Números 12
12
Laj Aarón ut lix María queꞌxcuechꞌ rix laj Moisés
1Lix María ut laj Aarón queꞌoc xcuechꞌinquil rix laj Moisés xban nak quisumla riqꞌuin jun ixk Etiopía xtenamit. 2Ut queꞌxye: —¿Ma caꞌaj cuiꞌ ta biꞌ riqꞌuin laj Moisés naa̱tinac li Ka̱cuaꞌ Dios? ¿Ma incꞌaꞌ ta biꞌ ta̱ru̱k ta̱a̱tinak ajcuiꞌ kiqꞌuin la̱o? chanqueb. Ut li Dios quirabi li cꞌaꞌru queꞌxye. 3Laj Moisés, aꞌan jun cui̱nk kꞌaxal tu̱lan chiruheb chixjunileb li cui̱nk li cuanqueb saꞌ ruchichꞌochꞌ. 4Joꞌcan nak li Ka̱cuaꞌ quixye reheb laj Moisés, laj Aarón ut lix María: —Ayukex saꞌ oxibal saꞌ li tabernáculo li nequechꞌutub cuiꞌ e̱rib, chan. Ut eb aꞌan queꞌco̱eb saꞌ li tabernáculo. 5Ut li Ka̱cuaꞌ quicube chak saꞌ li chok ut quixakli chire li oqueba̱l re li tabernáculo. Quixbokeb laj Aarón ut lix María. Ut eb aꞌan queꞌco̱eb chi xcabichaleb cuan cuiꞌ li Ka̱cuaꞌ. 6Ut li Ka̱cuaꞌ quixye reheb: —Anakcuan cherabihak li cꞌaꞌru tinye e̱re. Nak ta̱cua̱nk junak profeta e̱riqꞌuin la̱in tincꞌutbesi cuib chiru saꞌ visión ut saꞌ xmatcꞌ tina̱tinak riqꞌuin. 7Aban moco joꞌcan ta ninba̱nu riqꞌuin laj Moisés laj cꞌanjel chicuu. Aꞌan ti̱c xchꞌo̱l ut aꞌan li kꞌaxal naxqꞌue xchꞌo̱l chi cꞌanjelac saꞌ xya̱nkeb lin tenamit Israel. 8La̱in nina̱tinac chi tzꞌakal riqꞌuin. Incꞌaꞌ nina̱tinac riqꞌuin saꞌ jaljo̱quil ru a̱tin. Ut nincꞌutbesi cuib chiru chi tzꞌakal. Cui la̱in nina̱tinac chi tzꞌakal riqꞌuin, ¿cꞌaꞌut nak incꞌaꞌ xexxucuac chixcuechꞌinquil rix laj Moisés laj cꞌanjel chicuu? chan. 9Ut cꞌajoꞌ lix joskꞌil li Ka̱cuaꞌ Dios saꞌ xbe̱neb nak qui-el riqꞌuin. 10Nak qui-el li chok cuan cuiꞌ li tabernáculo, lix María ac saklep chic rix. Sak sak lix tibel quicana. Laj Aarón quiril lix María ut quixqꞌue retal nak saklep rix. 11Ut laj Aarón quixye re laj Moisés: —At ka̱cuaꞌ, ma̱qꞌue taxak saꞌ kabe̱n li ma̱c aꞌin xban nak xkaba̱nu chi incꞌaꞌ xkacꞌoxla nak ma̱c xkaba̱nu. 12Ut incꞌaꞌ taxak ta̱kꞌa̱k lix tibel joꞌ naxcꞌul jun li cꞌulaꞌal ac camenak nak nayoꞌla, chan. 13Ut laj Moisés quitijoc ut quixye: —At Ka̱cuaꞌ Dios, nintzꞌa̱ma cha̱cuu nak ta̱qꞌuirtesi taxak lix María.— 14Quichakꞌoc li Ka̱cuaꞌ ut quixye re laj Moisés: —Cui ta aꞌ lix yucuaꞌ xchu̱ban re xnakꞌ ru, ¿ma incꞌaꞌ raj tixmuk rib cuukubak cutan xban xxuta̱n? Isihomak cuukubak cutan saꞌ le̱ naꞌaj. Ut nak ac xnumeꞌ cuukub cutan, ta̱sukꞌi̱k cuiꞌchic chak saꞌ e̱ya̱nk, chan. 15Joꞌcan nak queꞌrisi lix María saꞌ xya̱nkeb chiru cuukub cutan, ut eb li tenamit queꞌroybeni saꞌ li naꞌajej aꞌan toj quisukꞌi lix María saꞌ xya̱nkeb. 16Nak ac xcꞌulun lix María saꞌ xya̱nkeb, queꞌel saꞌ li naꞌajej Hazerot. Queꞌco̱eb saꞌ li naꞌajej Parán ut aran queꞌcana.
Currently Selected:
Números 12: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
