitedi seshun secaposh. Adoacsho issun matsesën nami pisenaid chequid utsi utsiec abuc capubuedi budbudshun nua nuaic tëpuisquin aidon nami chebededposh.

Currently Selected:

Esusën Uan ismiaid 19: mcfNT

Highlight

Copy

Compare