Romanos 14

Chetenkꞌaheb li kꞌuneb xchꞌo̱l saꞌ lix pa̱ba̱leb

1Checꞌulakeb chi sa saꞌ e̱chꞌo̱l li toj kꞌuneb xchꞌo̱l saꞌ lix pa̱ba̱leb ut me̱cuechꞌi rix lix cꞌaꞌuxeb. 2Cuan nequeꞌxcꞌoxla nak moco ma̱c ta xtzacanquil chixjunil li cꞌaꞌak re ru natzacaman. Cuanqueb ajcuiꞌ li toj kꞌuneb xchꞌo̱l saꞌ lix pa̱ba̱leb nequeꞌxcꞌoxla nak ma̱c xtzacanquil li tib. 3Li ani naxtzaca chixjunil li cꞌaꞌak re ru natzacaman incꞌaꞌ naru tixtzꞌekta̱na li ani incꞌaꞌ naxtzaca chixjunil li cꞌaꞌak re ru. Ut li ani incꞌaꞌ naxtzaca chixjunil li cꞌaꞌak re ru incꞌaꞌ naru naxcuechꞌi rix li jun chic li naxtzaca chixjunil xban nak aꞌan ac xcꞌuleꞌ ajcuiꞌ xban li Dios. 4La̱at incꞌaꞌ naru nacatrakoc a̱tin saꞌ xbe̱n lix mo̱s la̱ cuas a̱cui̱tzꞌin. Aꞌ lix patrón ta̱yehok re ma us malaj incꞌaꞌ us li yo̱ chixba̱nunquil. Joꞌcan nak li nimajcual Dios aꞌan nataklan re li junju̱nk ut aꞌan nayehoc reheb ma us malaj incꞌaꞌ us li yo̱queb chixba̱nunquil. Ut li Dios ta̱tenkꞌa̱nk reheb chixba̱nunquil li us. 5Cuan nequeꞌcꞌoxlan nak kꞌaxal lokꞌ junak cutan chiruheb li cutan jun chꞌol chic. Ut cuan ajcuiꞌ nequeꞌcꞌoxlan re nak juntakꞌe̱t xlokꞌal chixjunileb li cutan. Abanan tento nak li junju̱nk tixcꞌoxla chi us chanru tixba̱nu. 6Li ani naxqꞌue xlokꞌal junak li cutan, aꞌan naxba̱nu re xlokꞌoninquil li Dios. Ut joꞌcan ajcuiꞌ li natiꞌoc tib naxba̱nu aꞌan re xlokꞌoninquil li Dios ut naxbantioxi ajcuiꞌ chiru li Dios. Ut li ani incꞌaꞌ natiꞌoc tib, xlokꞌoninquil ajcuiꞌ li Dios naxba̱nu nak incꞌaꞌ natiꞌoc tib, ut naxbantioxi ajcuiꞌ chiru li Dios. 7Ma̱ ani yoꞌyo ta yal xjunes rib. Ut ma̱ ani ajcuiꞌ nacam chi yal xjunes rib xban nak ma̱cuaꞌ la̱o yal ke saꞌ xbe̱n li kayuꞌam. 8Nak yoꞌyo̱co nakaqꞌue xlokꞌal li Ka̱cuaꞌ Dios riqꞌuin li kayuꞌam. Ut nak nococam, nakaqꞌue ajcuiꞌ xlokꞌal riqꞌuin li kacamic. Joꞌcan ut cui yoꞌyo̱co ut cui nococam aꞌ yal re li Dios saꞌ kabe̱n xban nak aꞌan chic laj e̱chal ke. 9Joꞌcan nak quicam li Jesucristo, ut quicuacli cuiꞌchic chi yoꞌyo re nak aꞌanak li Ka̱cuaꞌ reheb li yoꞌyo̱queb joꞌ eb ajcuiꞌ li camenakeb. 10¿Cꞌaꞌut nak nacatrakoc a̱tin saꞌ xbe̱n la̱ cuech aj pa̱banelil? Ut, ¿cꞌaꞌut nak nacatzꞌekta̱naheb aj pa̱banel? Incꞌaꞌ naru ta̱ba̱nu chi joꞌcan xban nak saꞌ jun cutan li Cristo ta̱rakok a̱tin saꞌ kabe̱n chikajunilo. 11Tzꞌi̱banbil saꞌ li Santil Hu li quixye li Dios:

Relic chi ya̱l ninye e̱re nak chixjunileb teꞌxcuikꞌib rib chicuu ut tineꞌxlokꞌoni ut chixjunileb teꞌxye riqꞌuin xtzꞌu̱mal re nak la̱in li tzꞌakal Dios. (Isa. 45:23)

12Joꞌcan nak chikajunilo toxkakꞌaxtesi li kayehom kaba̱nuhom chiru li Dios.

Incꞌaꞌ taxak ta̱chꞌina̱nk xchꞌo̱l la̱ herma̱n a̱ban la̱at

13Chikacanabak xcuechꞌinquil kib chi kibil kib ut chikaba̱nu li us re nak li kech aj pa̱banelil incꞌaꞌ teꞌchꞌina̱nk xchꞌo̱leb saꞌ lix pa̱ba̱leb chi moco teꞌoc cuiꞌchic chi ma̱cobc kaban. 14Xban nak ninpa̱b li Cristo, joꞌcan nak ninnau nak ma̱cꞌaꞌ re̱cꞌ xtzacanquil li cꞌaꞌak re ru. Abanan cui junak narecꞌa saꞌ xchꞌo̱l nak ma̱c xtzacanquil junak tzacae̱mk, us cui incꞌaꞌ tixba̱nu. 15Cui riqꞌuin li cꞌaꞌru nacatzaca nachꞌinan xchꞌo̱l la̱ cuech aj pa̱banelil, aꞌan naraj naxye nak incꞌaꞌ nacara la̱ cuech aj pa̱banelil. Ma̱poꞌ xchꞌo̱leb la̱ cuech aj pa̱banelil riqꞌuin li cꞌaꞌru nacatzaca xban nak li Jesucristo quicam ajcuiꞌ saꞌ xcꞌabaꞌ eb aꞌan. 16La̱at nacanau nak us li yo̱cat chixba̱nunquil, abanan chaqꞌuehak retal li cꞌaꞌru ta̱ba̱nu re nak ma̱ ani ta̱yehok nak incꞌaꞌ us li yo̱cat chixba̱nunquil. 17Lix cuanquilal li Dios incꞌaꞌ nakatau riqꞌuin cꞌaꞌru nakatzaca chi moco riqꞌuin li cꞌaꞌru nakucꞌ; natauman ban riqꞌuin li ti̱quilal, li tuktu̱quil usilal ut li sahil chꞌo̱lejil li naxqꞌue ke li Santil Musikꞌej. 18Joꞌcan nak li ani nacꞌanjelac chiru li Cristo saꞌ ti̱quilal ut chi sa saꞌ xchꞌo̱l, li Dios nasahoꞌ xchꞌo̱l riqꞌuin. Ut naqꞌueheꞌ ajcuiꞌ xlokꞌal xbaneb li ras ri̱tzꞌin. 19Joꞌcan nak chikaqꞌuehak kachꞌo̱l chi cua̱nc saꞌ tuktu̱quil usilal riqꞌuineb li kas ki̱tzꞌin. Ut chikatenkꞌa kib chi kibil kib re nak toqꞌui̱k saꞌ li kapa̱ba̱l. 20Ma̱poꞌ xcꞌanjel li Dios riqꞌuin li cꞌaꞌak re ru nacatzaca. Ya̱l nak chixjunil naru xtzacanquil. Abanan cui la̱ herma̱n nachꞌinan xchꞌo̱l riqꞌuin li nacatzaca, incꞌaꞌ us li yo̱cat chixba̱nunquil. 21Li us xba̱nunquil, aꞌan aꞌin: cui nachꞌinan xchꞌo̱l la̱ herma̱n xban nak nacattiꞌoc tib ut nacat-ucꞌac vino, mattiꞌoc tib ut mat-ucꞌac vino. Incꞌaꞌ ta̱ba̱nu li cꞌaꞌak re ru ta̱chꞌina̱nk cuiꞌ xchꞌo̱l la̱ herma̱n re nak incꞌaꞌ ta̱ma̱cobk a̱ban. 22Cui nacanau chi tzꞌakal nak us yo̱cat chixba̱nunquil, canab saꞌ rukꞌ li Dios. Us xak re li ani narecꞌa saꞌ xchꞌo̱l nak moco ma̱c ta li yo̱ chixba̱nunquil. 23Cui junak narecꞌa saꞌ xchꞌo̱l nak ma̱c xtzacanquil junak tzacae̱mk, ut cui naxtzaca, aꞌan cuan xma̱c chiru li Dios. Cui nakecꞌa saꞌ li ka̱m nak incꞌaꞌ us xba̱nunquil li cꞌaꞌru nakaba̱nu, ut cui nakaba̱nu, yo̱co chi ma̱cobc.

Currently Selected:

Romanos 14: kek

Highlight

Copy

Compare