Han Kãme 9
9
Saulo tỹ Jesus ki rã
(Hk 22.6-16; 26.12-18)
1Hã ra Saulo tóg ver ũ tỹ ẽg Senhor tỹ Jesus mré mũ mũ ag vóg kónãn sór mũ. Ag to tóg krĩ rỹ nĩ ver. Ti tỹ ag kãgtén sór vẽ. Hã to tóg Topẽ tũ to pã'i mág venh tĩ mũ. 2Kỹ tóg ti mỹ vẽnh rá to vĩ mũ, ti tỹ ẽmã tỹ Damasco ra tĩg jé. Tá tóg vẽnh rá ẽn tỹ pã'i ag mỹ ven sór mũ, ag tỹ ti mỹ: “ha ag venh tĩg,” he jé. Ti tỹ Jesus mré ke ũ ve kỹ se sór vẽ. Jerusalém ra tóg ag tatĩ tĩg sór mũ, ti tỹ ũn sigség mũ ag, fag ke gé. 3Hã jé tóg Damasco ra tĩ mũ. Ti tỹ to hã tĩ ra vãhã jẽngrẽ tar tóg vẽnh ven mũ, kanhkã tá. Rã kãfór tóg nĩ, hã ra tóg Saulo ki kómkóm ke mũ sir. 4Kỹ tóg kutẽ mũ, ga kri. Kỹ tóg vẽnh vĩ mẽg mũ. Kỹ tóg: “Saulo', Saulo',” he mũ. “Ã tỹ ne jé isũ ag vóg kónãn nẽ?“ he tóg, vẽnh vĩ ti.
5Kỹ Saulo tóg ẽg Senhor ti mỹ: “ã tỹ ũ nĩ?“ he mũ.
Kỹ tóg ti mỹ: “tỹ sóg Jesus nĩ, ã tỹ ũn vóg kónãn sór tĩ ẽn vỹ tỹ inh nĩ,” he mũ. 6“Jẽgnẽ ra, ẽmã tag ki rã, tá ũ tóg ã mỹ tónh mũ, ã tỹ nén han ke ti,” he tóg.
7Ti mré mũ ag vỹ vẽnh vĩ tag mẽg mũ gé, hã ra ag tóg nén ũ vég tũ nĩ. Kỹ ag tóg jũrũn ke mũ. 8Kỹ Saulo tóg jẽgnẽ mũ sir. Kỹ tóg tã mĩ ẽvãnh sór mũ, hã ra tóg nén ũ vég tũ nĩ. Kỹ ag tóg ti nĩgé kãgmĩ kỹ ti pére mũ mũ, ẽmã ẽn ra. 9Kurã tãgtũ ki tóg ẽvãnh tũ nĩ, kỹ tóg jẽg tũ nĩ gé, kron tũ ti nĩ gé.
10 Damasco tá ke ũ tóg nĩ nĩ, ti jiji hã vỹ: Ananias, he mũ. Jesus mré ke ũ vẽ. Kỹ Jesus tóg ti mỹ vẽnh ven mũ. Kỹ tóg: “Ananias',” he mũ.
Kỹ Ananias tóg ẽg Senhor ti mỹ: “inh hã vẽ,” he mũ.
11Kỹ Jesus tóg ti mỹ: “ẽpry kuryj he mũ ẽn ra tĩg,” he mũ. “Judas he mũ ẽn ĩn kã ra rã. Tá ũ tóg nĩ nĩ, ti jiji hã vỹ: Saulo, he mũ. Ẽmã tỹ Tarso tá ke vẽ. Ẽn mré vĩm nĩ,” he tóg. “Ha vé, inh mré tóg vĩ nĩ nĩ. 12Kỹ tóg ũ vég nĩ nĩ, ti jiji hã vỹ: Ananias, he mũ. Ã hã vẽ. Ã tỹ ti ĩn kã ra rãnh ke vẽ. Ã tỹ ã nĩgé tỹ ti mẽnh ke vẽ. Kỹ tóg ve mãn ke mũ. Tag vég tóg nĩ nĩ,” he tóg, Ananias mỹ.
13Kỹ tóg ẽg Senhor ti mỹ: “vẽnh kar tóg ti kãmén tĩ hã ra, ã tỹ inh mỹ ũ tó mũ tag ti,” he mũ. “Jerusalém tá tóg ã tũ ag vóg kónãn. 14Kỹ tóg vẽnh rá ma kãtĩ mũ, Topẽ tũ to pã'i mág tỹ ti mỹ han kỹ. Kỹ tóg ũ tỹ ã mré vĩ mũ kar sigse sór mũ, ẽmã tag ki,” he tóg, Ananias ti.
15Hã ra tóg: “ti venh tĩg,” he mũ. “Ti kuprẽg isóg, ti tỹ ijiji tó jé, fóg ag kar mỹ, kanhgág ag kar mỹ ke gé, povo tỹ Israel ag mỹ ke gé,” he tóg. 16“Isugrĩn tóg jagtar ke mũ, ha vem nĩ,” he tóg.
17Kỹ Ananias tóg tĩ mũ. Ti tỹ ĩn ẽn tá jun kỹ tóg ti nĩgé tỹ ti mẽg mũ, kỹ tóg ti mỹ: “Saulo', régre', ẽg Senhor vỹ inh jẽnẽ, Jesus ti, sỹ ã ve jé,” he mũ. “Ti ve ã mỹr, ẽpry kri, ã tỹ tag ki jun mũn kã. Hã kỹ sóg kãtĩ mũ, ã tỹ ve mãn jé, Topẽ kuprĩg tỹ tỹ ã jagrẽ nĩ jé,” he tóg.
18Kỹ tóg vãhã ti kanẽ kã tá kãpa mũ, pirã fár ri ke. Kỹ tóg ve há' he mãn mũ sir. Kỹ tóg jẽgnẽ mũ sir. Kỹ tóg ti kypég mũ sir, Ananias ti. 19Kỹ tóg jẽg mũ gé sir. Kỹ tóg vãhã tar' he mũ sir. Damasco tá tóg nĩ nĩ ver, Jesus mré mũ tĩ ag mré. 20Kỹ tóg vẽsỹmér Jesus kãmén mũ, Judeu ag vẽnh kanhrãn jafã krẽm. “Tỹ tóg Topẽ kósin nĩ,” he tóg mũ vãhã, Jesus to. 21Ũ tỹ ti vĩ mẽg mũ kar ag mỹ tóg e tĩ. “Jerusalém tá tóg ag vóg kónãn tĩ, ũ tỹ Jesus tó mũ ag. Kỹ tóg tag ki jun mũ gé, ag sigse jé, ti tỹ Topẽ tũ to pã'i mág ag mỹ ag tatĩ tĩg jé,” he ag tóg, Saulo to.
22Hã ra tóg fe tar nĩ. Kỹ tóg Judeu ag kanhrãn mũ, ẽmã tỹ Damasco tá. Ag mỹ tóg Jesus kãmén mũ. “Tỹ tóg Cristo nĩ, Jesus ti,” he tóg. Kỹ tóg ag tỹ ti vĩ kafãn sór mũ ra ag mỹ vẽnh mỹ tĩ sir.
Saulo tỹ Jerusalém ra tĩg
23Kurã tỹ hẽn ri ke tũg kỹ Judeu ag tóg kejẽn jagnẽ mré Saulo tén ke to jykrén mũ. 24Hã ra Saulo tóg mẽg mũ. Ẽmã ẽn to ró jãnkã tá ag tóg vãjig nỹtĩ, ti jo, kurã kar ki, kuty kar ki ke gé, ag tỹ tá ti tén jé. 25Kỹ ti mré ke ag vỹ kejẽn kuty ũ kã kẽj kã kã ti nĩm kỹ ti térem mũ, ẽmã ẽn to ró to, ti kren han jé. Kỹ tóg vãhã Jerusalém ra tĩ mũ sir.
26Ti tỹ tá jun kỹ tóg Jesus mré ke ag mré nĩ sór mũ. Hã ra ag tóg ti kamẽg mũ. “Ti ón hỹn,” he ag tóg ti to, ti tỹ ag vóg kónãn ja nĩn kỹ. 27Kỹ Barnabé tóg ti mré vĩ kỹ Jesus tỹ ũn vin mũ ag to ti pére tĩ mũ. Kỹ tóg ag mỹ ti tỹ Jesus ve ja ẽn kãmén mũ, ẽpry kri. “Kar kỹ tóg Damasco tá ke ag mỹ Jesus kãmén ja nĩ gé, ti tỹ mũmẽg tũ nĩn kỹ,” he tóg. Kỹ tóg ag mỹ sér tĩ sir. 28Kỹ Saulo tóg ag mré tĩ nĩ, Jerusalém tá. Tá tóg Jesus kãmén mũ gé, ti tỹ mũmẽg tũ nĩn kỹ.
29Kỹ tóg Judeu ag mré vĩ mũ gé, ũ tỹ Grego vĩ tó tĩ ag mré ke gé. Ag tỹ ti vĩ kafãn kỹ tóg ag mré vĩ mũ. Kỹ ag tóg ti tén ke to jykrén mũ. 30Kỹ Jesus mré ke ag tóg mẽg mũ gé. Kỹ ag tóg ẽmã tỹ Cesaréia ra ti pére mũ mũ. Tá junjun kỹ ag tóg ẽmã tỹ Tarso ra ti jẽnẽg mũ, ti jamã ra.
31Jãvo Jesus ki ge kỹ nỹtĩ ag kar vỹ jatun mỹ nỹtĩ nĩ sir, ga tỹ Judéia tá, ga tỹ Galiléia tá ke gé, ga tỹ Samaria tá ke gé. Kỹ ag tóg jatun mỹ vẽnh kanhrãn mũ, Topẽ jykre tỹ. Topẽ vĩ ki ag tóg króm mũ. Topẽ kuprĩg vỹ ag krĩn mũ. Kỹ ag krĩ vỹ kãnhvy' he mũ. Kỹ ũn e ag tóg Jesus ki ge mũ gé sir, fag mré hã.
Enéias
32Kejẽn Pedro tóg vẽnh kar ag vigvenh tĩ mũ. Kỹ tóg ẽmã tỹ Lida ra tĩ mũ gé, tá Topẽ tũ ag vigve jé. 33Tá ũ tóg nỹ nĩ, ti jijin hã vỹ: Enéias, he mũ. Kãnhgrĩn kỹ tóg nỹ nĩ. 8 anos (ke) han tóg, kãnhgrĩn kỹ nỹ ki.
34Kỹ Pedro tóg ti mỹ: “Enéias', Jesus Cristo vỹ ã han. Jẽgnẽ ra, ã nỹg ja fi han ra,” he mũ.
35Kỹ tóg vẽsỹmér jẽgnẽ mũ. Kỹ Lida tá ke kar ag vỹ ti vég mũ, ẽmã tỹ Sarona tá ke kar ag ke gé. Kỹ ag tóg ti ve kỹ Jesus ki ge mũ gé sir.
Dorcas fi
36Ẽmã tỹ Jope tá ũ fi tóg nĩ nĩ, Jesus mré ke ũ fi, fi jiji hã vỹ: Tabita, he mũ, hã vỹ: Dorcas, he mũ, fóg tỹ Grego vĩn ki. Ẽn fi hã vỹ nén há kar han mũ. Ũn jagtar fag mỹ fi tóg nén ũ vin tĩ.
37Kejẽn fi tóg kaga mũ, kỹ fi tóg ter mũ sir. Kỹ fag tóg fi kype kỹ ĩn to jãpry jafã tá fi fig mũ, kynhmỹ.
38Jo Jope tóg Lida to hã nĩ, hã ra Pedro tóg Lida tá nĩ nĩ. Kỹ Jope tá ke ag tóg ti ki kanhró nỹtĩ.
Kỹ ag tóg ũn régre ag jẽgnẽg mũ, ag tỹ ti mỹ: “kur kãtĩg mẽ han,” he jé. 39Kỹ tóg vẽsỹmér tĩ mũ. Kỹ tóg tá jun mũ. Hã ra Dorcas fi tóg ĩn to jãpry jafã tá nỹ nĩ. Pedro jun kỹ ag tóg ĩn to jãpry jafã to jãpry mũ, ti mré. Kỹ ũn mén ter ja ẽn fag kar vỹ ti to kãmũ mũ. Kygfỹ kỹ fag tóg ti mỹ fag kur venven mũ, camisa, vestido ke gé, Dorcas fi tỹ fag mỹ kugrỹn ja ẽn ti.
40Kỹ Pedro tóg vẽnh kar mỹ: “ha pa jẽg,” he mũ. Kỹ tóg ti jakrĩ tỹ jẽg kỹ Topẽ mré vĩ mũ. Kỹ tóg vẽser fi mỹ: “Tabita', nĩ ra,” he mũ. Kỹ fi tóg mrin ke mũ. Kỹ fi tóg nĩ mũ, fi tỹ Pedro ven kỹ. 41Kỹ tóg fi nĩgé kãgmĩ kỹ fi fẽg mũ. Kỹ tóg vẽnh kar jé prẽr mũ, Topẽ tũ kar, ũn mén ter ja ẽn fag mré hã. Kỹ tóg fag mỹ fi ven mũ.
42Kỹ Jope tá ke kar ag vỹ mẽg mũ sir, fi rĩr mãn ẽn ti. Kỹ ũ tỹ hẽn ri ke ag vỹ Jesus ki ge mũ sir, fag ke gé.
43Kỹ Pedro tóg ẽmã tỹ Jope tá nĩ nĩ ver, Simão he mũ ẽn mré, ũ tỹ nén fár tỹ tãnãj he tĩ ẽn mré.
Currently Selected:
Han Kãme 9: kgp
Highlight
Share
Compare
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
