Filipenses 3
3
Li ti̱quil chꞌo̱lej
1Anakcuan ut, ex inherma̱n, chisahokꞌ taxak saꞌ le̱ chꞌo̱l xban nak rehex chic li Cristo. Li cꞌaꞌru yo̱quin chixtzꞌi̱banquil, ac xinye ajcuiꞌ e̱re. Usta ac xinye e̱re, tinye cuiꞌchic e̱re. Incꞌaꞌ nintitzꞌ xyebal xban nak ninnau nak ta̱cꞌanjelak che̱ru. 2Checol e̱rib chiruheb laj balakꞌ. Eb aꞌan chanchaneb li tzꞌiꞌ xban nak ma̱cꞌaꞌeb xnaꞌleb. Nequeꞌxye nak incꞌaꞌ naru tocolekꞌ cui toj ma̱jiꞌ nakacꞌul li circuncisión. 3La̱o ac xkacꞌul li tzꞌakal circuncisión xban nak la̱o nakalokꞌoni li Dios joꞌ naxcꞌut chiku li Santil Musikꞌej. Aꞌan li tzꞌakal circuncisión. La̱o nasahoꞌ li kachꞌo̱l nak junajo chic riqꞌuin li Cristo yal xban xnimal rusilal. Ma̱cuaꞌ riqꞌuin li nakaba̱nu la̱o kajunes. 4La̱in xinba̱nu chixjunil li nequeꞌxye eb aꞌan nak tento xba̱nunquil ut naru raj tinqꞌue xcacuilal inchꞌo̱l riqꞌuin. Cui cuan junak naxcꞌoxla nak ac xba̱nu chixjunil, us ajcuiꞌ. Abanan kꞌaxal cuiꞌchic nabal xinba̱nu la̱in chiru aꞌan. 5La̱in tzꞌakalin aj Israel. Cuakxakib cutan cuan cue nak xincꞌul li circuncisión. Lin naꞌ inyucuaꞌ aj hebreo xcomoneb xte̱pal laj Benjamín. La̱in ajcuiꞌ xcomoneb laj fariseo li nequeꞌxba̱nu chixjunil li tzꞌi̱banbil saꞌ li chakꞌrab li quiqꞌueheꞌ re laj Moisés. 6Xinqꞌue inchꞌo̱l chixba̱nunquil chixjunil li chakꞌrab li nequeꞌxba̱nu laj fariseo toj retal nak quinrahobtesiheb laj pa̱banel. Chiruheb laj fariseo ma̱cꞌaꞌ inma̱c xban nak xinba̱nu chixjunil li tzꞌi̱banbil saꞌ li chakꞌrab. 7Junxil chixjunil aꞌin xinqꞌue xcuanquil. Abanan anakcuan ninye nak ma̱cꞌaꞌ na-oc cuiꞌ xban nak kꞌaxal cuiꞌchic lokꞌ xpa̱banquil li Cristo. 8Relic chi ya̱l chixjunil li cꞌaꞌak re ru xinba̱nu chak junxil ma̱cꞌaꞌ chic na-oc cuiꞌ chicuu anakcuan xban nak kꞌaxal cuiꞌchic nim xlokꞌal xpa̱banquil li Ka̱cuaꞌ Jesucristo. Re nak la̱inak chic re li Cristo, xintzꞌekta̱na chixjunil li xinba̱nu chak junxil. Aꞌan yal mul aj chic chicuu anakcuan. 9La̱in nacuaj nak junajakin riqꞌuin li Jesucristo. Incꞌaꞌ naru ta̱cua̱nk xti̱quilal inchꞌo̱l chiru li Dios yal riqꞌuin xba̱nunquil li naxye li chakꞌrab li quiqꞌueheꞌ re laj Moisés. Li Dios naxqꞌue xti̱quilal inchꞌo̱l riqꞌuin xpa̱banquil li Cristo. 10Xincanab xba̱nunquil chixjunil li quinba̱nu chak junxil re nak tincua̱nk chi sum a̱tin riqꞌuin li Cristo. Nacuaj xcꞌulbal lix cuanquilal li Dios li quicuaclesin cuiꞌchic re li Cristo chi yoꞌyo saꞌ xya̱nkeb li camenak. Nacuaj tintzꞌako̱nk riqꞌuin li raylal li quixcꞌul ut nacuaj nak tinba̱nu joꞌ quixba̱nu li Cristo nak quixqꞌue rib chi ca̱mc. 11Ut ninyoꞌoni nak li Dios tinixcuaclesi cuiꞌchic chi yoꞌyo saꞌ xya̱nkeb li camenak.
Chikayal kakꞌe re nak ta̱tzꞌaklok ru li kapa̱ba̱l
12Incꞌaꞌ ninye nak ac xtzꞌakloc ru lin pa̱ba̱l chi moco ninye nak ac xincꞌul chixjunil lix cuanquilal. Abanan yo̱quin chixyalbal inkꞌe re nak toxincue̱chani chixjunil li tinma̱tani riqꞌuin li Jesucristo xban nak li Jesucristo quinixqꞌue chokꞌ ralal. 13Ex inherma̱n, ninnau nak toj ma̱jiꞌ nincꞌul chixjunil li tinma̱tani riqꞌuin li Cristo. Abanan li ninba̱nu, aꞌan aꞌin: Nincanab xcꞌoxlanquil li ac xnumeꞌ ut ninqꞌue inchꞌo̱l chire̱chaninquil li ta̱cha̱lk mokon. 14Ninyal inkꞌe chire̱chaninquil lin ma̱tan joꞌ nak naxyal xkꞌe junak chi a̱linac re ta̱re̱chani lix kꞌajca̱munquil. Abanan li tincue̱chani la̱in, aꞌan li junelic yuꞌam li naxyechiꞌi li Dios reheb li nequeꞌpa̱ban re li Jesucristo. 15Aꞌan taxak li chikara la̱o chikajunilo li ac cau kachꞌo̱l saꞌ li kapa̱ba̱l. Abanan cui la̱ex incꞌaꞌ nequecꞌoxla chi joꞌcan, li Dios ta̱cꞌutuk lix ya̱lal che̱ru. 16Joꞌcan nak chikacꞌoxlahak ut chikaba̱nuhak li joꞌ qꞌuial nakanau nak us xba̱nunquil. 17Ex inherma̱n, junajak taxak le̱ chꞌo̱l chixba̱nunquil li ninba̱nu la̱in. La̱in yo̱quin chi cꞌamoc be che̱ru saꞌ li ti̱quilal. Ut chetzolak ajcuiꞌ e̱rib riqꞌuineb li nequeꞌxba̱nu joꞌ ninba̱nu la̱in. 18Nabal sut ac xinye e̱re nak cuanqueb li incꞌaꞌ us yo̱queb chixba̱nunquil. Riqꞌuin li incꞌaꞌ us nequeꞌxba̱nu, nequeꞌxtzꞌekta̱na lix camic li Cristo chiru li cruz. Nayotꞌeꞌ inchꞌo̱l riqꞌuin li yo̱queb chixba̱nunquil ut ninya̱bac xban xrahil inchꞌo̱l nak ninye cuiꞌchic e̱re. 19Eb aꞌan incꞌaꞌ us yo̱queb. Li cꞌaꞌru nequeꞌxrahi ru xba̱nunquil, aꞌan chic lix dioseb chiruheb xban nak junes aꞌan chic nequeꞌxcꞌoxla. Nequeꞌxnimobresi ribeb riqꞌuin xba̱nunquil li incꞌaꞌ us, usta xuta̱nal raj chokꞌ reheb. Junes li cꞌaꞌru cuan saꞌ ruchichꞌochꞌ nequeꞌxcꞌoxla. Eb aꞌan teꞌsachekꞌ saꞌ li tojba ma̱c. 20Abanan la̱o nococꞌoxlac chirix li cuan saꞌ choxa xban nak la̱o reho chic li tzꞌakal Dios ut yo̱co chiroybeninquil nak tol-e̱lk cuiꞌchic li Ka̱cuaꞌ Jesucristo laj Colol ke. 21Aꞌan kꞌaxal nim xcuanquil saꞌ xbe̱n chixjunil li cꞌaꞌak re ru. Riqꞌuin lix nimal xcuanquilal, li Jesucristo tixjal li katibel li ma̱cꞌaꞌ xcuanquil ut tixqꞌue ke jun chic kꞌaxal lokꞌ joꞌ li re aꞌan.
Currently Selected:
Filipenses 3: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.