Esusën Uan ismiaid 18

Nuquin Papan shubu dadpen icquid Babidonia yacnocquido cuidaid

1Aden isboshombic Nuquin Papabëd icquid utsitsen abucuësh budsho ispombi. Nuquin Papan icmiacpadec chuiquid tapa yec bëchamauanquiec abichobimbo chënquec nidaidën budposh. 2Adec budshun cumapenec cuëdquin chuiposh:

Babidonia yacnocquido Nuquin Papan uesquin cuidquiac. Aid uesquiac.

Aden cuidac matses nibëdquiecnuc abi tabadtennecno mayan icsauidpambo iquendac.

Ambobidi podobitsi icsambo icquiduidquio tabadendac.

Ambobidi edestebëdi abipadquid chodquiaid chequid matsesën petemaidi tabadendac.

Ambobidi bëdi dapabimbuecquido petemaiduidquio iquendac.

3Babidonia yacnocquidon nidaid utsi utsiec yacno tabadquido aton chuiquid tapabobëta tantiadenmenuen acte paë uaid acmiac

aton chidopenquio chudacbimbuen Nuquin Papambo tantiamenquio icquin aidën chiaid niac niacmequin icsamequioposh.

Adembidi dadpen dayun uaquid matses utsibon abi bunaidquio menequin piucquid dadpen bedash: Bëdambo iquebi, queposh.

4Adnubien abucuësh naden chiec onquesho tantiapombi.

Ubi tantiaquido mibitedi neque. Babidonia yacnocquidon nacpadombuen nainquio yec cuenta.

Aidobëdi icsasho ubitsen cuidnushe, queshun aidon nacpadombuen nainda.

Nëmbo tabadenquio yec niqueta.

5Ambi icsambuen naidtedi tsindoac abu ushu yacno cuësquec tsindoadtsiash.

Ënëdenquio yec icsauidequi tabadsho issun aidon naid bëshunenquio icquin tantiaquid nebi, queposh Nuquin Papa.

6Adashic padpidec onqueuaic:

Babidonia yacnocquidon matses utsibo icsa uaquid icsho issun cuidquin dadpenquio icsauata.

Aden icsa uaquidquio icsho udictsëcquio icsauameta.

Aden aid chidon acte paë uaid acmequin dadpen icsa uaquid icsho issun nëishquioshon: Cumapenec ma icsabudquiono, quequin acte paë uaid icsa daëden cushtotanquin acme. Adsho nëbi uesquin cuidquiendambi.

7Babidonia yacnocquido mëyadec natianuc cumapenen cuidquiendambi.

Ambi naiduidi naquin atona dadpenquio bedash aidtedi dayunuaic nadec onquec: Ubiuidtsëqui chuiquid tapa yec bëdambo iquebi, quepec cuidte tantienquio iquequi.

Adquid iquec otacquio tantiec:

Cun iuabo matses dadpen icnuc

bëdambo iquebi.

Niantepenquio nebi. Adquid iquec mëyadenquio iquebi, quepec chido chuiquid tapa onquiacbimbuec.

8Adquid icsho ambi: Nëbi ubi cuidec, cacmaidquio abi uëshëmbi mëyadnuc cuidendambi.

Aden dadpenquio uënësmebudnequin utsi utsien nëncuenmequimbi utsi utsien daicsabudmendambi. Utsi utsiec aton pete nibëdquiecnuc natia bunendac.

Adshumbic nëdëncaindambi.

Abitedishun Icbombo yec nadatiambocquid icquin aid cuidquiendambi, queposh Nuquin Papa.

9Aden ambi chiacpadombuen cuidquin nëdëncac pushudtosho isash chuiquid tapabotedi shubiec sedenquendac. Aidotedi Babidonia yacnocquidon papa canun nacnenaid tantiaquin dadan aton chidopenquio chudacbimbuen Nuquin Papambo tantienquio icquido neposh. Aidobëtan atona dadpenquio bedshun utsibo ismendac. 10Ubitsen cuidnushe, quiash dacuëdec niqueshun uannoshon isec aido tabadendac. Adec tabadec:

Padtemboshë. Padtemboshë. Aido uënësquimboshë iquec.

Babidonia yacnocquidon matses utsibo dadpen namepadennec.

Badedquio uesquin cuidquiopec, queposh.

11Babidonia yacnocquido aden cuidacsho isash nidaid utsi utsiec yacno tabadquin dadpen dayun uaquido utsibotsen: Umbi dayun uaid bedquin piucquid dadpen ubi menedennec. Nëbi adquid nibëdnuc: ¿Tsuntsimbini umbi dayun uaid bedquin piucquid menepec? quec uënësquiocnoc shubiec sedenquecuededendac. 12Adashic: Nadquidtedi Babidonia yacnocquido menequin piucquid dadpen bedpadennembi. Nëidic shocosh bëshpiu bëshpiucquid odo caid. Nëidic shocosh ushu. Nëidic casëdobimbuecquid cuënote bëdamboshë isadquid. Nëidic acte chiun nacnenquin ushucquid payute uate. Nëidic dashcute bëdambocquidbëd uannoshon bëaid piucquid dadpen icquid. Nëidic dashcute piumbocquidbëd umumbocquid. Nëidic cute bëdambo nuadquid chëshshun nacnenaid. Nëidic edepanten shëta bedshun cueshquequid nacnenaid. Nëidic cute utsi bëdaidquio piucquid dadpen menequin bedshun nacnenaid. Nëidic shocosh piumbocquid nacnenaid. Nëidic shocosh tsasimbocquid nacnenaid. Nëidic cuënote tsasimbocquid daun daun icquid. 13Nëidic pete casecate utsi utsiecquid. Nëidic nuadte bëda pichicatequid. Nëidic bëdambo nuadec danoshquete. Nëidic cute bëpin. Nëidic acte paë uaid. Nëidic bëchi. Nëidic pan nacnentequid. Nëidic nëish iua atona buanquido. Nëidic iua utsi obeca caid. Nëidic nëish iua cabachu caid. Nëidic matses antsadtoacsho cabachun buante. Nëidic cuesnanquin bedaid matses iuabo.

14Adshumbic aid shubu dadpen icquid chiec:

Abi piucquid menedennedën dayun uaid cute bacuë nibëdsho isash:

Matses bunaidquio ambi dayun uaid nibëdquiec. Ambi dayun uaid dashcute bëdambocquidbëd atona utsi payute dadpen abitedi nibëdquiocnoc nibëdanmeposh, quendac.

15Matses utsibo chochoshon atona bëdaidquio dadpen meniac piucquid dadpenquio bedquido ambi meniaido yacno shubu dadpen icquid Babidonia nëdënquedosho isash dacuëdec uannoshon isec natia shubiec sedequecuededendac. 16Aido tantiac uënësquimboshë iquec:

Padtemboshë. Padtemboshë. Aido uënësquimboshë iquec. Aton matses dashcute bëdambocquid dasiuidcuededtennec. Utsi utsiec dashcute piumbo icquid dasiuidnubi utsi utsiec dashcute umumbo icquid dasiuidcuededtennec. Utsimbic casëdobimbuecquid bëshpiu bëshpiucquid odo caid nacnenaid payudennec. Utsimbic nacnacquiocquid ushumbocquid nacnenaid. Utsimbic cuënote bëdambocquid nacnenaid.

17Aidotedi abi uëshëmbi cuidquiac ambi dayun uaidbëdi aid matses badedquio nibëdanosh, quec shubiec sedenquecuededendac.

Adecbidi nidaid utsi yacno cano dapa nidmequidotsen nëidtedi shubiec sedenquecuededendac. Nëidic cano dapa icbo. Nëidic cano dapa icbobëd nidquido aton iuabo. Nëidic icbo piucquid meniash cano dapa antabëdtoquido. Nëidic nuëcquid bedshun piucquid bednuen menequido. Aidtedi uannoshon isec tabadec shubiec sedenquecuededendac. 18Nëdënquec nuambo pushudsho uannoshon isec tabadec: Shubu dadpenquio icquid Babidoniapadquid utsi nibëdec, 19quiash natiaquiec nidaid putu masecadec uënësquiocnoc shubiec sedenquecuededendac. Adec shubiquin cuënec:

Padtemboshë. Padtemboshë. Aido uënësquimboshë iquec.

Ubipadquid cano dapa icbon bëaidtedi bedshun piucquid dadpen menedennedo tantiac uënësquimboshë iquec.

Is. Cuidac badedquio nibëdaneque, quec shubiec sedenquecuededendac.

20Mibi abuc tabadquidotedi: Shubu dadpen icquid cuidquin nëdëncaquin nibëdanmequiosh,

quec cuishonqueta.

Adecbidi Nuquin Papa tantiaquido yec cuishonqueta.

Adecbidi Esusën: Ubi chuibenneta, caido yec cuishonqueta.

Adecbidi Nuquin Papan oncamiaido yec cuishonqueta.

Mibi chieshënquin natiamiacpadombuen mibi chieshënquido Nuquin Papan ambi chiacpadombuen naquin uesquin cuidquioshe,

queposh abucuësh onquec.

21Adnubien Nuquin Papabëd icquid utsintsen nadatiambocquidën piacbobimbuecquid macueste cuënote dapa iuëmboshëcquid cadotanquin acquimbuen acte dapa mad caid nënetanec nadposh:

Umbi acquimbuen nënebocpadombuen

Nuquin Papan Babidonia yacnocquido uesquin cuidquiendac.

Adoac padpidec isedenquio iquendac.

22Adoac aido ictednecnombo nadimbo iquendac.

Ad icnuc tintincate cuëdënmenquio iquendac.

Dëuëte ambushcainquio iquendac.

Shoncate shoncainquio iquendac.

Cute chëshshun nacnenquid nibëdquio iquendac.

Adosbiecquid tidico caid macuesenquio iquendac.

23Tabote taboaid chënquenquio iquendac.

Dadan aton chido bednuc iccuededec cuishonquenquio iquendac.

Nadimboshë iquendac.

Adsho isash utsibo: Babidonia yacnocquidon aton piucquid bednuen

cumapenen tantiaquin ambi naiduidi napadennec.

Adembidi nidaid utsi utsiec yacno tabadquidotedi

ambi icsambuen tantiaid tantiamequin

nënëchoquidon mua uaquin icsamepadennec, quendac.

24Nuquin Papan aden cuidabi icnuc Babidonia yacnocquidon Nuquin Papa chieshënquin ambi oncamiaidobëtabi abi tantiaquido dadpen cuessun secapampic. Adembidi chieshëmënquido icquin utsibo dadpenquio cuessun secapampic. Adquido icsho Nuquin Papan uesquin cuidquin naic, queposh Nuquin Papabëd icquid.

Currently Selected:

Esusën Uan ismiaid 18: mcfNT

Highlight

Copy

Compare