Gálatas 2
2
Eb li apóstol queꞌxcꞌul laj Pablo chokꞌ rech apostolil
1Mokon chic nak ac xnumeꞌ ca̱laju chihab, co̱in cuiꞌchic Jerusalén cuochben laj Bernabé. Ut kacꞌam laj Tito chikix. 2Co̱in xban nak li Dios quixcꞌutbesi chicuu nak tento tinxic Jerusalén. Ut queꞌxchꞌutub rib li nequeꞌcꞌamoc be chiruheb laj pa̱banel. Ut quinserakꞌi reheb li resilal li evangelio li yo̱quin chixjulticanquil reheb li ma̱cuaꞌeb aj judío. Quinchꞌolob xya̱lal chiruheb re nak incꞌaꞌ ta̱cana̱k chi ma̱cꞌaꞌ rajbal chiruheb li cꞌaꞌru yo̱quin chixba̱nunquil joꞌ ajcuiꞌ li ac xinba̱nu. 3Laj Tito ma̱cuaꞌ aj judío. Abanan eb laj cꞌamol be incꞌaꞌ queꞌxmin ru chixcꞌulbal li circuncisión. 4Abanan cuan ajcuiꞌ junju̱nk queꞌraj raj xminbal ru xcꞌulbal li circuncisión. Eb aꞌan nequeꞌxye rib nak aj pa̱baneleb. Queꞌoc saꞌ kaya̱nk chi mukmu re xqꞌuebal retal li usilal cuanco cuiꞌ saꞌ xcꞌabaꞌ li Jesucristo ma yo̱co chixpa̱banquil li najter chakꞌrab malaj incꞌaꞌ. Eb aꞌan queꞌraj raj cuiꞌchic kaqꞌuebal rubel xcuanquil li najter chakꞌrab. 5Abanan la̱o ma̱ jokꞌe kaba̱nu li cꞌaꞌru queꞌxye ke xban nak la̱o incꞌaꞌ quikaj nak teꞌxpoꞌ ru li evangelio, li tzꞌakal ya̱l li ac xerabi. 6Ut eb li ni̱nkeb xcuanquil saꞌ xya̱nkeb laj pa̱banel ma̱cꞌaꞌ queꞌxye chirix li cꞌaꞌru yo̱quin chixba̱nunquil. Ma̱cꞌaꞌ nacuaj re usta ni̱nkeb xcuanquil. Chiru li Dios juntakꞌe̱to. 7Ma̱cꞌaꞌ queꞌxye li ni̱nkeb xcuanquil. Queꞌxqꞌue ban retal nak tenebanbil saꞌ inbe̱n xban li Dios xyebal resil li evangelio reheb li ma̱cuaꞌeb aj judío joꞌ nak quiteneba̱c saꞌ xbe̱n laj Pedro xban li Dios xyebal resil li evangelio reheb laj judío. 8Li Dios quixsicꞌ cuu chokꞌ apóstol re tincꞌanjelak saꞌ xya̱nkeb li ma̱cuaꞌeb aj judío joꞌ nak quixsicꞌ ru laj Pedro re ta̱cꞌanjelak saꞌ xya̱nkeb laj judío. 9Laj Jacobo, laj Pedro ut laj Juan, aꞌaneb aj cꞌamol be saꞌ xya̱nkeb laj pa̱banel. Nak queꞌxqꞌue retal nak sicꞌbil cuu xban li Dios, queꞌxqꞌue li rukꞌeb cue ut re laj Bernabé. Aꞌan retalil nak kacomon kib chi cꞌanjelac chiru li Dios. Ut xkacꞌu̱b ru nak la̱in ut laj Bernabé tocꞌanjelak saꞌ xya̱nkeb li ma̱cuaꞌeb aj judío ut eb aꞌan teꞌcꞌanjelak saꞌ xya̱nkeb laj judío. 10Caꞌaj cuiꞌ li queꞌxtzꞌa̱ma chiku nak cheꞌjulticokꞌ ke eb li nebaꞌ li cuanqueb Jerusalén, ut aꞌan li ninqꞌue inchꞌo̱l chixba̱nunquil.
Laj Pablo quixye nak incꞌaꞌ us yo̱ chixba̱nunquil laj Pedro aran Antioquía
11Nak quicuulac laj Pedro Antioquía, la̱in quinkꞌus xban nak incꞌaꞌ us li yo̱ chixba̱nunquil. 12Nak toj ma̱jiꞌ nequeꞌcuulac li taklanbileb xban laj Jacobo, laj Pedro nacuaꞌac riqꞌuineb li ma̱cuaꞌeb aj judío. Aban nak queꞌcuulac eb aꞌan, quirisi rib saꞌ xya̱nkeb li ma̱cuaꞌeb aj judío xban nak quixxucuaheb ru laj judío li nequeꞌyehoc re nak tento xcꞌulbal li circuncisión. 13Eb laj pa̱banel aj judío queꞌoc chixba̱nunquil li caꞌ pacꞌalil naꞌleb li quixba̱nu laj Pedro toj retal nak qui-oc ajcuiꞌ chixba̱nunquil laj Bernabé xban nak joꞌcan quicꞌameꞌ cuiꞌ xbe xbaneb. 14Nak quinqꞌue retal nak incꞌaꞌ yo̱queb chixba̱nunquil joꞌ naraj li evangelio, chiruheb chixjunileb laj pa̱banel quinye re laj Pedro: “Ya̱l nak la̱at aj judío chalen chak saꞌ la̱ yoꞌlajic, abanan ac junxil xacanab xba̱nunquil li cꞌaynakeb chixba̱nunquil laj judío. ¿Cꞌaꞌut nak nacamineb ru li ma̱cuaꞌeb laj judío chixba̱nunquil joꞌ nequeꞌxba̱nu laj judío?” chanquin re.
Caꞌaj cuiꞌ riqꞌuin xpa̱banquil li Cristo natauman li colba-ib
15La̱o aj judío chalen chak saꞌ kayoꞌlajic ut ma̱cuaꞌo xcomoneb li ma̱cuaꞌeb aj judío, li nequeꞌxye “aj ma̱c” reheb. 16Abanan nakanau nak ma̱ ani ta̱ti̱cobresi̱k xchꞌo̱l chiru li Dios riqꞌuin xba̱nunquil li cꞌaꞌru naxye li chakꞌrab. Riqꞌuin ban xpa̱banquil li Jesucristo. La̱o xkapa̱b li Ka̱cuaꞌ Jesucristo re ta̱ti̱cobresi̱k kachꞌo̱l chiru li Dios riqꞌuin xpa̱banquil li Cristo ut ma̱cuaꞌ riqꞌuin xba̱nunquil li naxye li chakꞌrab cocoleꞌ. Riqꞌuin xba̱nunquil li naxye li chakꞌrab, ma̱ ani ta̱ti̱cobresi̱k xchꞌo̱l chiru li Dios. 17Cui yo̱co chixsicꞌbal xti̱cobresinquil kachꞌo̱l chiru li Dios saꞌ xcꞌabaꞌ li Cristo, ut nak la̱o chic totaꞌli̱k chi cuan kama̱c, ¿ma aꞌan ta biꞌ naraj naxye nak aꞌ li Cristo yo̱ chi qꞌuehoc ke chi ma̱cobc? Ma̱ jokꞌe biꞌan. 18Cui la̱in tin-oc cuiꞌchic xpa̱banquil nak ta̱ti̱cobresi̱k inchꞌo̱l chiru li Dios riqꞌuin xba̱nunquil li naxye li chakꞌrab, aꞌan naraj naxye nak chi ya̱l la̱in aj ma̱c xban nak ac junxil xincanab xpa̱banquil li naꞌleb aꞌan. 19Chanchan nak li najter chakꞌrab xqꞌuehoc cue chi ca̱mc xban nak aꞌan xcꞌutuc re chicuu nak la̱in aj ma̱c. Anakcuan camenakin chic chiru lix cuanquil li chakꞌrab re nak yoꞌyo̱kin rubel xcuanquil li Dios. 20Li Jesucristo quicam chiru li cruz ut chanchan nak quinqꞌueheꞌ ajcuiꞌ la̱in cuochben. Ma̱cuaꞌ chic la̱in li yoꞌyo̱quin. Aꞌ chic li Cristo cuan cuiqꞌuin. Ut acꞌ chic lin yuꞌam xban nak xinpa̱b li Jesucristo li Ralal li Dios li quirahoc cue ut quixkꞌaxtesi rib chi ca̱mc saꞌ incꞌabaꞌ. 21Joꞌcan nak incꞌaꞌ nintzꞌekta̱na xcuanquil li rusilal li Dios. Cui ta saꞌ xcꞌabaꞌ li chakꞌrab nati̱cobresi̱c kachꞌo̱l, ma̱cꞌaꞌ raj rajbal nak quicam li Cristo.
Currently Selected:
Gálatas 2: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.