Codinto 2 11

Pabado abimbo chuibanquid icnubi muaquido caid

1Nëbi umbi dada uaid isash: Tantiesa onquiacbimbuen mamënmenu, quequin Pabadon chiec, quequin mibitedishun tantienquio icpashun, caimbi. Adenquio icquin: Mimbi bëdambuen naic, quequin ubi bëdambuen ista. 2Nuquin Papan tantiamiacpadec mibitedi tantiec cudasquidquio nebi. Naden tantiec: Chido bedabicquidën abi bedquid aton bënëuidtsëqui tantiacbimbuen ma Esusuidtsëqui tantiapanu, quequin mibitedi tantiec nebi.#11.2 Aden chiacpaden Oseasën dada uapanëdash. Oseas 2.19-20 isbanta. 3Umbi chuibanac Esuquidistu tantiabuedombi nisi bëdambo isadacbimbuecquidën muaquin chiac Eban Nuquin Papan Chiaid niacquin tantienquio icpampicpaden muaquin chuibanac mimbi Esuquidistu tantienquio yampanundac, quec natiec tsadebi.#11.3 Aden Mayan Icsa Satanasën Eba muaquin icsambuen namiampid istiadquio icquin Ene. 3.1-13 isbanta. 4Adec ubi tsadnubi Codinto yacno choshon utsibon Esuquidistu umbi chuibued utsi uain icsambuen chuibansho badedquio mibitedishun tantiashunec. Adembidi Nuquin Papan Mayampenquio caic: Mayan utsi iquec, quesho tantiash: Ubi mene, mibi quepec. Adembidi, Mibi bëdambo icmequid Esusbimbuecquid utsi iqueque. Aid tantiata, quequin umbi chiaid utsi uain chuisho tantiashun: Abimbo caic, quequin mibitedishun tantiec. Aden utsibon umbi chiondaid utsi uain chuisho tantiec, quesho tantiash Esuquidistu tantienquio yantsiash, quec tsadebi. 5Esuquidistun: Ubi chuibenneta, cac Nuquin Papan tantiamiacpaden chuibennec nebi. Aden chuibennenubi utsibo tsiuec choshon chuibansho tantiash: Bëdambuen chuibanquidquio nec. Aden Pabadon chuibanenquio iccosh, quesho tantiash: Icsambuen chuibanombi, quetiapimbo iquebi. 6Aido bëdambuec onquequin chuibanquid icnubi aid padquidpenquieni nechitec, quebuedi naden bëdambuen tantiembi. Esuquidistun: Ubi chuibenneta, quequin dadpenquio tantiamiacpadombuen mibitedi bëdambuen tantiamiondambi.

7Ma Esuquidistun naid Nuquin Papan Chiaid Bëda tantiapanu, queshun mibitedi chuibanequi: Bec cho ¿quenquio icquindambi icsambuen naponda? 8Ma utsibo Esuquidistu chuibennenu, queshun Esuquidistu tantiec iccuededquid utsibon atona sambededaid bedondambi. Aid bedshumbic mibi yacno nidash tabadquin mibi nashunquin Esuquidistu chuibanondambi. 9Adec mibi yacno tabadquin Esuquidistu chuibanec cuna nibëdnuc: Bec cho, quenquio iccondabi. Nidaid cuëshë Masedonia caid yacnouësh choquidëmbini meniondash. Aden ënden: Bec cho, mibi cainquio iccondacpadembidi nëbi mibi yacno niduash: Bec cho, quenquio ictsiabi. 10Esuquidistu abi iquec, quequin abimbo caimbi. Adembidi min nidaid Acaya caidën Esuquidistu chuibanquin: Piucquid bec cho, cainquio iquendambi. Aden abimbo chuibanquid icsho utsin ubi ënmetiapimbo iquec. 11¿Atotsi quiashini: Bec cho, quenquio icpe? ¿Mibitedi tantienquio icquindambi mibi: Bec cho, cainquio icpe? Codinto yacnocquido Pabadon tantiaquiec, quequin Nuquin Papan tantiec.

12Aden mibi tantiaquin umbi naondacpadombuembidi: Bec cho, cainquiocquin abi Esuquidistu chuibennec nebi. Adnubi: Bëdambuen chuibanquid nec, mimbi caido: Pabadon nacpadombuen nabanec tabadebi, quetiapimbo ictsiash. 13Aido Esuquidistun: Ubi chuibenneta, caid nebi, quec muaquido nec. Adquid icquin muaquin mibi chuibanec. 14¿Aidouidtsëquida muaquid nepec? Aido tantiamequid Mayan Icsa Satanas nec. Aidi Nuquin Papabëd icquidquio bëchamauanquiec isadacbimbuecquid nec. 15Adquid icnuc adquiecbidi ambi namiaidtedi bëdambocquidbimbuec capucuededec. Adquid icbuedi abitedi cuidte uëshë chonoc aidon icsambuen naid chuiquin Nuquin Papan cumapenen cuidendac.

Pabadon abi mëyanaid chuibanaid

16Padpidembuen chuinu. Tantia. ¿Mamënmenuec tantiesa onquiacbimbuendambi umbi naid chuibandio? Utsin aden chuibansho tantianu ¿quepecta mibi ictsia? Adquid tantienquioctsiambi, quebuedi umbi chieshtoenquio icquin nabanaid chuisho tantiata. 17Tantia. Chuiuanu. Nuquin Icbon: Chuita, quequin chiambocnobi tantiesa onquiacbimbuen umbi nabanaid chuinu. 18Bëdambuen naombi, quequin ambi nabanaid utsibo dadpenshun chuibanec, quequin tantiaquin adombuembidi umbi nabanaid chuibanuaimbi. 19Bëdambuen tantiaquidombo mibitedi nec. Padnuen utsibo muaquido mamënmenuec tantiesa onquiacbimbuen ambembi chuisho mibitedishun tantiec. 20Aidon mibi caic: Iuanu. Ubi nashunta, quesho tantiash icsambuen tantiaquidbimbuec mibi iuadte bumpec. Adembidi mibi chiec: Bec cho, quesho icsambuen tantiaquidën nacbimbuen mimbi menebanec. Muaquin chiac: Mibi muaquid nec, quenquio yec mibi tabadec. Mibi icsambuen chuishunquin mamënshunaqui mibi: Padi, quenquio iquec. Aton iuabimbuecnuc mibi mëyanquin tancuesaqui: Min iuapenquio nebi, quenquio mibi iquec. 21Umbien dacuëdquin aden mibi icsa uaquin natiametiapimbo ictsiac.

Mibi iuanuequidon dacuëdenquio icquin ambembi ambi nabanaid chuibanac, quesho tantiashun adombuembidi dacuëdenquio icquin tantiesan chiacbimbuen umbi nabanaid chuibanuaimbi.

22¿Mimbi: Bëdambuen chuiquid nec, caid: Ebedeo cashumbic isadaidbo nebi, quepecta iquec? Aidbidi nebi, caimbi. ¿Abadauanën tsiuecquid nebi, quepecta aido iquec? Adembidi: Aidbidi nebi, cauaimbi. 23¿Esuquidistu chuibanquid nebi, quepecta aido iquec? Ubien Esuquidistun: Ubi chuibenneta, caidquio nec. Adquid icquin aidquio chuibanquidquio nebi. Aden chiec tantiesabimbuec onquec nebi. Utsi bëdiactsëc chonoadnuc ubien cumapenec chonoadquid nec. Adecbidi quënën tsadunaid utsi icnubi quënë utsin utsinquien tsaduntedniaid nebi. Adecbidi utsi bëdiactsëc cacuesaid icnubi iuen cacuesto cacuestoaid nebi. Mëyanac uënëstsenobi, utsi quenubi iuenquio mëyanac uënëstsen uënëstsenondaid nebi. 24Aden 5teden mëyanmequin 39ted icnuc tambanquin isadaidbon cueshcante dapan cacuesmededniondashi. 25Adembidi 3teden shocosh nacnenaid cuesten cuesmededniondashi. Adembidi abentsen cuënoten sesiondashi. Adecbidi ubi antsadtoaid cano dapa bincudec 3tedec mentoadondash. Adquid abentsëc mentoadbon abentsec ushec cano cuëshë bedshun sananec: Mentoadmane, quiash nuadpondabi. 26Adecbidi quenenenquio yec capucuennequin Esuquidistu chuibenniombi. Adec utsi utsiec yacno nëpaëdtiapambocquid acte potec nidtedniondabi. Adecbidi ampeshumënquid icpondash. Adecbidi cun matses isadaidbobi ubi mëyante bunquid icpondash. Adecbidi isadaidpembo adquidbidi icpondash. Shubu dadpen icquid yacno adquidbidi ubi cueste bunquid icpondash. Matses daëdpactsëc yacno adecbidi ubi cueste bunacno capucuenniondabi. Adecbidi acte dapa mad caidën capucuenniondabi. Esuquidistu tantiaquid nebi, quequin muaquin chuiquidën mibi cueste bunec, caqui capucuenniondabi. 27Cuna bednuec iuec chonoadbudec uinmabudtedniondabi. Chieshtomenuen natiamededniondashi. Adecbidi ushenquio yec ushcasmadedniondabi. Adecbidi pete bunec acte bunquiondabi. Adecbidi dashcute utsi dasiuidte nibëdnuc iquenquiondabi.

28Aden mëyanaid icquin umbi chuibenniac Esus tantiabenondaidotedi tantiembi. ¿Ada chieshtoenquio icquin Esus tantiec bëdambuec tabadpec? quequin aido tantiadednembi. 29Esuquidistu tantiaquid nënec daicsabudsho isash aid daicsaidbimbuec uënësquio ictednebi. Esuquidistu tantiaquid icsambuen namiosh, quesho tantiash: Icsambuen namequid cuidpashun, quec chieshec tsadtedniobi.

30Umbi nabanaid bëdambo iquec, quequin chuitiapimbo iquebi. Padenquio icquimbi: Ambembi Pabadon natiapimbo iquec, ma quenu, quequin ubi mëyanondaid dadpen chuibanombi. 31Nuquin Papa Nuquin Icbo Esuquidistun Papan nabanaid ënenquio icquin chuitequidquio nec. Aidëmbi: Muesambo Pabado nec, quequin tantiec. 32Utsitsen muainquio icquin mibi chuinu. Tantia. Shubu dadpen icquid Damasco yacnocquidon chuiquid tapa Adetas cuëmëdquidën chuiquid utsi cobednadod caid icmiaidën: Pabado puduensho bedta, quequin shubu dadpen icquid daquënë uaquin tsicatiaid tapa puduedte shëcuëtedi sondado ëctabëdmepaccondash. 33Adec daquënë uaid puduedte shëcuë cuëman sondado tabadnubi utsibon: Bednushe, queshun abuc quënën icquid iste shëcuënshun tsitsan dapa antsadunshun daquënë uaid cachoc imbudpondashi. Aden imbudac chuiquidën bedadtiapimbo yec cuempondabi.

Currently Selected:

Codinto 2 11: mcfNT

Highlight

Copy

Compare