Filipenses 4
4
Junelic taxak cauhak le̱ chꞌo̱l saꞌ le̱ pa̱ba̱l
1Ex inherma̱n, raro̱quex inban, nacuaj rilbal e̱ru. Cꞌajoꞌ nasahoꞌ inchꞌo̱l e̱ban. Nincꞌoxla nak la̱ex joꞌ jun inkꞌajca̱munquil riqꞌuin li cꞌanjel xinba̱nu saꞌ e̱ya̱nk. Junelic taxak cauhak e̱chꞌo̱l saꞌ le̱ pa̱ba̱l. 2Ut nintzꞌa̱ma ajcuiꞌ chiruheb lix Evodia ut lix Síntique nak teꞌxyi̱b ru lix chꞌaꞌajquilaleb saꞌ xya̱lal re nak junajakeb chic xchꞌo̱leb chiru li Ka̱cuaꞌ. 3Joꞌcan nak nintzꞌa̱ma chiru nak tixtenkꞌaheb li ixk aꞌin. Cau xeꞌcꞌanjelac chintenkꞌanquil xyebal resil li colba-ib. Joꞌcan ajcuiꞌ xba̱nu laj Clemente ut chixjunileb li cuech aj cꞌanjelil. Eb aꞌan tzꞌi̱banbil xcꞌabaꞌeb xban li Dios saꞌ li hu tzꞌi̱banbil cuiꞌ xcꞌabaꞌeb chixjunileb li colbileb. 4Chisahokꞌ taxak saꞌ e̱chꞌo̱l chi junelic xban nak junajex chic riqꞌuin li Ka̱cuaꞌ. Ut jun sut chic tinye e̱re: Chisahokꞌ taxak saꞌ e̱chꞌo̱l. 5Junelic chexcua̱nk saꞌ tu̱lanil re nak chixjunileb teꞌxqꞌue retal le̱ cha̱bilal. Ut chijulticokꞌ ajcuiꞌ e̱re nak chi se̱b ta̱cha̱lk li Ka̱cuaꞌ. 6Ma̱cꞌaꞌ cꞌaꞌak re ru yo̱k cuiꞌ e̱cꞌaꞌux. Cheye ban re li Ka̱cuaꞌ cꞌaꞌru le̱ chꞌaꞌajquilal. Ut junelic nak textijok ut nak textzꞌa̱ma̱nk chiru li Ka̱cuaꞌ, chexbantioxi̱nk ajcuiꞌ chiru li Dios. 7Ut li Dios ta̱qꞌuehok e̱re li tuktu̱quil usilal. Aꞌan kꞌaxal lokꞌ chiru chixjunil li cꞌaꞌru nakacꞌoxla la̱o. Ut li tuktu̱quil usilal li naxqꞌue li Dios tixcꞌojob le̱ chꞌo̱l ut tixtukub le̱ cꞌaꞌux xban nak junajex chic riqꞌuin li Cristo.
Junelic chexcꞌoxlak chirix li cꞌaꞌak re ru ya̱l ut cha̱bil
8Ut anakcuan, jun chic nacuaj xyebal e̱re. Aꞌan aꞌin: junelic chexcꞌoxlak chirix li cꞌaꞌru ya̱l ut li cꞌaꞌru cha̱bil. Chexcꞌoxlak chirix li ti̱quilal, li santilal, ut li usilal. Junelic chexcꞌoxlak chirix li kꞌaxal cha̱bil ut li naru naxqꞌue xlokꞌal li Dios. 9Ut chixjunil li cꞌaꞌru xinye e̱re ut li cꞌaꞌru xinba̱nu che̱ru, aꞌan ajcuiꞌ te̱ba̱nu la̱ex. Chetzol e̱rib cuiqꞌuin ut cheba̱nu joꞌ ninba̱nu la̱in. Ut li Ka̱cuaꞌ Dios li naqꞌuehoc tuktu̱quil usilal ta̱cua̱nk e̱riqꞌuin.
Laj Pablo naxbantioxi lix ma̱tan li quiqꞌueheꞌ re xbaneb laj Filipos
10Kꞌaxal nasahoꞌ saꞌ inchꞌo̱l ut ninbantioxi chiru li Ka̱cuaꞌ nak qui-ala chak saꞌ e̱chꞌo̱l intenkꞌanquil. Ninnau nak incꞌaꞌ xecanab incꞌoxlanquil. Junxil incꞌaꞌ quixqꞌue rib che̱ru intenkꞌanquil. 11Incꞌaꞌ yo̱quin chixyebal aꞌin e̱re xban nak cuan li cꞌaꞌru nacuaj. Ac xintzol cuib chi cua̱nc chi cꞌojcꞌo inchꞌo̱l riqꞌuin joꞌ nimal joꞌ chꞌinal cuan cue. 12Xincꞌay chi cuan chi ma̱cꞌaꞌ cꞌaꞌru cue ut xincꞌay ajcuiꞌ chi nabal cꞌaꞌru cue. Ac ninnau chanru li cua̱nc. Sa saꞌ inchꞌo̱l nak cuan incua ut sa ajcuiꞌ saꞌ inchꞌo̱l nak ma̱cꞌaꞌ incua. Cꞌaynakin chi cua̱nc chi sa saꞌ inchꞌo̱l usta cuan nabal cꞌaꞌru cue, usta ma̱cꞌaꞌ. 13La̱in nincuy xnumsinquil chixjunil li raylal xban nak li Cristo naxqꞌue xcacuilal inchꞌo̱l re nak tincuy xnumsinquil. 14Abanan, ninbantioxi e̱re nak niquine̱cꞌoxla ut nak quine̱tenkꞌa nak cuanquin saꞌ chꞌaꞌajquilal. 15Ex inherma̱n, li cuanquex Filipos, ac nequenau nak junxil nak xintiquib xyebal resil li colba-ib, eb li herma̱n li cuanqueb saꞌ jalan naꞌajej incꞌaꞌ xineꞌxtenkꞌa. Caꞌaj cuiꞌ la̱ex xextenkꞌan cue re xkꞌaxbal li cutan nak xin-el Macedonia. 16Ut xine̱tenkꞌa ajcuiꞌ nak cuanquin Tesalónica. Cuib oxib sut xetakla intumin re nak cua̱nk li cꞌaꞌru ta̱cꞌanjelak cue. 17Incꞌaꞌ yo̱quin xtzꞌa̱manquil intenkꞌanquil e̱re. Li nacuaj la̱in, aꞌan aꞌin: nak te̱cꞌul le̱ kꞌajca̱munquil li tixqꞌue e̱re li Dios xban nak nequextenkꞌan. 18Anakcuan cuan chixjunil li cꞌaꞌru nacuaj. Tzꞌakal ajcuiꞌ li cꞌaꞌru cuan cue xban nak xincꞌul lin ra̱bal li xetakla chak cue chirix laj Epafrodito. Li ma̱tan aꞌan li xetakla cue, aꞌan jun cha̱bil mayej li nacuulac chiru li Dios. 19Lin Dios, aꞌan aj e̱chal re chixjunil ut kꞌaxal nim lix lokꞌal. Tixqꞌue e̱re chixjunil li napaltoꞌ e̱re saꞌ xcꞌabaꞌ li Jesucristo. 20Lokꞌoninbil taxak li Dios li kaYucuaꞌ anakcuan ut chi junelic kꞌe cutan. Joꞌcan taxak.
Laj Pablo naxtakla xsahil xchꞌo̱leb
21Cheqꞌue xsahil xchꞌo̱leb chixjunileb li nequeꞌpa̱ban re li Jesucristo. Eb li herma̱n li cuanqueb arin cuiqꞌuin nequeꞌxtakla ajcuiꞌ xsahil e̱chꞌo̱l. 22Chixjunileb laj pa̱banel li cuanqueb arin nequeꞌxtakla xsahil e̱chꞌo̱l. Ut kꞌaxal cuiꞌchic nabal xsahil e̱chꞌo̱l nequeꞌxtakla laj pa̱banel li cuanqueb saꞌ rochoch li acuabej. 23Ut chicua̱nk taxak e̱riqꞌuin li rusilal li Ka̱cuaꞌ Jesucristo.
Currently Selected:
Filipenses 4: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.