Codinto 1 15
15
VIII. UËNËSAIDO UINCUENMETE
(15.1-58)
Esuquidistu uincuenaid
1Tantia, cun utsibo. Esuquidistun: Ubi chuibenneta, caid icquin mibitedi umbi chuibanondaid bëshunenquio icquin tantiadonec tabadta. Umbi Esuquidistu abided cuidadec uënësaid Chiaid Bëda chuibansho tantiashun mimbi tantiabempondac. Adondashun chieshtoenquio icquin aid tantiadonec mibitedi tabadec. 2Adembidi umbi: Esuquidistu abided cuidadec uënëspanëdash, quequin Chiaid Bëda chuibambueduidtsëqui chieshtoenquio icquin tantiadonec tabadash abi yacno mibitedi tabadtequid iquendac. Umbi chuibambuedtedi tantienquio iquequi: Esus tantiaquid nebi, quequin ambembi chuiquido mibitedi ictsiac.
3Umbi tantiabenondaidquiobidi mibitedi tantiamequin chuibanondambi. Nuquin Papan chuiquin dada uamiampicpadec nuquitedi icsambuen naid bedash abided cuidadec Esuquidistu uënëspanëdash.#15.3 Isa. 53.5-12 isbanta. 4Uënësacsho shëcuë nacnenaidën nauedshun bëtashac daëdec ushtanec Nuquin Papan chuiquin dada uamiampicpadequi uincuempanëdash.#15.4 Cuëd. 16.10 isbanta. 5Adshun choquin: Uincuenobi, quequin Petedo Esuquidistun ismepanëdash. Adshumbic abëd icquidotedi ismeuapanëdash. 6Adshumbic abi tantiaquido dadpen 500ted udictsëc iccuededacno choquin: Uincuenobi, quequin Esuquidistun ismeuapanëdash. Aid uincuenacsho isnëdaido dadpen abi tabadnubi utsi utsiec uënësbudniac. 7Adshumbic aton utsi Santiacotsen Esuquidistun ismeuapanëdash. Adshumbic ambi: Ubi chuibenneta, caidotedi ismeuapanëdash. 8Adshumbic aido ismequin nainshun iuecshun ubitsen ismeuapondash. Nëbi bacuë tishec, cacmaidi nëncuenshun tishacbimbuen tsiuecquio ismepondashi. 9Esusën: Ubi chuibenneta, caid utsibo chuiquidquio icnubi ubi adquidpenquio nebi. Adquid icsho Esusën: Ubi chuibenneta, caid nec, ubi cainquio ictiadquidi nec. Esus tantiaquido chieshënquin cuessunnepadennembi. 10Adec ubi icshobi Nuquin Papa bëdambocquid icquin Esus tantiaquid yanmeshun abi bunacpadombuen bëdambuen isquin ubi ambembi nabanmenquio iccoshi. Adenquio icquin Esusën: Ubi chuibenneta, caid utsibon abitedi chuibennenquiocnobi umbimbo cumapenec chonoadquin chuibenniombi. Aden umbi tantiacpaden nainquiocquin Nuquin Papa bëdambocquid icquin nashunac dayacquiocquin chuibenniombi. 11Ubipadquid Esusën: Ubi chuibenneta, caido yec ubitedi bëdambocquido nebi, quenquio icquin utsibobëtan Esuquidistu chuibennesho tantiashun aid tantiaquido mibitedi yampondac.
Matses uënësash uincuente chiaid
12Esuquidistu uënësash uincuempanëdash, quequin ubitedishun chuibannubi ¿atotsi quiash: Uënësash uincuentequid nibëdec, quequin tantiec mibi utsi utsiec onquepe? 13Uënësash uincuentequid nibëdnuc Esuquidistu uincuenenquio ictsempanëdash. 14Esuquidistu uincuenambo icnuc ubitedishun chuibanaid ambembi chuibanaid ictsiandac. Adecbidi: Esus tantiaquid nebi, quequin mimbi tantiaid ambembi chiec onquiaid ictsiandac. 15Adquidtedi icnuc Nuquin Papan Chiaid chuibanquidtedi muaquidquio icuatsiandac. Uënësash uincuentequid nibëdnuc ubitedishun: Nuquin Papan Esuquidistu uincuenmepanëdash, quequin chiaid abipenquio ictsiandac. Uënësash uincuente nibëdnuc Nuquin Papan Esuquidistu uincuenmiaid nibëdtsiandac. 16Uënësash uincuentequid nibëdnuc Esuquidistu uincuenenquio ictsempanëdash. 17Esuquidistu uincuenambo icnuc: Esus tantiaquid nebi, quequin mimbi tantiaid ambembi chiec onquiaid icuatsiandac. Mimbi icsambuen nabanaid tantienquio yec Nuquin Papa bëshunambo ictsiandac. 18Adec bëshunambo icnuc Esuquidistu tantiaquido ënden uënësnëdaido cuidac Nuquin Papa yacno puduedtiapimbo ictsempanëdash. 19Nuquitedi Esus tantiec uënësabi yec tabadquin: Esuquidistun nidaidën tabadshouidi ubi nashunec, quequin tantiaquin cainquido iquequi icsactsëcquio icsho niaidbimbuec nuquitedi ictsiandac.
20Esuquidistu Nuquin Papan abia uincuenmepanëdash, quequin umbi chiaid ma abimbo iqueyoc. Aidba uincuenmeshun ambi tantiacpaden abi tantiaquidotsen abitedimbo uincuenmendac, quequin abimbo chiec nebi. 21Bëyuc dada icquid Adan uënëstequid yanampicpadequi abitedimbo uënëstequid iquec. Adecbidi tsiuec dada icquid Esus uënësash bëyuc uincuennëdacpadecbidi uënësaidotedi uincuenendac. 22Adan uënësnëdacpadecbidi abitedi uënëstequido nec. Adecbidi Esuquidistu uënësash uincuennëdacpadecbidi abitedi uincuentequido nec. 23Ambi tantiacpadombuen Nuquin Papan Esuquidistuba uincuenmepanëdash. Adoshombic Esuquidistu padpidec chonoc abi tantiaquido uënësaido uincuenmendac. 24Adnubi nëid nidaid abichobi nibëdanendac. Mayan Icsa Satanasbëta aton iuabo yec chuiquid tapabo yec nadatiambocquin namequido yec quenuc Esuquidistun abitedimbo dëniaquendac. Adshumbic Nuquin Icbo Esuquidistun aton papa Nuquin Papa chuiquin: Papa, mimbimbo abitedi nameta, caindac. 25Esuquidistun abi chieshënquido abitedimbo ambi dëniacacnobi cuëscaquin matses namendac. 26Adoshombic ënquimbi Esuquidistun abi chieshënquido dëniacquin uënëstequid nibëdquio icmendac. 27Adoacsho abitedishun Icbombo Esuquidistu Nuquin Papan icmendac. Aden Ambi namiaid utsitedi icnubi aidën namiaidpenquio Nuquin Papa nendac.#15.27 Cuëd. 8.6 isbanta. 28Esuquidistu abitedishun Icbombo Nuquin Papan icmendac. Ambi adoaid icshobi aton Mado Nuquin Papan namiaid iquendac. Aden namequid yec Nuquin Papa abentsëcquiobi abitedishun Icbombo iquendac.
29Utsibon abëd icbuedi uënësaid tantiaquin acten mentomepec. ¿Atotsi queshun aden acten mentomepec? Aid uënësaidtsen uincuenmeshun abëdi tabadmendac, quepec. Uincuentequid nibëdnuc ¿atotsi queshun aidon acten mentomepatsiash? 30Ënenquio icquin ubitedi chuibanquido icsho cuessunnete utsibo cumapenec buncuededpec. Adoaqui ¿atotsi quequimbimbi: Uënësash uincuentequid iquec, quequin ubitedishun chuibampe? 31Cun utsibo, badiadquidën badiadquidënquien ubi cuessunnete utsibo bunec, quequin abimbo chiec nebi. Adembidi abimbo chuiquin: Nuquin Icbo Esuquidistu tantiaquid yanondash, quequin mibitedi tantiec: Bëdambo iquebi, quec cuishonquec tsadebi. 32Epeso yacnoshon chuibansho chieshënquin ubitedi bëdi tëbuchoquidën icsa uatsenondashi. ¿Ambembi chuibanquidtabi nedi? Adquid icquin chuiquin ëntsenondambi. Adecbidi uincuente nibëdnuc matsesën chiacpaden: Badiadash uënësash nibëdquiec iquebi, quequin tantiaquin nua peshun nua acte paë uaid aquembi, quequin chuitsenombi.#15.32 Isa. 22.13 isbanta.
33Mua uadenda. Matsesën chiaid nad iquec: Icsambuen naic tabadquidobëtan nabanquin bëdambuen nabanaid ënendac, quequin chuipanëdash. 34Padpidembuen mimbi icsambuen tantiaid ënquin bëdambuen chiaidquio tantiaquin bëdambuen tantiauata. Mibitedi utsi utsiec Nuquin Papa tantienquio yec tabadsho: Ma dacuëdnu, quequin chiec nebi.
¿Mitsipadec uënësaido uincuempec? quequin chiaid
35Utsin ubi chuiquin: ¿Mitsipadec uënësaidi uincuempec? quenubi utsi: ¿Mitsipadquio uincuenaidën dada icpec? quequin chuipec. 36Aden chiaid tantienquio icquidën chiaid nec. Mimbi tiedën chococaid cute ëshë aton nami chodquiash napi dëyuctequid iquec. 37Mimbi tiedën chococaid utsi utsiec iquec. Aden chococainquio icquin pete tidico caid ëshë secaid dëyuctequid iquec. Adnubi pete ëshë utsi siaid dëyuctequidbidi iquec. 38Aden Nuquin Papan ambi tantiacpadembi pete ëshë dëyucmequin aton dada yacpadembi canimec. 39Ambi uaidtedi dada utsi utsiec iquec. Matsesën dada utsi iquec. Abi padquidquiobidi nidaidën icquid nëishtedi iquec. Abi padquidquiobidi podon shucquec capuquidted icuaic. Abi padquidquiobidi acten icquidtedi icuaic. 40Abuc tabëcaid utsi utsiec dada icnubi nidaidën icquid utsi utsiec dada iquec. Aden abuc tabëcaidën dada chënquequid utsi utsiec bëdamboshë isadnubi nidaidën icquidtedi bëdamboshëbidi isaduaic. 41Badiadën uëshë cumapenquiec chënquequid icnubi inchëshën uëshë dauebudquio chënquec. Uispa dadpen icquid utsi utsiec bedquec cumapenquiec chënquequid icquid icnubi utsi utisec bedquec bëdiadtsëc chënquequid iquec.
42Adquiecbidi matses uënësash uincuentequid iquec. Uënësacsho chococac nami chodquec. Adec nami chodquiacsho Nuquin Papan uincuemequin dada chuca uac chodquesa yanendac. 43Matses uënësacsho chococaid icsambo pisadec. Aton dada chococaid yec uidëmpentsëcquio iquec. Uënësaid uincuenmiac bëdamboshë yec uidënquio iquendac. 44Nidaidën icquid yec matses uënësacsho aton dada chococatequid nec. Adoacsho uincuenmiaid yec Nuquin Papan Mayanën namiaid yec uënësesa iquendac.#15.44 Nuquin dada uincuenaid Esusën dada uincuenacbimbuecquid nendac.
45Nuquin Papan naden chuiquin dada uamepampic: Bëyuc dada icquid Adan caidba tiboquequid yanmepampic, quequin chuipampic. Adanën tsiuec chomiaid Esuquidistu nec. Aidëmbi abi tantiaquid uënësacsho uincuemeshun Aton Mayanën uënësesa icmendac.#15.45 Ene. 2.7 isbanta. 46Bëyuc matses uaid aton dada icquid nec. Adshumbic tsiuec aton mayan uënësesa icmiaid nec. 47Bëyuc matses uaid dada nidaid putu nacnenaid yec nidaidën tabadtequid nepampic. Aidën tsiuec choquid dada abucuësh choquid Nuquin Icbo nec. 48Nidaid putu nacnenshun dada icmianampicpadequi nidaidën tabadquid matses abitedi aidën dadabimbuecquid nec. Abucuësh choquid Esuquidistu uincuenaidën dadabimbuec Nuquin Papa yacno tabadtequidon dada iquendac. 49Nidaid putu bedshun matses uaid isadacbimbuec isadquido nuquitedi nec. Adecbidi Nuquin Papan abucshun chomiaid isadacbimbuec nuquitedi isadendac.
50Tantia, cun utsibo. Matses yec dada namibëd intacchoquid icnuc Nuquin Papan namiacno tabadtiapimbo iquendac. Uënësash aton dada chodquetequid icnuc Nuquin Papa yacno tabadtiapimbo iquendac.
51Nuquin Papan ambi matses tantiamenquio icpampidi mibi chuinu. Tantia. Esus tantiaquid abitedi uënësenquio iquendac. Adec uënësenquio yec nuquitedi abi tantiaquido icsho dada chuca uaquin uënësesa Nuquin Papan icmendac. 52Ambi namiaidën abucshun ënquin shoncanubi ëshë badedquio bëchicquetanacbimbuec badedquio uënësaidotedi uincuenendac. Adash padpidec uënësenquio iquendac. Nuquitedi dada chuca uaquin uënësesa Nuquin Papan icmendac. 53Nuquin dada chodquetequid icbuedi chodquesa yanendac. Nuquin dada uënëstequid icbuedi uënësesa yanendac. 54Adtequid chuiquin Nuquin Papan dada uamiampid nad iquec:
Chieshëmënquid dëniacquin cuessunniacbimbuen
Uënëstequid nibëdanmendac.#15.54 Isa. 25.8 isbanta.
55Adquid icmian ¿mitsimbo uënëstequid istuidpec? Aid dëniacac nibëdquiec. Adembidi ¿mitsimbo uënësmiantequidën chishpi istuidpec? Aid chicac nibëdquiec,#15.55 Oseas 13.14 isbanta.
quequin chuipampic. 56Icsambuen nabanaid uënësmiantequidën chishpibimbuecquid nec. Nuquin Papan: Naden nata, quequin chiaid niacquid yanash icsambuen natequid yampampic. 57Adquid icsho issun Nuquin Papan namiacpadec abided cuidadquin dëniacshun Nuquin Icbo Esuquidistunuidtsëqui nuquitedi icsambuen naisabimbuecnuc bëdambuen isendac. Adquid icsho: Nuquin Papa bëdamboshë iquec, canuna.
58Cun utsibo, umbi tantiaido icsho mibitedi chuinu. Umbi chuibambued utsi uainquiocquin tantiec chieshtoenquio yec chonoadbudec tabadquin Nuquin Icbo Esuquidistu ënenquio icquin nashunec tabadta. Nuquin Icbo Esuquidistubëd abentsëc yacbimbuec tabadquin nabanec chonoadaid ambembi nabanaidpenquio nec, quequin mimbi tantiec.
Currently Selected:
Codinto 1 15: mcfNT
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
