Apocalipsis 13

Li joskꞌ aj xul li qui-el chak saꞌ li palau

1Ut li dragón quixakli chire li palau ut quicuil nak qui-el chak saꞌ li palau jun chic chanchan joskꞌ aj xul cuan cuukub xjolom ut laje̱b lix xucub. Ut saꞌ li laje̱b chi xucub cuan junju̱nk lix corona. Ut tzꞌi̱banbil saꞌ eb lix jolom jun li cꞌabaꞌej re xmajecuanquil li Ka̱cuaꞌ. 2Li joskꞌ aj xul li quicuil, aꞌan chanchan hix. Eb li rok chanchan rok li xul oso. Ut li ruch re chanchan ruch re li cakcoj. Ut li dragón quixqꞌue lix cacuilal ut lix cꞌojariba̱l re li joskꞌ aj xul. Ut quixqꞌue ajcuiꞌ xcuanquil. 3Ut quicuil nak jun reheb lix jolom li joskꞌ aj xul yocꞌol ut chanchan ca̱mc re. Abanan quiqꞌuira. Sachso xchꞌo̱leb li tenamit queꞌcana chirilbal nak quiqꞌuira. Ut queꞌxta̱ke li joskꞌ aj xul. 4Ut queꞌxqꞌue xlokꞌal li dragón xban nak quixqꞌue xcuanquil li joskꞌ aj xul. Ut queꞌxlokꞌoni ajcuiꞌ li joskꞌ aj xul ut queꞌxye: —¿Ani ta cuiꞌ cuan xcuanquil joꞌ li joskꞌ aj xul aꞌin? Ma̱ ani tixcuy pletic riqꞌuin aꞌan xban nak quiqꞌueheꞌ xcuanquil xban li dragón, chanqueb. 5Ut quiqꞌueheꞌ xcuanquil li joskꞌ aj xul chi a̱tinac ut chixba̱nunquil li cꞌaꞌru ta̱raj. Kꞌaxal kꞌetkꞌet li xul ut yo̱ chixmajecuanquil li Dios. Sachba chꞌo̱lej quixba̱nu chiru oxib chihab riqꞌuin cuakib po. 6Ut li joskꞌ aj xul quixmajecua li Dios ut quixmajecua ajcuiꞌ lix santil naꞌaj. Ut quixmajecua li cuanqueb saꞌ choxa. 7Quiqꞌueheꞌ xcuanquil chi pletic riqꞌuineb li ralal xcꞌajol li Dios ut quinumta saꞌ xbe̱neb. Quiqꞌueheꞌ xcuanquil saꞌ xbe̱neb chixjunileb, aꞌ yal ani xte̱paleb lix xeꞌto̱nil yucuaꞌeb, ut aꞌ yal bar xtenamiteb ut aꞌ yal chanru li ra̱tinoba̱leb. 8Ut chixjunileb li cuanqueb saꞌ ruchichꞌochꞌ teꞌxlokꞌoni ru li joskꞌ aj xul aꞌan. Teꞌxlokꞌoni li xul chixjunileb li incꞌaꞌ tzꞌi̱banbileb xcꞌabaꞌ saꞌ li hu li tzꞌi̱banbil cuiꞌ xcꞌabaꞌeb li cuanqueb xyuꞌam chi junelic, li cuan riqꞌuin li Jun li chanchan carner, li ac xakabanbil chak re camsi̱c saꞌ xticlajic li ruchichꞌochꞌ. 9Li ani ta̱raj xtaubal ru lix ya̱lal, chixqꞌuehak retal aꞌin: 10Li ani tento ta̱xic chi pre̱xil, xicak chi pre̱xil. Ut li ani tento ta̱camsi̱k riqꞌuin chꞌi̱chꞌ, chicamsi̱k riqꞌuin chꞌi̱chꞌ. Joꞌcan nak cauhakeb taxak xchꞌo̱leb li ralal xcꞌajol li Dios. Teꞌxcuy taxak xnumsinquil li raylal ut incꞌaꞌ ta chichꞌina̱nk xchꞌo̱leb.

Li joskꞌ aj xul li qui-el chak saꞌ chꞌochꞌ

11Ut chirix aꞌan quicuil jun chic li joskꞌ aj xul qui-el chak saꞌ chꞌochꞌ. Cuan cuib lix cocꞌ xucub chanchan lix xucub li carner. Ut naa̱tinac joꞌ naa̱tinac li dragón. 12Li xul aꞌan cuan xcuanquil joꞌ li joskꞌ aj xul li quiyoqꞌueꞌ jun xjolom ut quicam raj abanan quiqꞌuira. Ut chiru ajcuiꞌ aꞌan naxmin ruheb chixjunileb li cuanqueb saꞌ ruchichꞌochꞌ re nak teꞌxlokꞌoni li joskꞌ aj xul. 13Li xcab joskꞌ aj xul quixba̱nu sachba chꞌo̱lej. Naxcubsi chak xam saꞌ choxa toj saꞌ ruchichꞌochꞌ yal re nak eb li cristian teꞌril. 14Quixbalakꞌiheb li cuanqueb saꞌ ruchichꞌochꞌ riqꞌuin li sachba chꞌo̱lej li quiqꞌueheꞌ re xba̱nunquil chiru li joskꞌ aj xul. Ut quixye reheb li cuanqueb saꞌ ruchichꞌochꞌ nak teꞌxyi̱b jun xjalam u̱ch li joskꞌ aj xul li quiyoqꞌueꞌ riqꞌuin chꞌi̱chꞌ ut quiqꞌuira. 15Ut li xcab xul quiqꞌueheꞌ xcuanquil re nak tixqꞌue xmusikꞌ lix jalam u̱ch li xbe̱n joskꞌ aj xul re ta̱a̱tinak ut tixqꞌue chi ca̱mc li ani incꞌaꞌ ta̱qꞌuehok xlokꞌal. 16Quixpuersi ruheb chixjunileb re nak teꞌxcꞌul li retalileb saꞌ lix nim ukꞌ malaj saꞌ xpe̱quemeb. Queꞌqꞌueheꞌ retalileb chixjunileb li cuanqueb xcuanquil joꞌ ajcuiꞌ li ma̱cꞌaꞌeb xcuanquil, eb li biom joꞌ eb ajcuiꞌ li nebaꞌ, eb li lokꞌbil mo̱s joꞌ ajcuiꞌ li ma̱cꞌaꞌeb xpatrón. 17Cui ma̱cꞌaꞌ li retalileb saꞌ xnim ukꞌ malaj saꞌ xpe̱quemeb, incꞌaꞌ ta̱ru̱k teꞌlokꞌok chi moco ta̱ru̱k teꞌcꞌayi̱nk. Li retalil li teꞌqꞌuehekꞌ, aꞌan xcꞌabaꞌ li joskꞌ aj xul. Lix cꞌabaꞌ aꞌan, aꞌan ajcuiꞌ jun li número. 18Aꞌin naraj nak cua̱nk xnaꞌleb li ani ta̱ilok re. Li ani cuan xnaꞌleb naru tixsicꞌ cꞌaꞌru xya̱lal. Naru ta̱rajla lix letril lix cꞌabaꞌ li joskꞌ aj xul ut ta̱e̱lk lix número jun li cui̱nk. Li número aꞌan cuakib ciento riqꞌuin cuakib xca̱cꞌa̱l (666).

Currently Selected:

Apocalipsis 13: kek

Highlight

Copy

Compare