1 Timóteo 3
3
Igreja to kófa
1Sỹ ke há vẽ, ha mẽ. Ũ tỹ tỹ igreja to kófa nĩ sór kỹ tóg vẽnh rãnhrãj mág han ke mũ. 2Ũ tỹ kygnẽ mẽ tũ vỹ há nĩ, ũ tỹ prũ pir han kỹ nĩ, ũ tỹ nén ũ há to jykrén tĩ, ũ tỹ vẽso jykrén tĩ, ũ tỹ kór há tá ke ag mỹ: “inh ĩn ki nũr kãtĩg,” he tĩ, ũ tỹ ag kanhrãn há han tĩ, 3ũ tỹ goj fa kron vãnh, ũ tỹ ti fe tỹ gỹm ke vãnh, ũ tỹ vẽnh kar mỹ komẽr hã vĩ tĩ, ũ tỹ vẽnh kar krĩ kuprã nĩ ve sór tĩ, ũ tỹ riko nĩ sór vãnh, 4ũ tỹ ti ĩn krẽm nỹtĩ fag ki rĩr há han tĩ, ũ tỹ ti krẽ jyvẽn há han tĩ, ti krẽ ag tỹ ti kamẽg jé. 5Ũ tỹ ti ĩn krẽm nỹtĩ fag ki rĩr há han tũ nĩn kỹ tóg, igreja krẽm ke ag ki rĩr há han ki kagtĩg nĩ gé. 6Ũ tỹ Jesus ki rã tãg tóg tỹ, kófa jẽnh ke tũ nĩ ver. Ke tũ nĩ mũ ra tóg inh mỹ ti tỹ: “tỹ sóg ũn mág nĩ,” henh ha mẽ tĩ. Kỹ tóg inh mỹ ti tỹ Japo jykre han ha mẽ tĩ, Japo tỹ ti krĩn kỹ. 7Vẽnh kar tỹ igreja to kófa ẽn to vĩ há han kỹ tóg há tĩ, ũ tỹ Jesus ki ge tũ ag mré hã. Kỹ tóg mỹ'ãg ke tũ nĩ, ti tỹ kygnẽg tũ nĩn kỹ. Kỹ tóg Japo jykre han mãn sór ke tũ nĩ gé.
Igreja to kófa mré rãnhrãj tĩ ũ
8Kỹ igreja to kófa mré rãnhrãj tĩ ũ vỹ nỹtĩ gé. Ũ tỹ ge ag vỹ vẽjykre há han ke mũ gé, vẽnh vĩ pir han kỹ nĩ, goj fa kron vãnh, nén ũ to én ke tũ, riko nỹtĩ sór ke tũ. 9Topẽ vỹ ẽg mỹ vẽnh vĩ jẽnẽ, ẽg tỹ ti ki ge jé, ẽg tỹ ti vĩ tag to krónh ke tũ nĩ jé, ẽg tỹ ẽg fe kavénh tũ nĩ jé gé. Ag tỹ ti vĩ tag to tar nỹtĩnh ke vẽ. 10Ũ tỹ Jesus ki rã tãg nĩ kỹ tóg ver Topẽ rãnhrãj han ke tũ nĩ, ẽg tỹ ver ti jykre tugnỹm jé.
11Kỹ ũ tỹtá tỹ igreja to kófa mré rãnhrãj tĩ fag vỹ ge nỹtĩnh mũ gé. Fag tỹ nén ũ há han kãn kỹ tóg há tĩ, fag tỹ ũ mỹ vĩ kónãn tũ nĩn kỹ, fag tỹ fag rãnhrãj ki rĩr há han kỹ. Kỹ fag tóg Topẽ rãnhrãj han ke mũ.
12Hỹ, igreja ki rãnhrãj mũ ag vỹ prũ pir han kỹ nỹtĩnh mũ. Kỹ ag tóg ag krẽ jyvẽn há han ke mũ gé. Kỹ ag tóg ag ĩn krẽm nỹtĩ kar ki rĩr há han ke mũ gé. 13Ũn tỹ ge vỹ, jatun mỹ Topẽ rãnhrãj ki rĩr há han ke mũ. Jesus Cristo kãmén to mỹ'ãg ke tũ ti nĩ, fi ke gé. Kỹ tóg Jesus ki ge kỹ nỹtĩ kar mỹ há tĩ.
Jesus kãme
14Ã mỹ sóg vẽnh rá tag han mũ. Hã ra sóg kãnhmar ã ve sór mũ. 15Hẽn ri ke mũn sóg kãtĩg vãnh han ke mũ. Hã ra sóg ã mỹ rán mũ. Topẽ vỹ rĩr jẽ. Ti tũ vỹ tỹ ẽg nỹtĩ, ũ tỹ ti ki ge kỹ nỹtĩ ag. Ẽg hã vỹ vẽnh vĩ há hã tó tĩ, Topẽ vĩ to. 16Ha vé, Topẽ tỹ ũri ẽg mỹ nén tó mũ tag vỹ tỹ nén ũ há tãvĩ nĩ. Vãsỹ ag tóg mẽ ja tũ nĩ. Ti jykren hã vẽ, ha mẽ:
Jesus Cristo vỹ ẽg ri ke mur, ga kri, kỹ Topẽ tóg ti tỹ ũn mág han, tá, ti tỹ jykre kuryj nĩn kỹ.
Kỹ tóg ti tỹ jẽgnẽ jafã ag mỹ ti ven. Kỹ ti mré mũ tĩ ag vỹ povo kar mỹ ti tó.
Hã kỹ ga kri mũ ag vỹ ti ki ge mũ,
Ẽg tỹ Jesus kãmén hã vẽ.
Currently Selected:
1 Timóteo 3: kgp
Highlight
Copy
Compare
Share
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
