1 Timóteo 2
2
Igreja krẽm vẽjykre
1Ã tỹ ã tũ ag jyvẽn kỹ ag mỹ: “Topẽ mré vẽmén e han nĩ,” hem nĩ. “Ti mỹ nén ũ kar to vĩm nĩ. Vẽnh kar jagfy vĩm nĩ, ti mré. Ti mỹ nén ũ kar to: há ti nĩ, hem nĩ gé,” hem nĩ, ag mỹ. 2Pã'i ag jagfy Topẽ mré vĩm nĩ gé. Kỹ ag tóg jatun mỹ nỹtĩnh mũ. Kỹ ẽg tóg, jatun mỹ ẽg ĩn krẽm nỹtĩn kỹ ẽg rãnhrãj nón mũnh ke mũ gé, ẽg tỹ Topẽ to há nỹtĩn kỹ, ẽg tỹ jagnẽ to há nỹtĩn kỹ ke gé. 3Topẽ mỹ tóg sér nĩ, tag ti, ũ tỹ ẽg kren han tĩ ẽn mỹ. 4Ti tỹ tag han sór vẽ, ha mẽ: ẽprã ke ag krenkren han sór tóg mũ, vẽnh kar tỹ ti tỹ ki hã tó mũ tag mẽ kãn jé. 5Pir ti nĩ, Topẽ ti. Ũ tỹ Topẽ mré ẽg jagfy vĩ mũ ẽn vỹ pir nĩ gé, hã vỹ: ẽg mré ke tỹ Jesus Cristo, he mũ, ũ tỹ ẽg ri ke mur ja ẽn ti. 6Ti hã ne vẽnh fẽg', ti tỹ vẽnh kar kygjãm jé. Topẽ tỹ ti mỹ kurã nĩm ja ẽn kã ke ja vẽ. Kỹ vẽnh kar vỹ mẽnh ke mũ, ũri, ũ tỹ ti ve ja ag vĩ ti. 7Hã kỹ tóg inh mỹ: “ha vẽnh kar mỹ tónh tĩg,” he ja nĩ. Hã kỹ sóg tó mũ. Ki hã sóg tó mũ. Inh pijé ón mũ'. Fóg ag to tóg inh jẽnẽ, kanhgág ag to ke gé, sỹ ag mỹ vẽnh vĩ há tó jé, ag tỹ Topẽ ki ge jé gé.
8Kỹ tá Jesus ki ge kỹ nỹtĩ ag mỹ tóm nĩ, ag tỹ igreja krẽm Topẽ mré vẽmén jé, jagnẽ kóm. Hã ra tóg há tũ nĩ, ũ tỹ ti jykre pãno tovãnh tũ ra ti mré vẽmén kỹ. Ag tỹ ag jũ tovãnh kãn ke vẽ. Tag tóm nĩ ag mỹ.
9Kỹ ũn tỹtá fag vỹ ge nỹtĩnh mũ gé, fag tỹ vẽnh mãn kỹ nỹtĩn kỹ. Fag sĩnvĩ han jafã vỹ tỹ fag jykre kuryj nĩ. Kỹ ẽg tóg, fag tỹ Topẽ to há nỹtĩ vég mũ. Ẽg tỹ kur to mỹ'a tunh ke tũ fag nĩ. Fag tỹ kur sĩnvĩ tu kỹ tóg há tĩ. Fag tỹ fag gãnh ki rĩr há han kỹ tóg há nĩ gé. 10Fag tỹ kur tỹ jagnẽ kãfór han sór mũ pijé há nĩ', fag gãnh tỹ ke gé. Fag jé vẽjykre kuryj hã tỹ vẽnh sĩnvĩ han.
11Ãjag tỹ vẽnh mãn kỹ nỹtĩn kỹ fag jé vẽnh kanhrãn há han. Fag jé mẽ há han, vẽnh kar tỹ fag kóm mẽ há han jé gé. 12Ker fag: “ũ tỹtá fi hã vỹ ũn ve ti han, fi hã vỹ ag kãfór nĩ,” hẽ hé'. Mẽ há han jé fag tóg ke mũ, 13hã vỹ: “Topẽ tỹ ũn han vén mũ vỹ tỹ Adão ti nĩ, kar kỹ Eva fi,” he mũ. 14Kỹ Japo tỹ ũn krĩn kónãn vén mũ vỹ tỹ fi nĩ ja nĩ. Adão pijé'. Fi hã ne Topẽ vĩ mranh vén'. Hã ra tóg fi nón mranh ja nĩgtĩ gé, Adão ti. 15Hã ra fag krenkren ke mũ gé, fag krẽ mré hã, ũ tỹtá fag, ag ri kén. Krenkren jé fag ke mũ, fag tỹ Jesus tovãnh tũ nĩn kỹ, fag tỹ ti to há nỹtĩn kỹ, jagnẽ to há ke gé, fag tỹ ti ki ge kỹ nỹtĩn kỹ.
Currently Selected:
1 Timóteo 2: kgp
Highlight
Copy
Compare
Share
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
