Codinto 1 16
16
IX. ËNQUIMBI CHIAID
(16.1-24)
Esus tantiaquid utsibo menenun piucquid sambededte chiaid
1Edusaden yacnocquido Nuquin Papa tantiaquido menenun mimbi piucquid sambededaid chuinu. Nidaid cuëshë Cadasia caid yacnocquid Esus tantiaquido umbi dada uaquin chuibanondacpadombuen mimbitsen nabanta. 2Dominco uëshën uëshënquien mimbi bedbanaidtedi tantiaquin abentsëcshun abentsëcshunquien sambededta. Chonoadquin daëdpactsëc bedquidën daëdpactsëc dayun uanubi piucquid dadpen bedquidën dadpen sandoshon dayun uata. Adoshon dayun uaid sambededshun bedbanash ubi chosho isash: Piucquid sambedednuna, quenquio mibitedi iquendac. 3Mibi yacno ubitsen nidshun Esus tantiaquido mimbi: Nëidtedi nidec, quequin chiaido icsho Edusaden yacno nidmequin: Umbi nidmiaido bëdambuen ista, quequin chuiquin dada uaidbëta mimbi piucquid sambededaid: Ma buannu, queshun menendambi. 4Mimbi: Aidobëd nidtan, cac: Ubitsen nidnu, quiash adecbidi aidobëdi nidtsiabi.
Pabadon abi nidte tantiaquin chiaid
5Nidaid cuëshë Masedonia caid matambidanec nidequi shubu dadpen icquid Codinto yacno nidendabi. 6Adash: Isbidannu, quebuedi iuec mibëd tabadash iquenuanquid ënëdan: Utsi yacno nidnu, quesho mibi bunacpaden ubi nashunquin mimbi piucquid menendac. 7Nëbi mibi yacno ushenquio icquin isbidantiapimbo iquebi, quiash mibi yacno nidenquio iquendabi. Iuecash Nuquin Icbon tantiacpadec mibëd iuec tabadnush nidtanendabi. 8Shubu dadpen icquid Epeso yacno isadaidbon aton tiedën caniquid tidico caid bedaid tantiate uëshën cuishonquec tabadaid pentecostes caid choacnobi cuësquec iquendabi. 9Ambo Nuquin Papan Chiaid tantianu, quequid dadpen iquec. Adsho badedbadedquien: Ma tantianu, queshun Esuquidistu chuibansho tantiaquid icnubi utsibo ubi chieshënquido nëmbo dadpen iquec.
10Mibi yacno Timoteo nideque. Nidacsho bëdambuen ista. Ubipadquid yec Nuquin Icbon namiaidquiobidi Timoteo nec. 11Adquid icsho: ¿Ubëd icquidta nedic? quequin chieshënenquio icquin iuedta. Adoac aidi: Ambo nidnu, quesho bëdambuen isquin nashunta. Ma ubi isec chono. Esus tantiaquid utsibobëd Timoteo chosho isnuen cainec tabadebique.
12Nëbi nuquin utsi Apodo cain: Esus tantiaquid utsibobëtan ma mibitedi istannu, queshun Apodo iuen chuiuidombi. Aden chiaqui: Nëbi nidte bunenquio iquebi, quiosh. Iuecash istante bunec aidi mibi yacno nidendac.
Naden nac bëdambo ictsiash, quequin chiaid
13Icsamane, queshun isucunacbimbuen chieshtoenquio icquin Esus tantiaquidquio icta. Adecbidi natiamiantequid icnuc dacuëdenquio yec chieshtoenquio yec tabadta. 14Utsibobëd tantiananec tabadquin mimbi nabanaid bëdambuen nabanta.
15Cun utsibo, nidaid Acaya caid yacnocquid Estepanas aton shubun icquidobëd abia Esus tantiaquido yanaccondash, quequin mibitedishun tantiec. Adquid yanshun Esus tantiaquid utsibo tantiaquin nashumbanquido nebi, queshun aidon nashumbanec. 16Aidon chiacpaden nabanec mibitedi tabadta. Adembidi aidon nabanacpadembidi Esus tantiaquid utsibo tantiaquin nashumbanec tabadta.
17Estepanas yec Podtunato yec Acaico yec quec choacsho isash bëdambo iquebi. Mibitedi ubëd ictiapimbocnobi aido chochosho isash bëdambo iccobi. 18Mibitedi bëdambo icmebocpadombuembidi aidon nashunquin bëdambo icmioshi. Aidopadquid utsi icsho issun aidën chiacpaden nabanta.
Esus tantiaquidon mibitedi tantiec, queshumbic ënquin chiaid
19Nidaid cuëshë Asia caidën icquid Esus tantiec iccuededquid utsi utsiec yacnocquidon: Mibitedi tantiembi, quequin chuita, cac mibitedi chiec nebi. Adembidi Aquidan aton chido Pisidabëtan aton shubu yacnoshon Nuquin Icbo tantiec iccuededquidon: Aido tantiaquiembi, quequin chuita, cac chiec nebi. 20Adembidi Esus tantiaquid utsibotedishun: Mibi tantiembi, quequin chiosh. Aden Esus tantiaquido icquin mibi padquid utsibo chuiquin: Mibitedi tantiembi, cabanta.
21Nëbi cun mëdanten: Mibitedi tantiembi, quequin umbimbo nëiduidtsëqui dada uaic nebi.
22Matses Nuquin Icbo tantiesa icsho ma Nuquin Papan aidi cuidquiopanuna, quequin chiondambi. Cun Icbo, cho, capombi.
23Ma Nuquin Icbo Esusën mibitedi bëdambuen isquin bëdambo icmepanuna.
24Nuquin Icbo Esuquidistubëd abentsëc yacbimbuec tabadquido icsho umbi ënenquio icquin tantiaido mibitedi nec. Amen.
Aidted chuiquin dada uaombi.
Currently Selected:
Codinto 1 16: mcfNT
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
