Filipenses 2
2
Chetzolak e̱rib riqꞌuin li Cristo
1Anakcuan nacuaj xpatzꞌbal e̱re: ¿Ma cuan xya̱lal chokꞌ e̱re la̱ex nak xepa̱b li Cristo? ¿Ma cꞌojcꞌo e̱chꞌo̱l xban nak raro̱quex xban li Cristo? ¿Ma junaj ru le̱ chꞌo̱l che̱junilex xban li Santil Musikꞌej li cuan e̱riqꞌuin? ¿Ma nequera e̱rib chi ribil e̱rib? ¿Ma nequeruxta̱na e̱ru chi ribil e̱rib? 2Anakcuan nintzꞌa̱ma ajcuiꞌ che̱ru nak junajak taxak e̱chꞌo̱l re nak junelic sahak saꞌ inchꞌo̱l e̱riqꞌuin. Cherahak e̱rib chi ribil e̱rib ut chexcua̱nk saꞌ xya̱lal chi ribil e̱rib ut junajak taxak le̱ cꞌaꞌux. 3Incꞌaꞌ te̱ba̱nu cꞌaꞌak re ru yal xban nak cuan li cꞌaꞌru te̱ra, chi moco te̱ba̱nu yal re xnimobresinquil e̱rib. Checubsihak ban e̱rib. Me̱cꞌoxla nak kꞌaxal nim e̱cuanquil chiruheb le̱ ras e̱ri̱tzꞌin. 4Mexcꞌoxlac caꞌaj cuiꞌ chirix cꞌaꞌru us chokꞌ e̱re la̱ex. Chexcꞌoxlak aj ban cuiꞌ chirix li us ta̱e̱lk chokꞌ reheb le̱ ras e̱ri̱tzꞌin. 5Chetzolak e̱rib riqꞌuin li Jesucristo re nak juntakꞌe̱tak le̱ naꞌleb riqꞌuin lix naꞌleb aꞌan. 6Li Jesucristo tzꞌakal Dios, aban incꞌaꞌ quicꞌoxlac xcanabanquil lix lokꞌal. 7Quixcanab ban lix lokꞌal nak quicꞌulun saꞌ ruchichꞌochꞌ. Tzꞌakal cui̱nk joꞌ la̱o nak quiyoꞌla saꞌ ruchichꞌochꞌ ut quicꞌanjelac saꞌ kaya̱nk. 8Ut nak quicuan saꞌ ruchichꞌochꞌ quixcubsi rib ut quixba̱nu li quiraj li Dios toj retal nak quicam chiru li cruz. 9Ut xban nak quixba̱nu chi joꞌcan, li Dios quixqꞌue xnimal xlokꞌal. “Ka̱cuaꞌ” quixqꞌue chokꞌ xcꞌabaꞌ xban nak aꞌan li kꞌaxal lokꞌ ut li kꞌaxal nim xcuanquil. 10Li Dios quixba̱nu aꞌan re nak chixjunileb teꞌxcuikꞌib rib chixlokꞌoninquil li Ka̱cuaꞌ Jesucristo nak teꞌrabi lix cꞌabaꞌ. Teꞌxcuikꞌib ribeb chixlokꞌoninquil chixjunileb li cuanqueb saꞌ choxa ut li cuanqueb saꞌ ruchichꞌochꞌ joꞌqueb ajcuiꞌ li camenakeb. 11Li Dios quixqꞌue xlokꞌal li Jesucristo re nak chixjunileb teꞌxchꞌolob xya̱lal riqꞌuin xtzꞌu̱mal re nak li Jesucristo, aꞌan li Ka̱cuaꞌ ut teꞌxqꞌue xlokꞌal li Acuabej Dios.
Eb laj pa̱banel, aꞌanakeb lix cutan xsaken li ruchichꞌochꞌ
12Ex inherma̱n, raro̱quex inban, junelic xexpa̱ban chicuu nak cuanquin chak e̱riqꞌuin. Joꞌcan ajcuiꞌ te̱ba̱nu anakcuan nak ma̱ anihin e̱riqꞌuin. Junelic chexcꞌoxlak chirix le̱ colbal. Cheqꞌuehak taxak e̱chꞌo̱l chixba̱nunquil li cꞌaꞌru naraj li Ka̱cuaꞌ re nak ta̱tzꞌaklok ru le̱ colbal. 13Li Dios yo̱ chi cꞌanjelac e̱riqꞌuin ut yo̱ che̱tenkꞌanquil re nak saꞌ le̱ chꞌo̱l ta̱ala̱k chak xba̱nunquil li cꞌaꞌru naraj ut aꞌan ajcuiꞌ naqꞌuehoc e̱cuanquil chixba̱nunquil. 14Me̱choki e̱rib ut me̱cuechꞌi e̱rib. Cheba̱nuhak ban chixjunil saꞌ xya̱lal. 15Cheba̱nuhak chixjunil saꞌ xya̱lal re nak chicꞌutu̱nk nak chi anchal e̱chꞌo̱l nequexpa̱ban ut re nak ma̱ ani ta̱a̱tinak che̱rix. La̱ex ralal xcꞌajol li Dios ut ma̱cꞌaꞌak e̱ma̱c usta cuanquex saꞌ xya̱nkeb laj ma̱c, li incꞌaꞌ useb xnaꞌleb. Ut xban nak ti̱c e̱chꞌo̱l, nak yo̱kex chixyebal resil li colba-ib chiruheb, chiruheb chanchanakex li chahim li nalemtzꞌun chiru kꞌojyi̱n. 16Cui joꞌcan yo̱kex, cꞌajoꞌ nak ta̱sahokꞌ saꞌ inchꞌo̱l e̱riqꞌuin nak tol-e̱lk cuiꞌchic li Jesucristo. Ta̱sahokꞌ inchꞌo̱l xban nak tinnau nak cuan rajbal chixjunil li xinba̱nu nak xincꞌanjelac saꞌ e̱ya̱nk. 17Cui tincamsi̱k xban nak xexintenkꞌa saꞌ le̱ pa̱ba̱l, ma̱cꞌaꞌ naxye. Ta̱sahokꞌ saꞌ inchꞌo̱l nak textzꞌako̱nk la̱ex riqꞌuin li sahil chꞌo̱lejil li tincꞌul la̱in. 18Chisahokꞌ taxak saꞌ kachꞌo̱l saꞌ comonil.
Laj Timoteo ut laj Epafrodito taklanbileb xban laj Pablo riqꞌuineb laj Filipos
19Cui li Ka̱cuaꞌ Jesucristo naraj, chi se̱b tintakla laj Timoteo che̱rilbal. Ta̱cꞌojla̱k inchꞌo̱l nak tincuabi e̱resil. 20Ma̱ jun chic cuan juntakꞌe̱t xcꞌaꞌux cuiqꞌuin joꞌ laj Timoteo. Aꞌan kꞌaxal nacꞌoxlac ajcuiꞌ che̱rix la̱ex. 21Eb li jun chꞌol chic junes li us chokꞌ reheb aꞌan nequeꞌxcꞌoxla ut incꞌaꞌ nequeꞌxcꞌoxla xba̱nunquil li naraj li Jesucristo. 22Ac nequenau nak cha̱bil xnaꞌleb laj Timoteo. Nequenau chanru nak naxqꞌue xchꞌo̱l chi cꞌanjelac cuochben chixyebal resil li colba-ib. Ninxtenkꞌa joꞌ junak alalbej naxtenkꞌa lix yucuaꞌ. 23Joꞌcan nak nacuaj xtaklanquil laj Timoteo e̱riqꞌuin nak ac xinnau chanru tincana̱k cuiꞌ arin. 24Ut ninnau nak li Ka̱cuaꞌ tinixtenkꞌa re nak ta̱ru̱k tincuulak chi junpa̱t e̱riqꞌuin. 25Ut nincꞌoxla ajcuiꞌ nak tento tintakla li herma̱n Epafrodito e̱riqꞌuin. Aꞌan naxqꞌue ajcuiꞌ xchꞌo̱l chi cꞌanjelac cuochben ut aꞌan li xetakla chak chintenkꞌanquil saꞌ e̱cꞌabaꞌ la̱ex. 26Ta̱raj cuiꞌchic rilbal e̱ru. Yo̱ che̱cꞌoxlanquil xban nak naxnau nak xerabi resil nak xyajer. 27Ya̱l nak quiyajer. Caꞌchꞌin chic ma̱ quicam. Abanan li Dios quiril xtokꞌoba̱l ru ut quiril ajcuiꞌ xtokꞌoba̱l cuu la̱in. Joꞌcan nak quixqꞌuirtesi. Cui ta quicam, kꞌaxal raj cuiꞌchic quixqꞌue xrahil inchꞌo̱l. 28Joꞌcan nak nacuaj xtaklanquil chi junpa̱t e̱riqꞌuin re nak ta̱sahokꞌ saꞌ e̱chꞌo̱l nak te̱ril cuiꞌchic ru. Ut ta̱sahokꞌ ajcuiꞌ saꞌ inchꞌo̱l la̱in nak ta̱cuulak e̱riqꞌuin. La̱in ninnau nak aꞌan chic ta̱tenkꞌa̱nk e̱re. 29Checꞌulak chi kꞌaxal sa saꞌ e̱chꞌo̱l xban nak kech aj pa̱banelil kib. Cheqꞌuehak xlokꞌal eb laj pa̱banel joꞌ li jun aꞌan. 30Nak yo̱ chi cꞌanjelac chiru li Ka̱cuaꞌ, caꞌchꞌin chic ma̱ quicam. Quixqꞌue rib saꞌ raylal re intenkꞌanquil xban nak ma̱ anihex la̱ex chintenkꞌanquil.
Currently Selected:
Filipenses 2: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.