Gálatas 1
1
Xqꞌuebal xsahileb xchꞌo̱l
1La̱in laj Pablo. La̱in x-apóstol li Jesucristo. Moco taklanbilin ta xban cui̱nk, chi moco saꞌ xcꞌabaꞌ junak cui̱nk. Taklanbilin ban xban li Jesucristo ut xban li Acuabej Dios, li quicuaclesin cuiꞌchic re chi yoꞌyo li Jesucristo saꞌ xya̱nkeb li camenak. 2La̱in yo̱quin chixtaklanquil li hu aꞌin e̱riqꞌuin che̱junilex la̱ex li cuanquex saꞌ li junju̱nk chi iglesia aran Galacia. Ut eb li herma̱n li cuanqueb cuochben yo̱queb ajcuiꞌ chixtaklanquil xsahil e̱chꞌo̱l. 3Chicua̱nk taxak e̱riqꞌuin li usilal ut li tuktu̱quilal li naxqꞌue li Dios li kaYucuaꞌ ut li naxqꞌue li Ka̱cuaꞌ Jesucristo. 4Li Jesucristo quixkꞌaxtesi rib chi ca̱mc saꞌ xcꞌabaꞌ li kama̱c xban nak joꞌcan quiraj li Dios Acuabej. Quixba̱nu aꞌan re kacolbal chiru li ma̱usilal saꞌ li ruchichꞌochꞌ. 5Lokꞌoninbil taxak ru li Acuabej Dios chi junelic kꞌe cutan. Joꞌcan taxak.
Jun ajcuiꞌ li tzꞌakal evangelio
6Nasach inchꞌo̱l e̱ban xban nak kꞌaxal junpa̱t yo̱quex chixcanabanquil li tzꞌakal Dios li quisicꞌoc e̱ru xban li rusilal li Jesucristo. Ut yo̱quex chixpa̱banquil jalan tijleb chirix li evangelio li moco ya̱l ta. 7Aꞌin moco naraj ta naxye nak cuan jun chic li evangelio. Lix ya̱lal aꞌan, aꞌin: cuanqueb li nequeꞌraj xpoꞌbal ru li evangelio li naxqꞌue li Ka̱cuaꞌ Jesucristo. 8Usta la̱o, usta junak ángel ta̱cha̱lk saꞌ choxa chixyebal e̱re jalan tijleb chirix li evangelio chiru li ac xkachꞌolob che̱ru, tzꞌekta̱nanbilak taxak xban li Dios li ani ta̱ba̱nu̱nk re chi joꞌcaꞌin. 9Ac xkaye aꞌin e̱re ut nakaye cuiꞌchic e̱re, cui junak tixye e̱re jalan tijleb chirix li evangelio chiru li ac xerabi, tzꞌekta̱nanbilak taxak xban li Dios li ani ta̱ba̱nu̱nk re chi joꞌcaꞌin. 10¿Ma yal re ta biꞌ nak teꞌsahokꞌ xchꞌo̱l li cui̱nk cuiqꞌuin nak yo̱quin chixyebal chi joꞌcaꞌin? ¿Ma incꞌaꞌ ta biꞌ yo̱quin chixyebal chi joꞌcaꞌin re nak sahak xchꞌo̱l li Dios cuiqꞌuin? ¿Ma tincuaj ta biꞌ tincꞌojob xchꞌo̱leb li cui̱nk? Ma̱ jokꞌe xban nak cui ta toj nacuaj xcꞌojobanquil xchꞌo̱leb li cui̱nk ma̱cuaꞌin raj aj cꞌanjel chiru li Jesucristo.
Nak quisiqꞌueꞌ ru laj Pablo chokꞌ apóstol
11Ex inherma̱n, nacuaj nak te̱nau nak li evangelio li xinchꞌolob che̱ru, aꞌan ma̱cuaꞌ yal xcꞌaꞌux cui̱nk. 12Ma̱cuaꞌ yal riqꞌuin junak cui̱nk quicuabi, chi moco riqꞌuin ta junak cui̱nk quintzol cuib. Aꞌ ban li Ka̱cuaꞌ Jesucristo, aꞌan li quicꞌutbesin re chicuu. 13Ac e̱rabiom ajcuiꞌ resil chanru nak quincuan chak saꞌ lix pa̱ba̱leb laj judío. La̱ex nequenau nak kꞌaxal nabal li raylal quinba̱nu reheb li nequeꞌpa̱ban re li Dios ut quinyal inkꞌe chixsachbal ruheb laj pa̱banel. 14La̱in li kꞌaxal cuiꞌchic quinqꞌue inchꞌo̱l chiruheb li cuech sa̱jilal chixba̱nunquil li cꞌaꞌru naxye lix pa̱ba̱leb laj judío. Ut kꞌaxal cuiꞌchic quinba̱nu li naꞌleb canabanbil ke xbaneb li kaxeꞌ kato̱n. 15Nak toj ma̱jiꞌ ninyoꞌla, xban xnimal rusilal, li Dios ac xsicꞌ chak cuu re tincꞌanjelak chiru. 16Ut nak li Dios quiraj xcꞌutbesinquil li Ralal chicuu re nak tinchꞌolob resil chiruheb li ma̱cuaꞌeb aj judío, incꞌaꞌ xinpatzꞌ innaꞌleb re junak cui̱nk. 17Chi moco co̱in ta Jerusalén chi a̱tinac riqꞌuineb li apóstol li quisiqꞌueꞌ ruheb junxil chicuu. Ti̱c ban co̱in Arabia ut mokon quinsukꞌi cuiꞌchic Damasco. 18Oxib chihab xpa̱banquil li Dios inban nak co̱in Jerusalén re nak tinnau ru laj Pedro. Oꞌlaju cutan quincuan chak riqꞌuin. 19Ut quicuil ru laj Jacobo ri̱tzꞌin li Ka̱cuaꞌ Jesucristo. Ut chirix chic aꞌan, ma̱ jun chic reheb li apóstol quicuileb ru. 20Li Dios naxnau nak tzꞌakal ya̱l li cꞌaꞌru yo̱quin chixtzꞌi̱banquil saꞌ li hu aꞌin. 21Chirix chic aꞌan co̱in saꞌ eb li naꞌajej xcue̱nt Siria ut Cilicia. 22Ut toj ma̱jiꞌak nequeꞌxnau cuu eb laj pa̱banel saꞌ xcꞌabaꞌ li Cristo, li cuanqueb aran Judea. 23Yal resil nequeꞌrabi li nayeman chicuix: Li cui̱nk li quirahobtesin reheb laj pa̱banel junxil, anakcuan aꞌan chic yo̱ chi yehoc resil li colba-ib li quiraj raj xsachbal junxil, chanqueb. 24Ut eb aꞌan queꞌxlokꞌoni ru li Dios nak queꞌrabi resil nak quinpa̱b li Cristo.
Currently Selected:
Gálatas 1: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.