Apocalipsis 14

Li ca̱hib xcuakxakcꞌa̱l mil (144,000) yo̱queb chi bicha̱nc re xlokꞌoninquil li Ka̱cuaꞌ

1Ut quin-iloc cuiꞌchic ut quicuil nak aran saꞌ xbe̱n li tzu̱l Sión xakxo li Jun li chanchan carner. Ut rochben aꞌan cuanqueb ca̱hib xcuakxakcꞌa̱l mil (144,000) chi cristian. Saꞌ xpe̱quemeb tzꞌi̱banbil lix cꞌabaꞌ li Jun li chanchan carner ut tzꞌi̱banbil ajcuiꞌ xcꞌabaꞌ lix Yucuaꞌ. 2Ut quicuabi jun yo̱ chi a̱tinac saꞌ choxa chanchan xya̱b lix cau ok li nimaꞌ. Chanchan nak namok li ca̱k. Ut chanchan xya̱beb li arpa nak yo̱queb xchꞌeꞌbal. 3Quicuabi nak yo̱queb chixbichanquil jun li acꞌ bich chiru li cꞌojcꞌo saꞌ li lokꞌlaj cꞌojariba̱l, chiruheb li ca̱hib li chanchaneb ángel li yoꞌyo̱queb, ut chiruheb li ca̱hib xcaꞌcꞌa̱l li cꞌojcꞌo̱queb saꞌ xcꞌojariba̱leb. Ma̱ ani chic queꞌru xtzolbal li bich aꞌin. Caꞌaj cuiꞌ eb li ca̱hib xcuakxakcꞌa̱l mil (144,000) li queꞌcoleꞌ saꞌ xya̱nkeb li cuanqueb saꞌ ruchichꞌochꞌ. 4Aꞌaneb aꞌin li queꞌpa̱ban re li Jun li chanchan carner, li queꞌta̱ken re yalak bar, li incꞌaꞌ queꞌxmux ribeb riqꞌuin ixk chi incꞌaꞌ sumsu̱queb.#Saꞌ li versículo 14:4 naxye nak incꞌaꞌ queꞌxmux ribeb riqꞌuin ixk chi incꞌaꞌ sumsu̱queb. Naraj naxye nak incꞌaꞌ queꞌxlokꞌoni jalanil dios. Queꞌxpa̱b ban li Dios chi tzꞌakal. Aꞌineb li xbe̱n queꞌcoleꞌ saꞌ xya̱nkeb li cuanqueb saꞌ ruchichꞌochꞌ re nak teꞌoc chokꞌ ralal xcꞌajol li Dios ut chokꞌ ralal xcꞌajol li Jun li chanchan carner. 5Incꞌaꞌ queꞌticꞌtiꞌic. Chiru li Dios ma̱cꞌaꞌ xma̱queb.

Li oxib chi ángel

6Ut quicuil jun chic li ángel yo̱ chi rupupic chiru choxa. Yo̱ chixyebal jun esilal li ma̱cꞌaꞌ rosoꞌjic reheb chixjunileb li cuanqueb saꞌ ruchichꞌochꞌ aꞌ yal ani xte̱paleb lix xeꞌto̱nil yucuaꞌeb, ut aꞌ yal bar xtenamiteb ut aꞌ yal chanru li ra̱tinoba̱leb. 7Yo̱ chixyebal chi cau xya̱b xcux: —Chexucua̱k ru li Dios ut cheqꞌue xlokꞌal xban nak xcuulac xkꞌehil nak ta̱rakok a̱tin saꞌ xbe̱neb li cuanqueb saꞌ ruchichꞌochꞌ. Chelokꞌonihak aꞌan li quiyi̱ban re li choxa, li ruchichꞌochꞌ, ut li palau joꞌqueb ajcuiꞌ li yuꞌam haꞌ, chan. 8Jun chic li ángel yo̱ chi ta̱ke̱nc re ut yo̱ chixyebal: —Ac xsacheꞌ xcuanquil li nimla tenamit Babilonia. Ac xsacheꞌ ru li tenamit. Aꞌan li quicꞌamoc xbeheb chixjunileb li tenamit chi ma̱cobc. Chanchan nak quixcaltesiheb nak quixqꞌueheb chixba̱nunquil li ma̱usilal, chan. 9Ut quicuil li rox ángel, yo̱ chixta̱kenquil li cuib chic. Li jun aꞌin yo̱ chixyebal chi cau xya̱b xcux: —Li ani tixlokꞌoni li joskꞌ aj xul malaj ut lix jalam u̱ch, ut tixcꞌul li retalil saꞌ xpe̱quem malaj chi rukꞌ, 10aꞌan tixcꞌul nabal li raylal nak li Dios ta̱rakok a̱tin saꞌ xbe̱neb riqꞌuin xjoskꞌil. Chiruheb li santil ángel ut chiru li Jun li chanchan carner ta̱rahobtesi̱k riqꞌuin azufre yo̱ xxamlel nak ta̱qꞌuehekꞌ chixtojbal rix lix ma̱c. 11Junelic kꞌe cutan yo̱keb chi cꞌuluc raylal li nequeꞌxlokꞌoni li joskꞌ aj xul malaj ut lix jalam u̱ch, li queꞌxcꞌul li retalil lix cꞌabaꞌ saꞌ xpe̱quemeb malaj chi rukꞌeb. Chi kꞌek chi cutan yo̱keb chi cꞌuluc raylal, chan. 12Joꞌcan nak cauhakeb taxak xchꞌo̱leb li ralal xcꞌajol li Dios, eb li nequeꞌba̱nun re lix chakꞌrab li Dios ut nequeꞌpa̱ban saꞌ xcꞌabaꞌ li Jesucristo. Incꞌaꞌ taxak ta̱chꞌina̱nk xchꞌo̱leb saꞌ xpa̱ba̱leb. 13Ut quicuabi jun yo̱ chi a̱tinac saꞌ choxa ut quixye cue: —Tzꞌi̱ba li a̱tin aꞌin: Chalen anakcuan us xak reheb li nequeꞌcam, li ac xeꞌxpa̱b li Ka̱cuaꞌ. Ya̱l. Us xak reheb, chan li Santil Musikꞌej, xban nak teꞌhila̱nk chixba̱nunquil li cha̱bil cꞌanjel li ac xeꞌxba̱nu ut teꞌxcꞌul xkꞌajca̱munquil.—

Nak quirakeꞌ a̱tin saꞌ xbe̱neb li cuanqueb saꞌ ruchichꞌochꞌ

14Ut quicuil jun li saki chok. Ut saꞌ li chok aꞌan, chunchu li Jun chanchan cui̱nk. Aꞌan li Cꞌajolbej. Ut saꞌ xjolom cuan jun li corona yi̱banbil riqꞌuin oro ut saꞌ rukꞌ cuan jun li kꞌesnal chꞌi̱chꞌ cꞌoncꞌo. 15Ut jun chic li ángel qui-el chak saꞌ xtemplo li Dios. Yo̱ chi a̱tinac riqꞌuin li Jun li cꞌojcꞌo saꞌ xbe̱n li chok ut quixye re chi cau xya̱b xcux: —Tiquib xyocꞌbal li acui̱mk saꞌ ruchichꞌochꞌ. Ac xcuulac xkꞌehil xxocbal li ru li acui̱mk xban nak ac xkꞌanoꞌ, chan. 16Ut li cꞌojcꞌo saꞌ li chok quixtiquib xyocꞌbal li acui̱mk saꞌ ruchichꞌochꞌ ut quixxoc li ru. 17Ut jun chic li ángel qui-el saꞌ xtemplo li Dios, li cuan saꞌ choxa. Cuan ajcuiꞌ saꞌ rukꞌ aꞌan jun li kꞌesnal chꞌi̱chꞌ. 18Ut jun chic li ángel qui-el cuan cuiꞌ li artal. Aꞌan li qui-iloc re li xam li naqꞌueman saꞌ xbe̱n li artal. Quia̱tinac riqꞌuin li ángel li cuan xkꞌesnal chꞌi̱chꞌ saꞌ rukꞌ ut quixye re chi cau xya̱b xcux: —Ta̱set chi cu̱t riqꞌuin la̱ kꞌesnal chꞌi̱chꞌ li ru li uva li cuanqueb saꞌ ruchichꞌochꞌ xban nak ac xkꞌanoꞌ, chan. 19Ut li ángel quixyocꞌ li ru li uva li cuan saꞌ ruchichꞌochꞌ. Ut quixcut saꞌ li nimla naꞌajej bar nayatzꞌman cuiꞌ li uva. Li yatzꞌleba̱l aꞌan retalil lix joskꞌil li Dios saꞌ xbe̱neb li tenamit. 20Ut queꞌxyatzꞌ li ru li uvas saꞌ li yatzꞌleba̱l li cuan chirix li tenamit. Ut nabal li xyaꞌal. Chanchan nimaꞌ nak qui-el saꞌ li yatzꞌleb. Quicuulac toj saꞌ reheb li cacua̱y ut quibe̱c rok lix yaꞌal ut oxib ciento kilómetro rok quicuulac. (Lix yaꞌal li ru li uvas aꞌan retalil xquiqꞌueleb li cristian li teꞌcamsi̱k nak ta̱rakekꞌ a̱tin saꞌ xbe̱neb).

Currently Selected:

Apocalipsis 14: kek

Highlight

Copy

Compare