Esusën Uan ismiaid 13

Bëdi dapabimbuecquid acte dapa mad caidën icquid ismiaid

1Adec aid nidtuidnubi umbi isnubien acte ëquëducuësh choquid mapi 7ted icnubi aton pais 10ted icquid pudundoposh. Nuquin Papa icsambuen chuishunaid cuëmëdquid utsi utsien aton mapitedi icbo icbuen bëdada uadaid neposh. Adshumbic aton paisën paisënquien chuiquid tapan mauete dectambampaccosh. 2Aton dada bëdin dadabipambuec uinsadpambo isadposh. Aton taë oso dapan taëbimbuec nuambo isadposh. Aton ana shëcuë bëdi dapa tëbuchoquidën ana shëcuëbimbuec isadposh. Adquid icsho nisi dapabimbuecquidën nadatiambocshëcquid icmeposh. Adshumbic abitedishun chuiquid tapambo icmeposh. Adoac matses utsibo abitedishun chuiquid tapa icmeposh.#13.2 Adembidi Daniedën matses icsamboshëcquid chuipampic. Dan. 7.1, 8, 18-19 isbanta. 3Adshumbic padpiden ismeposhi. Adoac aid bëdi dapabimbuecquid acte ëquëducuësh chobuedën mapi abentsëc mëmuntiapimbo icnuc macuesac uënëstiadtsëcquio icquid bëdanmesho ispombi. Adosho isash matses abitedi tantiadempambo yanquin chiec: Cumapenen tantiaquidquio nec, queshun matses abitedishun bëdi dapabimbuecquid acte ëquëducuësh chobuedën chiacpadombuenuidi nabededposh. 4Cun chuiquid tapa namequid mibi nec, quequin nisi dapabimbuecquid papa caquin matsesën tantiabededposh. Adembidi bëdi dapabimbuecquid acte ëquëducuësh chobued icsho: Cun chuiquid tapa mibi padquid utsi nibëdec. Cumapenen tantiaquidquio icnuc utsibon nuqui cuessun secatiapimbo iquec, queshun aton chuiquid tapa tantiabededquioposh. 5Aden matsesën tantiaid icquin bëdi dapabimbuecquid acte ëquëducuësh chobuedën Nuquin Papa chieshënquiec: Nuquin Papa caid nibëdquiec. Umbiuidtsëqui namembi, quequin tantiasho Nuquin Papan ambi tantiacpadombuen seta 3ted matanmetanec seta utsi choaid poctsembo cuëscaquin matses abitedimbo nameposh. 6Aidëmbi Nuquin Papa chieshënquin naden icsambuen chuishumposh: Nuquin Papa caid icsambo iquec. Abi tabadte shubu icsambo iquec. Abi abuc tabadacnocquidtedi icsambo iquec, quequin icsambuen chuishumposh.#13.5-6 Nëid chiaidbimbuecquid Daniedën dada uapampic. Dan. 7.8, 20, 25 isbanta. 7Adembidi nisi dapabimbuecquidën tantiamiacpadombuen Nuquin Papa tantiaquidobëd cuesnanmequin dëniacmeposh. Adembidi nëidtedishun chuiquid tapa icmeposh. Nëidic matses utsi utsiecquido. Nëidic shubu dadpen icquid utsi utsiec yacnocquido. Nëidic onquete utsin utsinquiec onquequido. Nëidic nidaid utsi utsiec yacno tabadquido. Aidtedi ambi chiacpadombuen nameposh.#13.7 Daniedën adembidi chuipampic. Dan. 7.21 ista. 8Bëdi dapabimbuecquid acte ëquëducuësh chobued chuiquid tapa icsho matses abitedishunquio: Nadatiambocquid yec bëdambo iquec, quequin tantiabededendac. Ëndenquimboshë matses uabi icquin Nuquin Papan tantiampicpadec abided cuidadec uënësaid Obecabimbuecquid tantiesabo nendac. Adquido yec Nuquin Papan: Ubëdi tabadtequido nec, quequin abi cuëmëdquid dadauate dapan dada uamiambo icquido nec, quequin aden ismeposhi.

9Bëdambuen tantiate bunquin Umbi Chiaid tantiata:

10Nuquin Papan tantiacpadembi abi tantiaquido mëyanendac.

Aden Ambi tantiacpaden utsi utsien quënën tsadunendac.

Utsi utsien chështe aucbidaëdi cuënumbocquidën seshun secaindac.

Mibi padquid adoendac, quequin chiaid icnuc chieshtoenquio icquin Nuquin Papa tantiaquiota.

Aben icquid tapa utsi nidaid ëquëducuësh chosho ismiaid

11Aden ismeboshombic padpiden ismeuac aben icquid tapa utsitsen nidaid ëquëducuësh puduensho ispombi. Aidi obeca bënëbimbuec isadquidi aton pais daëd icposh. Nisi dapabimbuecquid onquebocpadecbidi dacuëdampambuec nua onqueposh. 12Adsho issun bëdi dapabimbuecquid acte ëquëducuësh chobuedën abia chuiquid tapa icmebuedëmbidi aidbëtambi nidaid ëquëducuësh puduembued chuiquid tapatsen icmiac matses abitedimbo ancaquin nameposh. Aden namequin aton chuiquid tapa acte ëquëducuësh chobuedën chiacpadombuen matses abitedi nameposh naden chuiquin: Mëmuntiapimbo icnuc macuesac uënëstiadtsëcquio icsho bëdanmiaid yec nuquin chuiquid tapa neque. Aidën chiaiduidtsëqui nanuna, quequin chuiposh. 13Adembidi nidaid ëquëducuësh chobued aton chuiquid tapan chiaid namenuen nadatiambocquin nabanquin dadpen ismeposh. Matses dadpenshun isnubi abembi taboadaid abucuësh nidaidën paëdmequin ismeposh. 14Aidën namiacpadombuen nadatiambocquin nabanquin muaquin ismiaqui matses dadpenshun: Abimbo caic, quequin bëdi dapabimbuecquid acte ëquëducuësh chobuedën chiacpadombuen nabededposh. Aton chuiquid tantiamequid nidaid ëquëducuësh chobuedën: Nuquin chuiquid tapa chështen cuesac uënëstiadtsëcquio icsho bëdanmebued tantiaquin aidbimbuecnuc nuamboshë isadnuc nacnenta, cac matsesën nacnemposh. 15Nacnenacsho issun nidaid ëquëducuësh chobuedën bëdi dapabimbuecquid acte ëquëducuësh chobuedën aton chuiquid tapabimbuecnuc nacnembuedi tibocamianshun oncameposh. Adoaquien nacnembuedquiobi chuiquid tapabimbuec onquequin: Ubi tantiesabotedi cuessun secatan, cac aton chuiquid tapa tantiesabotedi cuessun secatamposh. 16Adshumbic: Acte ëquëducuësh chobued nuquin chuiquid tapan iuabo nuqui nec, quequin nëidtedi siadmeposh. Nëidic chuiquid tapabo. Nëidic chuiquidpenquio. Nëidic dadpen dayun uaquido. Nëidic aton na nibëdquido. Nëidic matses iuabotedi. Nëidic iuapenquio. Aidtedi matses dadpenquio dada uaquin utsi utsien bëtanteteno bësebamquimbi utsi utsien mëdante abiucquio mësebamposh. 17Aden chiacpadec siadambo icquidona bedquin min piucquidbëta mitsana utsi menenda. Aden chiacpadec siadquidonauidtsëqui bedquin meneta, caposh. Utsi utsiec bëdi dapabimbuecquid acte ëquëducuësh chobuedën cuëmëdquid dada uaquin bësiadmiaid neposh. Utsi utsiec aid cuëmëdaidbimbuecquid numedo chuiquin dada uaquin mësiadmiaid neposh.

18Nëmbo cumapenen tantiaquidënuidtsëqui abi cuëmëdquidquio chienquio icquimbi 666 chuiquin dada uaid nec, catsiash. Aden 666 bëdambuen tantiashun matses icsamboshë icmequid chuiquid tapambo cuëmëdquid nec, quequin tantiendac, quequin ismeposhi.

Currently Selected:

Esusën Uan ismiaid 13: mcfNT

Highlight

Copy

Compare