2 Corintios 13
13
Laj Pablo naxye cꞌaꞌru tixba̱nu nak ta̱cuulak riqꞌuineb laj Corinto
1Aꞌin li rox sut nak tincuulak e̱riqꞌuin. Cui cuan li ta̱jitekꞌ nak tincuulak, tento nak cua̱nk cuib malaj oxib li testigo chixyebal nak ya̱l lix ma̱c, joꞌ tzꞌi̱banbil saꞌ li Santil Hu. 2Nak quincuulac xcaꞌ sut e̱riqꞌuin, quinqꞌueheb chak xnaꞌlebeb li yo̱queb chi ma̱cobc joꞌ ajcuiꞌ che̱junilex. Ut anakcuan ma̱ anihin saꞌ e̱ya̱nk ut tinchꞌolob cuiꞌchic xya̱lal che̱ru. Nak tincuulak cuiꞌchic e̱riqꞌuin, la̱in tebinkꞌus chi cau li ani incꞌaꞌ us yo̱queb chixba̱nunquil. Incꞌaꞌ chic teꞌcuil xtokꞌoba̱l ru. 3Riqꞌuin aꞌin te̱nau nak nina̱tinac riqꞌuin li cuanquil qꞌuebil cue xban li Cristo. Moco ma̱cꞌaꞌ ta xcuanquil li Cristo re e̱kꞌusbal. Kꞌaxal nim ban xcuanquil che̱kꞌusbal. 4Cubenak xcuanquil li Cristo nak quicamsi̱c chiru li cruz. Abanan quicuaclesi̱c cuiꞌchic saꞌ xya̱nkeb li camenak chi yoꞌyo xban xcuanquil li Dios. Joꞌ nak quixcubsi xcuanquil li Cristo, joꞌcan ajcuiꞌ takacubsi kacuanquil la̱o. Abanan yoꞌyo̱co xban xcuanquil li Dios ut qꞌuebil ke li kacuanquil xban li Dios re xkꞌusbaleb li nequeꞌxba̱nu li incꞌaꞌ us. 5Qꞌuehomak retal le̱ yuꞌam. ¿Ma tzꞌakal re ru le̱ yuꞌam? ¿Ma chi anchal e̱chꞌo̱l nequexpa̱ban? ¿Ma incꞌaꞌ ta biꞌ nequenau chi tzꞌakal nak li Cristo cuan e̱riqꞌuin? ¿Malaj ut toj ma̱jiꞌ nequexpa̱ban? 6Usan cui nak tincuulak e̱riqꞌuin, te̱qꞌue retal nak la̱in tzꞌakalin x-apóstol li Jesucristo. 7La̱in junelic nintzꞌa̱ma chiru li Dios nak incꞌaꞌ te̱ba̱nu li incꞌaꞌ us. Incꞌaꞌ nintzꞌa̱ma aꞌan re nak ta̱cꞌutu̱nk nak cha̱bil li cꞌanjel ninba̱nu saꞌ e̱ya̱nk. Re ban nak tzꞌakalak re ru le̱ yuꞌam. Nacuaj nak te̱ba̱nu li us usta incꞌaꞌ naqꞌueheꞌ xcuanquil li cꞌanjel li ninba̱nu saꞌ e̱ya̱nk. 8La̱o incꞌaꞌ naru nakapoꞌ ru li ya̱l. Nococꞌanjelac ban re xqꞌuebal xcuanquil li ya̱l. 9Joꞌcan nak kꞌaxal raj ta̱sahokꞌ saꞌ inchꞌo̱l nak tincuulak e̱riqꞌuin cui cha̱bilak chic le̱ yuꞌam re nak incꞌaꞌ tento tincꞌut che̱ru nak cuan incuanquil re e̱kꞌusbal. Nintijoc che̱rix re nak tzꞌakalak re ru le̱ yuꞌam saꞌ le̱ pa̱ba̱l. 10Joꞌcan nak yo̱quin chixtzꞌi̱banquil li hu aꞌin e̱riqꞌuin nak toj ma̱jiꞌ ninxic e̱riqꞌuin. Nak cua̱nkin cuiꞌchic saꞌ e̱ya̱nk la̱in incꞌaꞌ nacuaj texinkꞌus chi cau usta cuan incuanquil re e̱kꞌusbal. Li Ka̱cuaꞌ incꞌaꞌ quixqꞌue lin cuanquil re e̱sachbal. Re ban e̱tenkꞌanquil saꞌ le̱ pa̱ba̱l.
Laj Pablo naxqꞌueheb xsahil xchꞌo̱l ut naxchakꞌrabiheb
11Anakcuan ex inherma̱n, texinchakꞌrabi riqꞌuin a a̱tin aꞌin: Jalomak le̱ cꞌaꞌux re nak tzꞌakalak e̱re e̱ru. Cheqꞌuehak retal li joꞌ qꞌuial xinye e̱re. Junajak taxak le̱ cꞌaꞌux ut chexcua̱nk saꞌ xya̱lal chi ribil e̱rib. Ut cua̱nk e̱riqꞌuin li Dios li narahoc ke ut naxqꞌue ke li tuktu̱quil usilal. 12Cheqꞌuehak xsahil e̱chꞌo̱l chi ribil e̱rib riqꞌuin santil utzꞌuc u. 13Chixjunileb laj pa̱banel li cuanqueb arin nequeꞌxtakla xsahil e̱chꞌo̱l. 14Chicua̱nk taxak e̱riqꞌuin li rusilal li Ka̱cuaꞌ Jesucristo, ut chicua̱nk taxak e̱riqꞌuin li rahoc ib li naxqꞌue li Ka̱cuaꞌ Dios, ut aꞌ taxak li Santil Musikꞌej chicua̱nk e̱riqꞌuin. Joꞌcan taxak.
Currently Selected:
2 Corintios 13: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.