1 Timóteo 4
4
Ón kỹ Topẽ kãmén tĩ ag
1Ha vé, Topẽ kuprĩg vỹ ẽg mỹ nén ũ jagy tó tĩ, ha mẽ. Jesus kãtĩg mãn ke tỹ kakó ẽn kã ũ ag nẽji ti tovãnh ke mũ, ag tỹ vẽnh ó hã kri nĩm jé, Japo tỹ ag kanhrãn mũn ki. 2Ũ tỹ tỹ Japo mré ke nĩ hã vỹ ónón tĩ. Hã kỹ ag tóg ũn tỹ ge vĩ jẽmẽ kỹ Jesus tovãnh ke mũ, fag ke gé. Jykre régre han ag tóg tĩ. Ag jykre há tỹ tũ' he ja ag nĩgtĩ, kỹ ag tóg ki kagtĩg nỹtĩ ha. “Vẽnh vĩ há vẽ,” he ag tóg tĩ ha, vẽnh ó to. 3“Prũg tũg ra, mén tũg ra,” he ag tóg tĩ. “Tag ko tũg ra,” he ag tóg tĩ gé, Topẽ tỹ nén han ja to. Ẽg tỹ Cristo ki ge há han kỹ, ẽg tỹ ti vĩ kri fi kỹ ẽg tóg ti hã mỹ to vĩ há han ke mũ, vẽjẽn kar to. Kỹ ẽg tóg nén kar konh ke mũ. 4Topẽ tỹ nén han mũ kar vỹ há nĩ. Kỹ ẽg tóg ti mỹ: “há ti nĩ, ã tỹ ẽg mỹ vẽjẽn tag ven mũ ti,” he mũ. Kỹ ẽg jatun mỹ konh ke mũ. “Tag konh ke tũ inh nĩ,” henh ke tũ ẽg tóg nĩ. 5Topẽ vĩ vỹ nén kar jãnhkri han tĩ. Kỹ ẽg tóg to Topẽ mré vẽmén tĩ gé. Kỹ ẽg tóg jatun mỹ konh ke mũ.
Ẽg mré ke ag kanhrãn nĩ
6Tag kar tóm nĩ, ẽg mré ke kar ag mỹ. Kỹ ã tóg Jesus Cristo rãnhrãj han há han mũ. Topẽ vĩ vỹ ã mỹ tỹ vẽjẽn ri ke nĩnh mũ. Kỹ ã tóg tỹ tar jẽ, ã tỹ ti jykre mĩ tĩn kỹ. Ki kanhró ã tóg nĩ, Topẽ jykre ti. 7Ũ tóg vyr mỹ nén ũ to jykrén sór tĩ, tỹ vẽnh ó han kỹ, Topẽ vĩ ki rán kỹ nĩ tũ ẽn. Tag jẽmẽ sór tũg nĩ. Vẽjykre kuryj hã mĩ tĩg nĩ. Tag hã to tar nĩm nĩ. 8Kejẽn ẽg tóg vãkrég tĩ. Ẽg tỹ vãkre to tar nỹtĩn kỹ tóg há sĩ nĩ. Ẽg tỹ jãvo vẽjykre kuryj kar to tar nỹtĩ tag vỹ há tãvĩ nĩ sir. Tag to ẽg tóg mũ há han tĩ, tag ki. Kar ẽg tóg kanhkã tá mũ há han ke mũ gé. 9Tag vỹ tỹ vẽnh vĩ há nĩ. Vẽjykre kuryj tỹ vẽnh kar mỹ há nĩ ra tóg há tĩ vẽ. 10Vẽjykre kuryj ẽn ve jé sóg inh rãnhrãj to vãsãn mũ. Topẽ hã ki ẽg tóg nén ũ kar vég tĩ. Hã kỹ sóg ti hã to vãsãn mũ. Rĩr ti nĩ, ẽg jóg tỹ Topẽ ti. Ti hã ne ẽg kren han tĩ', vẽnh kar ag, ũ tỹ ti ki ge kỹ nỹtĩ ag, fag mré hã.
11Tag kãmén nĩ. Tag to vẽnh kar mỹ: “tag han ra,” hem nĩ. 12Kyrũ ã tóg jẽ. Ũ jé ã to é he tũg. Nén kar há ẽn han nĩ, ag tỹ ve jé, ag tỹ ã kóm han sór jé, ã vĩ ri ke ẽn ti, ã tỹ vẽnh kar to há nĩ ri ke, ã tỹ Jesus ki rã kỹ jẽ ri ke, ã tỹ nén ũ jãnhkri han ri ke ke gé. 13Inh kãtĩg ke to hã ã tỹ nén han tĩ ẽn han tĩm nĩ ver. Ag mỹ Topẽ vĩ rán to kem nĩ. Ag jyvẽn nĩ. Ag kanhrãn nĩ gé. 14Ẽg jyvẽn tĩ ag ne ã mỹ tó', Topẽ tỹ nén to ã tar han ke ti, Topẽ kuprĩg tỹ ag krĩn kỹ, igreja to kófa ag tỹ ag nĩgé tỹ ã kri fi ja ẽn kã. 15Ag tỹ ã mỹ nén tó ja ẽn tovãnh tũg nĩ. To jykrén nĩ, to tar nĩm nĩ, vẽnh kar tỹ ã tỹ to tar nĩ ẽn ve jé. 16Vẽso jykrén nĩ. Kỹ ã tỹ Topẽ vĩ tỹ ag kanhrãn ke ẽn to jykrén nĩ gé, ã tỹ kygnẽg tũ nĩ jé. Tag to tar nĩm nĩ. Ã tỹ tag han kỹ ã kren ke mũ. Kỹ ũ tỹ ã vĩ mẽg mũ ag vỹ krenkren ke mũ gé.
Currently Selected:
1 Timóteo 4: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido