Esusën Uan ismiaid 17

VII. CUIDTE ISMIAID

(17.1—21.1)

Chido isaid

1Adnubien Nuquin Papabëd icquid 7tedshun dëshoten cushtoaid chiuimbuedo abentsëcshun naden chuiuamposhi: Isec cho. Nadquid icsho Nuquin Papan cuidquiendac, quequin chido piucquid bedec chudadquidbimbuecquid acte dadpen icquid bëntse tsadsho mibi ismenu.#17.1 Nëid shubu dadpenquiocquid Doma caid nec. Ambo aton chuiquid tapabobëd matses abitedi icsamboshë icsho Nuquin Papan comapenen cuidtequido nec. 2Aid chido icsamboshëcquidën nëido chudmiacbimbuen matses utsi utsien aton chuiquid tapabobëta tantiadenmenuen acte paë uaid acmiacbimbuen Nuquin Papambo tantiamenquio icquin Ambi Chiaid niac niacmequid icsho cuideque. Isec cho, queposh.

Bëdi dapabimbuecquid catsadsho chido isaid

3Adshumbic Nuquin Papan Mayanën ushquin isacbimbuecnuc ismeuaposhi. Adoac Nuquin Papabëd icquidën masiuidquio yec shubu nibëdacnombo chido aben icquid tapa catsadsho ispombi. Aidi piumboshëcquid neposh. Aidën dadan Nuquin Papa icsambuen chuishunquin uesquin dada uaid icposh. Aton mapi 7ted icnubi aton pais 10ted icposh. 4Aid chido dashcute piumbo icquidbëd umumbo icquid dasiuidposh. Shocosh bëshpiu bëshpiucquid odo caid nac nacquiocquid yec cuënote bëdamboshëcquid yec acten icquid chiunën nacnemëdaid ushumboshëcquid yec quenuc payuec aidbidi mësiuidposh. Dëshote shocosh bëshpiu bëshpiucquid odo caid nacnacquiocquid sanamposh. Aden sanansho dëshote anisquin isac ambi icsambuenshë naiduidquio icposh.#17.4 Ambi piucquid bedec chudadquid chido Babidonia caid yacnocquido icsamboshë iquec. Acte paëmbo icquid tantiadenmenuen acmiacbimbuen Nuquin Papa tantiamenquio icquin matses utsibo dadpenquio icsamequiendac, quequin tantiamenuen aden Uan ismepampic. 5Adshun isquien aid chido utsin tantiatiapimbo ictequid abi cuëmëdquid aton bëtanteteno bëdada uadec: Babidonia yacnocquido piucquid bedec chudadquidon titabimbuecquid icquin matses abitedi icsambuen namequidquio nec, quequin chuiquin bëdada uadaid icposh. 6Aid chido acte paë uaid acash tantiadenacbimbuen Nuquin Papa tantiaquidon intac acshun tantienquio yamposh. Esus tantiaquin aid chuibansho dadpen cuessun secaidon intac acshun tantiadenquio yansho isuapombi. Adquidtedi istanec tantiadempambo icpobi.

7Adshobini Nuquin Papabëd icquidën: Tantiadempambo iquec ¿quecta ique? Tantia, Utsibon tantienquio yaid chidobëta abi catsadaid bëdi dapabimbuecquid aton mapi 7ted iquequi aton pais 10ted icquid chuinu. 8Mimbi isbued bëdi dapabimbuecquid ënden ictennedi nëbi nibëdequi iuecash aidquiobidi abi tabadaid nidaid shëcuë ëquëducuësh padpidec choendac. Adacsho iuecshun cuidquin nibëdanmequiendac.

Aden nibëdanmiabi icnubi ëndenquimbo nidaid uabi Nuquin Papan tantiampicpaden abëd tabadmetequido aton cuëmëdquid dadauate dapan dada uaid icnubi utsibo aton cuëmëdquid aid dada uaten dada uambo icquido nidaidën tabadquido tantiadempambo yec tabadendac aid bëdi dapabimbuecquid isash, queposh Nuquin Papabëd icquid.

9Adshumbic padpiden chuiposhi: Tantia. Umbi chuibued cumapenen tantiaquidon ma tantianu, queshun mibi chuinu. Bëdi dapabimbuecquidën mapi 7ted icquid Babidonia caid yacno matses icsamequid chido tabadacno macuësh tapa 7ted iquec, quequin tantiamequimbi: Chuiquid tapabo 7tedbidi iquendac, camenuen aid mapi 7tedbidi mibi ismiombi.#17.9 Nuquin Papan Chiaid tantiaquidonquio naden chiec: Macuësh 7ted yacnocquid shubu dadpen icquid Doma chuipec, quequin chuipanëdash. 10Aid chuiquid tapabo 5ted nibëdanambi abi utsi iquec. Aidëmbi nëbi aton matses namec. Utsitsen choabi iquec. Adec choshon aton matses nametantsequi badedquio nibëdanendac. 11Bëdi dapabimbuecquidën mapi 7ted icquid ënden ictennedi nëbi nibëdec. Uënësnëdaidi choashic umbi ismebued acte ëquëducuësh chobuedquiobidi padpidec chuiquid tapa icsamboshëcquidquio 8 icquid aid nendac. Adquid icquin umbi chuibued chuiquid tapabo 7tedshun namiacbimbuen aton matses icsambuenshë tabadmendac. Adosho issun iuecshun cuidquin nibëdanmequiendac.

12Adashic abi onquec: Naden tantiamenuen aben icquid tapa pais 10ted icquid mibi ismiombi. Chuiquid tapabo 10ted iquendac. Nëbi aidon aton matses namequin tauabi iquec. Adquid icbuedobi iuec iuecpactsëcshun acte ëquëducuësh chobuedbëta chuiquid tapabo icmiac matses namendac. 13Aid chuiquid tapabo 10ted icquidon bëdi dapabimbuecquid piumbocquid aton chuiquid tapambo icmendac. 14Adoac Obecabimbuecquidbëd icquido nibëdquiocnoc cuessun secanu, quiash aidobëd cuesnancuededposh. Adec cuesnanquin Obecabimbuecquidën dëniacposh. Aido abi chieshënquidon: Chieshtomenu, caqui chieshtoenquiocquin Obecabimbuecquid tantiaquid icsho Nuquin Papan namiaido neposh. Obecabimbuecquid abitedishun Icbombo yec abitedishun chuiquid tapambo nendac, quetanquin dëniaquendac, queposh Nuquin Papabëd icquid.

15Adshumbic padpiden Nuquin Papabëd icquidën naden chuiuaposhi: Umbi acte dadpen icquidën chido piucquid bedec chudadquid tsadsho ismebuedën nëidted yacnocquido icsambuen namendac. Nëidic shubu dadpen utsi utsiec yacnocquido. Nëidic matses utsi utsiecquido. Nëidic onquete utsin utsinquiec onquequido. Nëidic nidaid utsi utsiec yacno tabadquido, quequin matses dadpen tantiamenuen chido piucquid bedec chudadquidbimbuecquid acte dapa bëntse tsadsho mibi ismiombi. 16Adnubien aton pais 10ted icquid#17.16 Pais diested icquid quequin nidaid utsin utsinquiec icquid chuiquid tapa 10ted capanëdash. aben icquid tapa mimbi isbuedën chido piucquid bedec chudadquidbimbuecquid chieshënendac. Aden chieshënquin abentsëqui icnuc nianendac. Atonatedi bedshuntanquin dashcute dasiuidenquiocnoc nianendac. Adoshombic cuessunetanquin aton nami pequin nibëdquiecnuc pichicaindac. 17Ma chidobimbuecquido uesquin cuidnu, quequin ambi tantiacpadombuen Nuquin Papan aben icquid tapabëta abëd icquido chuiquid tapabo namendac. Adoac aben icquid tapan Nuquin Papan chiacpadombuen naindac. 18Shubu dadpen icquid yacno chuiquid tapa iquendac. Aidëmbi nidaid utsi utsiec yacnocquido chuiquid abitedi namendac, quequin chido piucquid bedec chudadquidbimbuecquid mibi ismiombi, quequin Nuquin Papabëd icquidën chuiposhi.#17.18 Doma yacnocquidon chuiquid tapabëtan abëtan chuiquidon ambi tantiacpadombuen namendac, quequin tantiamenuen aden chuipanëdash.

Currently Selected:

Esusën Uan ismiaid 17: mcfNT

Highlight

Copy

Compare