1 Timóteo 5
5
1Ũn sanh há ag mỹ vĩ tar han tũg nĩ. Komẽr hã ag jyvẽn nĩ. Ẽg tỹ ẽg panh mré vĩ ri ke han nĩ. Ã tỹ kyrũ ag jyvẽn kỹ ẽg tỹ ẽg jãvy ag jyvẽn ri ke han nĩ. 2Ã tỹ ũn sanh há fag jyvẽn kỹ ẽg tỹ ẽg mỹnh fi jyvẽn ri ke han nĩ. Ã tỹ tytãg fag jyvẽn kỹ ẽg tỹ ẽg ve fi jyvẽn ri ke han nĩ. Ã tỹ fag jyvẽn kỹ vẽnh ki rĩrm nĩ, ã tỹ fag to én tũ nĩ jé.
Ũn mén ter ja fag ki rĩr ke mũ
3Ũ fag mén vỹ ter, hã ra tóg tũ tĩ, ũ tỹ fag ki rĩr ke ti. Ẽn fag ki rĩrm nĩ. 4Ũn mén ter ja ũ fi krẽ vỹ nỹtĩ, fi krẽ'krẽ mré hã. Kỹ fi krẽ hã vỹ fi ki rĩr ke mũ'. Ag tỹ tỹ gĩr nỹtĩ mũn kã fi tóg ag jẽ'ỹn ja nĩgtĩ. Kỹ ag tóg vẽnh kaja jé fi jẽ'ỹn mũ ha. Topẽ jykren hã vẽ. 5Hã ra ũn mén ter ja ũ fi vỹ krẽ tũ nĩ. Kỹ ũ tỹ fi jẽ'ỹn ke tóg tũ tĩ. Kỹ Jesus ki ge kỹ nỹtĩ kar ag vỹ fi jẽ'ỹn ke mũ. Fi tỹ nén ũ ve sór kỹ fi tóg Topẽ hã mré vẽmén ke mũ, ti hã mỹ nén ũ kar to vĩ kỹ. Fi tỹ tag to krónh kenh ke tũ vẽ, kurã mré hã, kuty mré hã ke gé. 6Fi tỹ hã ra ag to kanhir sór kỹ fi tóg vẽjykre pãno han mũ. Kỹ fi tóg tĩg kónãn ke mũ. 7Tag tóm nĩ, fag mỹ, fag tỹ tỹ prãnh ke tũ nĩ jé.
8Hã ra ag kã mĩ ũ tóg kejẽn ti mré ke fag ki rĩr tũ nĩ. Ẽn vỹ Jesus ki rã tovãnh ja nĩ. Kórég tãvĩ ti nĩ, tag ti. Ũ tỹ Jesus ki rã ja tũ kórég kãfór ti nĩ.
Ũ tỹ igreja ki rĩr ke fi
9Tá ũn mén ter ja fag vỹ fag jiji ránrán sór mũ, fag tỹ igreja ki rĩr jé. Ũn sanh há fag jiji hã rán nĩ, ũ tỹ 60 (ke) anos kãfór nỹtĩ fag, ũn mén pir han kỹ nỹtĩ ja fag. 10Ã tỹ ũn jiji rán ke mũ fi jykren hã vẽ, ha mẽ. Fi mỹ fi krẽ ki rĩr há han ja nĩ'? Fi mỹ fi ĩn krẽm Topẽ tũ ag ki rĩr há han ja nĩ'? Fi mỹ ũn vẽsỹrénh mũ fag jagãgtãn ja nĩ'? Fi mỹ nén ũ há kar to tar nĩ?' Kỹ fi jiji rán nĩ.
11Ũn mén ter ja ũ fi vỹ sanh há tũ nĩ ver. Kỹ fi jiji rán tũg nĩ. Ũ to én kỹ fi tóg Cristo tovãnh kỹ mén sór mũ, ha vem nĩ. 12Kỹ tóg vẽnh mỹ tĩnh mũ. Fag tỹ fag jiji rán kar kỹ fag mén mãn ke tũ nĩ ha. Cristo tũ hã ki rĩr jé fag ke mũ ha. 13Kỹ tytãg fag jiji rán tũg nĩ. Jãvo fag tóg rãnhrãj mẽ kã ĩn kar mĩ pasa' he sór mũ, ha vem nĩ. Kỹ fag tóg fagrĩnh mỹ vẽmén ke mũ gé sir. Nén tó vãnh tó jé fag tóg ke mũ gé. Kỹ tóg há tũ nĩnh mũ. 14Hã kỹ tóg há tĩnh mũ, fag mén mãn kỹ. Fag tỹ fag krẽ ve kỹ tóg há tĩ. Fag tỹ fag ĩn ki rĩr há han kỹ tóg há tĩ gé. Kỹ tóg ũ tỹ ẽg mỹ fag to vĩ sór mũ ra vẽnh mỹ tĩnh mũ, ha vem nĩ. 15Ha vé, ũ fag vỹ Cristo tovãnh huri, ũn mén ter ja tytãg ũ fag. Kỹ fag tóg Satanás jykre han mũ sir. Kỹ tóg kórég nĩ.
16Tá ke ũ ĩn krẽm ũn mén ter ja ũ fi vỹ jẽ. Kỹ fag hã vỹ fi jẽ'ỹn ke mũ. Fag tỹ fi mỹ: “Jesus ki ge kỹ nỹtĩ ag tỹ ã jẽ'ỹn kỹ tóg inh mỹ há tĩnh mũ vẽ,” henh ke tũ vẽ. Jesus ki ge kỹ nỹtĩ ag vỹ ũn mén ter ja tỹ ge hã ki rĩr ke mũ, hã vỹ: ũn kanhkã tũ, ũn krẽ tũ, he mũ.
Igreja to kófa ag jagãgtãn ke
17Tá ke ag kã mĩ ũ tóg tỹ kófa nỹtĩ, igreja to, fag ke gé. Kỹ ag kã mĩ ũ tóg igreja ki ke ag kanhrãn tĩ, Topẽ vĩ tỹ, kỹ ag tóg to krónh ke tũ nĩgtĩ. Tag ag vỹ ẽg mỹ tỹ ũn mág nỹtĩ. Ag tỹ igreja krẽm ũn kanhrãn tĩ ag jé ag mỹ kajãm mág, fag mỹ ke gé. 18Tag vỹ rán kỹ nĩ, ha mẽ: “monh tỹ ẽkré ki rãnhrãj kỹ ti jẽnky tógfĩn tũg nĩ. Ti jẽn kamẽg tũg nĩ,” he ja tóg nĩ. Kỹ tag vỹ rán kỹ nĩ gé: “ũn rãnhrãj mũ ẽn tóg ti kaja venh ke mũ,” he ja tóg nĩ gé. Ti tỹ ẽg tỹ Topẽ vĩ tó tĩ ag mỹ kajãm ke to ken hã vẽ, ẽg tỹ Jesus ki ge kỹ nỹtĩn kỹ.
19Ũ tóg kejẽn ã mỹ igreja to kófa jykre kórég tó sór mũ. Ũn régre ag tỹ ti jykre kórég ve kỹ ã mỹ tó kỹ ag vĩ jẽmẽm nĩ. Ũn pir vĩ jẽmẽ sór tũg nĩ. 20Kófa ũ tỹ kygnẽ kỹ vẽnh kar rĩnve ti jyvẽn nĩ, vẽnh kar tỹ ti mré ẽg tỹ kygnẽg tĩ ẽn kamẽg jé, fi mré hã ke gé.
21Tag han ra, ha mẽ. Ker han tũg hẽ'. Topẽ vỹ ã tỹ nén han mũ vég tĩ, Jesus Cristo ti ke gé, Topẽ tỹ jẽnẽ jafã ag ke gé. Ũ to: “ti tỹ iso há nĩn kỹ sóg ti mỹ vĩ tar han sór tũ nĩ, ti tỹ kygnẽ ja ra,” he sór tũg nĩ. Ge ra ti jyvẽn tar han nĩ. 22Kỹ kãnhmar ũ mỹ: “Topẽ rãnhrãj tag han jé ã tóg ke mũ,” he sór tũg nĩ gé. Ti tỹ Topẽ vĩ mranh ja ẽn tovãnh kãn ja tũ nĩn kỹ ã tóg ti mré mranh mũ, ti tỹ ti rãnhrãj tovãnh kỹ. Kỹ vẽso jykrén nĩ gé, ã jãnhkri kar jẽ jé.
23Goj tãvĩ kron sór tũg nĩ. Kaga mẽ ã tóg nĩ. Hã kỹ sĩn kỹ vinho kron nĩ. Ã mỹ vẽnh kagta vẽ.
24Ũ ag tóg Topẽ vĩ mranh pẽ han tĩ, kỹ vẽnh kar tóg ag vég tĩ. Topẽ vỹ ag vóg kónãn ke mũ, ag tỹ ti vĩ mranh pẽ han to. Ũ ag tóg vẽnh péju kỹ mranh tĩ. Ag tỹ Topẽ vĩ mranh mũ ẽn vỹ vẽnh ven ke mũ gé kejẽn, ha vem nĩ. 25Ge ti nĩ gé, vẽjykre há mré. Vẽnh kar vỹ vég mũ, ũ tỹ vẽjykre há han mũ ti. Kejẽn ũ tóg nén ũ há han tĩ, hã ra tóg vẽnh péju kỹ han tĩ. Vẽnh ven jé tóg ke mũ gé, ti tỹ Topẽ vĩ mranh ja ti.
Currently Selected:
1 Timóteo 5: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido