Han Kãme 8
8
Saulo tỹ ag vóg kónãn
1Jãvo tóg Saulo ẽn mỹ há tĩ, ag tỹ ti tén kỹ. Kurã ẽn kã ag tóg Jesus ki ge kỹ nỹtĩ kar vóg kónãn jagy han mũ, Jerusalém tá. Kỹ ag tóg jagtar tãvĩ nỹtĩ. Kỹ ag tóg vẽnh kãpugpóv kãn mũ sir. Ga tỹ Judéia kar mĩ ag tóg mũ mũ, ga tỹ Samaria mĩ ke gé.
2Ũ tỹ Topẽ ki ge kỹ nỹtĩ ag tóg fe kaj nỹtĩ, Estêvão ter kỹ. Kỹ ag tóg kygfỹ mág kỹ ti kénh mũ.
3Hã ra Saulo tóg Jesus ki ge kỹ nỹtĩ kar ag vóg kónãn jagy han mũ. Ti tỹ ag tũg sór vẽ. Hã jé tóg ĩn kar kã ra rã tĩ. Ti tỹ Jesus ki rã kỹ jẽ ũ ven kỹ tóg vẽse ja kã tá ti fón tĩ, ũn gré ag, ũn tỹtá fag ke gé.
Samaria tá Topẽ vĩ tó
4Ũ tỹ vẽnh kãpugpóv mũ ẽn ag vỹ vẽnh kar mỹ vẽnh vĩ sér tugtó mũgtĩ, Topẽ vĩ ti. 5Kỹ Filipe tóg tĩ mũ gé. Ga tỹ Samaria ra tóg tĩ mũ, kỹ tóg ẽmã ũ ki ra mũ, Cristo kãmén jé. 6Kỹ vẽnh kar tóg ti vĩ mẽgmẽg mũ. Jẽmẽ há han ag tóg mũ, Filipe vĩ ti. Hã ra tóg ẽg tỹ nén han vãnh hynhan mũ gé. 7Vẽjagrẽ kórég tỹ hẽn ri ke pan tóg mũ. Ti tỹ ag pan kỹ ag tóg jamã há ra prẽr mũ, kỹ ag tóg kãpa mũ. Ũn kãnhgrĩ ag tỹ há' he tóg mũ, ũn vagvá ag tỹ ke gé. 8Kỹ tóg vẽnh kar mỹ sér tĩ sir, ẽmã ẽn tá.
9Hã ra tá ke ũ tóg nĩ nĩ, ti jiji hã vỹ, Simão he mũ. Kujá vẽ, kỹ tóg nén vẽnh mỹ hynhan tĩgtĩ. Kỹ tóg ag tỹ ti tỹ nén han mũ ve kỹ ag mỹ e tĩ. Vẽso tóg: “ag kãfór inh nĩ,” he tĩ, ag tỹ ti kamẽg jé. 10Hã kỹ vẽnh kar tóg ti kamẽg tĩ sir. Ti to ag tóg: “Topẽ jykre han tóg tĩgtĩ, Topẽ jykre mág pẽ ẽn,” he tĩ. 11Kysã tỹ hẽn ri ke ki tóg nén vẽnh mỹ hynhan tĩ, kỹ tóg vẽnh kar mỹ e tĩ, hã kỹ ag tóg ti kamẽg tĩ sir, kujá ẽn ti.
12Vãhã ag tóg Filipe vĩ kri fig mũ, ti tỹ Jesus Cristo tón kỹ. Topẽ tỹ tỹ ẽg pã'i nĩ kãmén tóg mũ. Kỹ tóg ũ tỹ ti vĩ kri fig mũ ag kygpég mũ, fag ke gé. 13Kỹ Simão ẽn tóg ti vĩ kri fig mũ gé. Kỹ Filipe tóg ti kypég mũ gé. Kỹ tóg ti mré nĩ nĩ. Kỹ tóg Filipe tỹ ẽg tỹ nén han vãnh hynhan mũ vég mũ, Topẽ jykre tỹ. Kỹ tóg ti mỹ e tãvĩ tĩ sir.
14Kỹ vãhã Jesus tỹ ũn vin mũ ag tóg kejẽn mẽg mũ, Samaria tá ke ag tỹ Topẽ vĩ kri fig mũ ẽn ti. Jerusalém tá ag tóg mẽg mũ, kỹ ag tóg João mré Pedro jẽnẽg mũ, ag tỹ ve jé. 15Pedro ag tỹ tá junjun kỹ ag tóg ag to Topẽ mré vĩ mũ, Topẽ tỹ ti kuprĩg tỹ ag jagrẽn jé. 16Tá ke ũ tóg tỹ jagrẽ tũ ja nĩ ver. Kygpe kỹ ag nỹtĩ inhhã, Jesus jiji tó kỹ, ẽg Senhor jiji tó kỹ. 17Kỹ Pedro ag tóg ag nĩgé tỹ ag mẽgmẽg mũ, kỹ Topẽ kuprĩg tóg ag kã ra rã mũ sir.
18Hã ra Simão tóg vég mũ. Kỹ tóg Pedro ag mỹ jãnkamy ven mũ. 19Kỹ tóg ag mỹ: “inh mỹ vẽjykre tag nĩm nĩ, jãnkamy tag to, sỹ ũ mẽ kỹ Topẽ kuprĩg tỹ ag kã ra rã jé. Sỹ tag venh há tóg tĩ,” he mũ.
20Hã ra Pedro tóg ti mỹ: “ã jãnkamy mré ã nũgme ki kutẽnh mũ. Topẽ tỹ nĩm ja vẽ mỹr, hã ra ã tóg jãnkamy to mãn sór mũ,” he mũ. 21“Ã pijé Topẽ jykre tag ki kanhró nĩ', kỹ Topẽ tóg ã mỹ nĩm ke tũ nĩ. Ã jykre pijé kuryj nỹ', Topẽ mỹ. 22-23Fe kórég tãvĩ ã nĩ mỹr. Ã jykre pãno tag tovãnh ra. Topẽ mré vĩ. Hẽn ri ke mũn tóg ã mỹ vẽnh pãte fón mũ,” he tóg, Pedro ti.
24Kỹ Simão tóg ti mỹ: “iso Topẽ mré vĩ, inh jagtar jẽ tũ nĩ jé, ã tỹ inh mỹ tó mũ tag ti,” he mũ.
25Hã ra Pedro ag tóg mũ mãn mũ gé, ag tỹ ẽg Senhor tỹ Jesus vĩ tó kar kỹ. Ag tỹ nén ve ja ẽn tó kãn ag tóg, Jesus tỹ nén han ja ti. Kỹ ag tóg Jerusalém ra vỹnvỹn ke mũ sir. Ag mũn kỹ ag tóg ga tỹ Samaria mĩ Topẽ vĩ sér ẽn tugtó mũ gé.
Filipe tỹ ũ kype
26Hã ra Topẽ tỹ jẽnẽ jafã tóg Filipe mỹ: “kanhkã fyr ra tĩg, ẽpry jagma tĩg,” he mũ. “Jerusalém tán kãtĩ, Gaza mĩ, hã ra tóg ẽmã tũ mĩ kutẽ mũ. Ẽpry ẽn jagma tĩg,” he tóg mũ.
Kỹ tóg tĩ mũ sir. 27Tá jun kỹ tóg ga tỹ Etiópia tá fóg vég mũ. Pã'i mág tỹ Candace fi mỹ rãnhrãj tĩ vẽ, hã kỹ tóg kurĩ nĩ. Fi tỹ nén kar vég tóg tĩ. Jerusalém ra tóg tĩg ja nĩ. Tá tóg Topẽ mỹ fénhta ve ja nĩ. 28Hã ra tóg ti jamã ra vỹn ke mũ sir, karósa kã mĩ. Tĩg kỹ tóg Topẽ vĩ to ke mũ, Isaías tỹ rá ẽn ti.
29Kỹ Topẽ kuprĩg tóg Filipe mỹ: “karósa ẽn kukãm tĩg,” he mũ. 30Kỹ Filipe tóg fũrũn tĩ mũ, kỹ tóg ti tỹ vẽnh rá to ke mẽg mũ, Isaías tỹ rá ẽn to. Kỹ tóg ti mỹ: “ã mỹ ã tỹ nén to ke mũ tag ki kanhró nĩ'?“ he mũ.
31Hã ra tóg: “vó, ũ tóg inh mỹ kãmén ja tũ nĩ ver. Ã mỹ inh mỹ kãmén ke tũ nĩ'?” he mũ. “To kãtãpry, inh mré nĩ jé,” he tóg.
32Ti tỹ to ken hã vẽ, ha mẽ: “ovelha ri ke han tóg, ũ ẽn ti. Ovelha pére ẽg mũ tĩ, ti tãnh jé, hã ra tóg vĩ tũ nĩgtĩ mỹr. Ẽg tỹ ti kyki ronh mũ ra tóg jatun mỹ jẽg tĩ gé. 33Ũ ẽn tỹ Topẽ vĩ mranh tũ hã ra ag tóg ti vóg kónãn, ag tỹ ti jyvẽn tũ ra. Ti mré ke ag jykre pãno tó kãn ke tũ ẽg tóg nĩ mỹr. Ti tén ag tóg, kỹ tóg ter mũ sir,” he tóg, vẽnh rá ti.
34Kỹ tóg Filipe mỹ: “ũ to ke nẽ hỹn'? Topẽ vĩ tó tĩ tỹ ne tó nẽ hỹn'? Ti tỹ vẽso ke mỹ', ũ to ke mỹ vó?“ he mũ.
35Kỹ Filipe tóg ti mỹ vẽnh rá tag kãmén mũ sir. Jesus kãmén tóg mũ. Ti mỹ tóg vẽnh vĩ há ẽn tó mũ. Hã ra tóg mẽ há han mũ.
36Ge ag tóg mũ mũ, ẽpry jagma. Kỹ ag tóg goj tá junjun mũ. Kỹ pã'i ẽn tóg: “tag ki tóg goj nĩ. Ã tỹ ki inh kype jé tóg há nĩ,” he mũ.
37Kỹ Filipe tóg ti mỹ: “ã tỹ ã fe tỹ ti ki rã kỹ nĩn kỹ tóg há nĩ,” he mũ.
Kỹ tóg: “ti ki sóg rã kỹ nĩ. Jesus Cristo tóg tỹ Topẽ kósin nĩ mỹr,” he mũ. 38Kỹ tóg karósa vóg tĩ mỹ: “ver krỹg hé,” he mũ. Kỹ ag tóg goj kã ra ge mũ. Kỹ Filipe tóg ti kypég mũ sir.
39Ag tỹ goj kã tá kãpa kỹ Filipe tóg tũ' he mũ, Topẽ kuprĩg tỹ ti ma tĩg kỹ. Kỹ pã'i ẽn tóg ti ve mãn tũ nĩ sir. Kỹ tóg tĩ mũ, ti jamãn ra. Ti mỹ tóg sér tĩ sir.
40Hã ra Filipe tóg ẽmã tỹ Azoto tá nĩ nĩ. Tĩg kỹ tóg Jesus kãme sér ẽn tó tĩ mũ, ẽmã kar mĩ. Kỹ tóg kejẽn ẽmã tỹ Cesaréia tá jun mũ.
Currently Selected:
Han Kãme 8: kgp
Highlight
Share
Compare
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
