Codinto 2 12

Nuquin Papan Pabado ushquin isacbimbuecnuc ismiaid

1¿Bëdamboshëcquid nebi, umbi cacta mimbi ubi bëdambuen ispatsia? Padenquio mimbi ictsiac. Aden chienquio icquin Nuquin Papan ubi ismiondaidbëta ambi tantiamiondaid chuinu. Tantia. 2-3Ënden seta 14ted matanmiash Nuquin Papan abucquio abi yacno indoac isondambi. Nuquin Papan dadachobi abuc indopondashi, quetiapimbo iquebi. Tantienquio iquembi. Adecbidi cun mayanuidtsëqui indondash, quetiapimbo icuaibi. Tsaun. Tantienquio iquembi. Nuquin Papambien tantiec. 4Abuc bëdamboshë yacno indoac utsibon tantiacmaid chuisho tantiapondambi. Umbi tantiondaid matsesën chuitiapimbo ictequid niondash. 5Bëdambocquid icsho Nuquin Papan abi yacno indondashi, quetiapimbo iquebi. Natiamiantequid dadpen icnuc uidëmpentsëcquio yec ubembi bëdambo ictiapimbo iquebi, quequin chiec nebi.#12.5 Umbi dada uaquin isquidon: Pabadon: Ubi bëdamboshë iquec, quequin chiec, canushe, quequin Quidiecon onqueten Pabadon dada uaquin “umbi isondaid” quenquio icquin “dadan isondaid” quequin dada uapanëdash. 6Nuquin Papa yacno nidshun umbi isondaid chuibanquin dada uaid issun: Bëdambocquidquio nec, quequin tantianushe, queshun dada uainquio iquembi. Ubi bëdambuec tabadsho isash: Pabado bëdambuec tabadec, quesho tantiash bëdambo ictsiabi. Umbi chuibansho tantiash: Abimbo chuibanquidquio nec, quesho tantiash adecbidi bëdambo ictsiabi. Aden utsin isacmaid umbimbo isondaid chuinu, quequin ambembi chienquio icquin abimbo chuitsiambi. Bëdamboshëcquidquio nec, quequin matsesën tantianushe, queshun aden chienquio iquembi. Umbi chiaid tantiata. Cun dada issun tantiata. Mimbi tantiabued yec mimbi isbued yec quequidini nec. Matses nebi. 7Nuquin Papan abi yacno indoshon dadpenquio ismiondac bëdamboshëcquid nebi, quequin chuinushe, queshun Mayan Icsa Satanasën chomiaidën natiamedednepondashi. Aden natiamiac pinchuquën siadaid nami ëquëduc nidash chiquidtiapimbo yacbimbuec cun dada paëmbo yannec. Bëdanenquio iquec. 8Adec cun dada bëdantiapimbo icsho issun: Ubi bëdanme, Icbo, quequin Nuquin Icbo 3teden chuiuidondambi. 9Adoac naden chuipondashi: Umbi bëdambuen isquin tantiaidquio yec mibi bëdambo iquec. Mimbi natiapimbo icsho issun nadatiambocquid icquin mibi namequiembi, quequin chiac naden tantiembi. Natiambo icmiac natiapimbocquid yequi bëdambo iquebi. Ma Esuquidistun nadatiambocquid icquin ubi namenu, quiash bëdambo iquebi. 10Aden tantiec cun dada icsambo icnubi bëdambo icquin abi Esuquidistu chuibennec capuebi. Icsambuen chuiquin mamënshunaqui abi Esuquidistu chuibennec capuebi. Bunequi adecbidi capuebi. Utsin: Mibi natiamequin ënmembi, caqui adquiecbidi abi Esuquidistu chuibennec capuebi. Utsin natiamequin mëyanaqui adquiecbidi capuebi. Adquid icnuc umbibi natiapimbo icsho issun Nuquin Icbon nadatiambocquin namiac ëntiapimbocquin chuibennec capuebi.

Esuquidistu tantiamenuen chuibanombi, quequin chiaid

11Ubipadquid utsi nibëdec, quequin chienquioctiadquidi tantiesa onquiacbimbuen chiombi. Ubi caic mibitedishun: Bëdambuen chuibanquid nec, cac aden chienquio ictsenombi. Utsin utsinquien: Icsambuen chuichitequien Pabado niosh, canubi mibitedi muaquin chiec: Esuquidistun: Ubi chuibenneta, caid nebi, quec muaquidon ubi dëniactiapimbo iquec. Padnuebi bëdambocqudpenquio nec. 12Natiamiaqui chieshtoenquio icquin Esuquidistu umbi chuibansho mibitedishun tantiapondac. Adembidi Nuquin Papan namiac nadatiambocquin umbi nabansho mibitedishun isbededpondac. Adosho issun Esuquidistun: Ubi chuibenneta, caidquio Pabado nec, quequin chuitiadquidëmbi padenquio mimbi icpondac. 13Esuquidistu tantiec iccuededquid utsibon ubi tantiaquin nashunquin piucquid meniac ¿bedquindambi mibi chieshmedionda? Mibëdi tabadec bunec: Bec cho, quenquio iccondabique. Ubi bëdambuen ista.

Mibi padpiden istannu, quequin chiaid

14Ënden tauambuec nidash mibëdi tabadondabi. Adashic iuecash padpidec mibëdi tabaduapondabi. Adondaidi nëbi padpidec mibi yacno nidendabi. Mibëdi tabadec adecbidi: Bec cho, quenquio iquendabi. Mitsana bunesa nebi. Esuquidistu tantiaquidquio ma icpanu, queshun mibëdi tabadquin chuibanendambi. Aton bacuëbo tantiaquin amën anibëtan pete pemequin bëdambuen dayunuaic. Adoacbimbuen mibi bëdambuen dayun uaquin nashuntiadquio iquebi. 15Adembidi mibitedi tantiec: Ma Esuquidistu tantiaquidombo yampanu, quec chonoadbudec tsësiobudquimbi chuibanendambi. ¿Umbi tantiaidonquiobida mibitedishun ubi tantienquio icpe?

16Ubëd tabadec: Bec cho, quenquio iccondash, quequin mimbi ubi tantiec. Adnubi utsibo: ¿Piucquid bedenquio icpecta Pabado tabadash? Muaquin chuiquin dadpen bedpash icnui, quepec utsibo mibëd icquido. 17Mibitedi mua uaquin bedshunambo iquembi ¿Umbi mibi yacno nidmiaidonda muaquin chuiquin mitsana bedpanëdash? Padenquio. 18Titobëta Esus tantiaquid utsi mibi yacno nidmiondambi. ¿Adoac mibi yacno nidash tabadquinda Titon muaquin mitsana ampediondash? Ma padenquio iccondac. ¿Umbi tantiacpadombuen tantiaquid icquin ubi tabadacpadquiec tabadquidpenquioda niondash?

19Cun utsibo, Pabado chedo icsambuen naquin ampesa nec, mibi ¿camenuendambi dada uaquin chuibampo? Padenquio. Nuquin Papan isnubi mibëtan Esuquidistu tantiaquid icquin mibi aid tantiaquidombo icmenuen chuibanombi. 20Mibi yacno nidshun isac mibitedi bëdambuec tabadenquio icchitotsiash, quequin dacuëdquin umbi tantianubi mimbi: Pabadon ubi chushcanushe, quequin tantiabededtsiash. Mibitedi nadec tabadsho chushcatsiambi. Nëidic chushcananquido. Utsibic utsin na dadpen icsho isash bedte bunec chieshëmënquido. Utsibic nëishëmënquido. Utsibic: Ubiuidtsëqui bëdambo iquebi, quequido. Utsibic utsi icsambuec tabadaid chuinanquido. Utsibic: Utsibo icsaiduidi chuiquido. Utsibic: Ubi bëdambocquid icnubi aid icsambocquid nec, quequido. Utsibic ambi tantiacpadpenquiocquid icsho isash cumapenec cuëdcuededquido. Adoquido icsho chushcatsiambi, quequin chuiquin dada uaic nebi. 21Adecbidi padpidec mibi yacno niduashun adquid icsho issun: Umbi Esuquidistu chuibanondaido nec, quesho Nuquin Papan tantiamiac natiaquiec bëpiumane, queshun dada uaic nebi. Icsambuen nadednequidën ambi icsambuen naid ënabi icsho isash shubimane, queshun dada uaic nebi. Ambi natemaidi naic chudnanquin ambi icsambuen naid ënenquio icquin ambi icsambuen naid utsi dadpen ënenquio icpec, quiash shubiendabi.

Currently Selected:

Codinto 2 12: mcfNT

Highlight

Copy

Compare