Números 11
11
Eb laj Israel queꞌxcuechꞌi rix li Dios
1Saꞌ jun li cutan eb laj Israel queꞌoc chixcuechꞌinquil rix li Ka̱cuaꞌ xban li chꞌaꞌajquilal li cuanqueb cuiꞌ. Li Ka̱cuaꞌ quirabi li cꞌaꞌru yo̱queb chixyebal. Cꞌajoꞌ nak quijoskꞌoꞌ saꞌ xbe̱neb. Quixtakla chak li xam ut eb li muheba̱leb li cuanqueb toj chire queꞌcꞌat. 2Eb laj Israel queꞌxjap re chixtzꞌa̱manquil xtenkꞌanquileb chiru laj Moisés. Ut laj Moisés quixtzꞌa̱ma xtenkꞌanquileb chiru li Ka̱cuaꞌ ut li xam quichup. 3Joꞌcan nak li naꞌajej aꞌan queꞌxqꞌue Tabera chokꞌ xcꞌabaꞌ xban nak li naꞌajej aꞌan quicꞌateꞌ xban li xam li quixtakla chak li Dios. 4Saꞌ xya̱nkeb laj Israel cuanqueb li jalaneb xtenamit. Eb aꞌan junes cha̱bil tzacae̱mk teꞌraj xtzacanquil. Ut eb laj Israel queꞌoc cuiꞌchic chi cuechꞌi̱nc ut queꞌxye: Cuan ta ani ta̱qꞌuehok katib re takatzaca. 5Najulticoꞌ ke nak chi ma̱tan katzaca chak li car aran Egipto ut katzaca chak li pepino, li melón, li puerro, li cebolla ut li a̱nx. 6Ut anakcuan arin yo̱co chi ca̱mc xban katzꞌocajic. Ma̱cꞌaꞌ chic naru nakatzaca xban nak caꞌaj cuiꞌ maná cuan, chanqueb. 7Li maná chanchan riyajil li culantro ut kꞌan xbonol chanchan xkꞌol cheꞌ. 8Eb li cristian queꞌxmol li maná. Cuan li queꞌxqueꞌ chiruheb xcaꞌ ut cuan li tenbil queꞌxba̱nu re. Nequeꞌxchik saꞌ chꞌi̱chꞌ ucꞌal ut cuan li nequeꞌxyi̱b chokꞌ xcaxlan cua. Ut lix sahil chanchan li cha̱bil aceite. 9Nak natꞌaneꞌ li xchuꞌque chi kꞌek saꞌ li naꞌajej li cuanqueb cuiꞌ lix muheba̱leb, natꞌaneꞌ ajcuiꞌ li maná. 10Laj Moisés quirabi nak li junju̱nk cabal laj Israel yo̱queb chi ya̱bac chire lix muheba̱leb. Li Ka̱cuaꞌ cꞌajoꞌ nak quijoskꞌoꞌ riqꞌuineb. Ut laj Moisés incꞌaꞌ quicuulac chiru. 11Joꞌcan nak laj Moisés quixye re li Ka̱cuaꞌ: —¿Cꞌaꞌut nak nacaba̱nu ra cue la̱in? La̱in laj cꞌanjel cha̱cuu. ¿Cꞌaꞌru inma̱c cha̱cuu nak yo̱cat chixqꞌuebal li i̱k saꞌ inbe̱n re xcꞌambal li tenamit aꞌin? 12¿Ma la̱in ta biꞌ xyucuaꞌeb? Ut, ¿ma la̱in ta biꞌ xnaꞌeb nak ta̱ye cue nak tincꞌameb chi kꞌalkꞌo joꞌ nequeꞌkꞌalu̱c li cocꞌal li toj nequeꞌtuꞌuc? ¿Ma tento nak toj la̱in tincꞌamok reheb saꞌ li naꞌajej li cayechiꞌi reheb lix xeꞌto̱nil yucuaꞌeb? 13¿Bar tintau tib la̱in re tinqꞌue reheb li tenamit aꞌin? Junes cuechꞌi̱nc ut xpatzꞌbal xtibeb nequeꞌxba̱nu. 14La̱in incꞌaꞌ chic nincuy cꞌamoc be chiruheb chixjunileb li tenamit aꞌin injunes. Aꞌin jun nimla i̱k chokꞌ cue la̱in. 15Cui la̱at yo̱cat chixba̱nunquil cue chi joꞌcaꞌin, kꞌaxal us cui ta̱cuisi lin yuꞌam cui ya̱l nak niquina̱ra, re nak incꞌaꞌ chic yo̱kin chi cꞌuluc nabal raylal, chan laj Moisés. 16Abanan li Ka̱cuaꞌ quichakꞌoc ut quixye re: —Chꞌutubeb laje̱b xca̱cꞌa̱lak li cui̱nk li nacanau ruheb li nequeꞌcꞌamoc be saꞌ xya̱nkeb laj Israel. Aꞌaneb li cuanqueb xcuanquil. Ut ta̱cꞌameb chiru li tabernáculo ut tine̱roybeni a̱cuochbeneb. 17La̱in tincubek chak ut tina̱tinak a̱cuiqꞌuin. Ut tinqꞌue lin musikꞌ reheb joꞌ quinqꞌue a̱cue la̱at re nak tateꞌxtenkꞌa chixcꞌambaleb xbe li tenamit aꞌin. Chi joꞌcan incꞌaꞌ ta̱cana̱k saꞌ a̱be̱n a̱junes la̱at li i̱k aꞌin. 18Ta̱ye ajcuiꞌ reheb chixjunileb nak teꞌxsantobresi ribeb xban nak cuulaj tinqꞌue lix tibeb re teꞌxtzaca. La̱in xcuabi nak yo̱queb chi cuechꞌi̱nc ut yo̱queb chixyebal: Us raj cuan ta tib re takatzaca. Us nak cuanco chak Egipto, chanqueb. Joꞌcan nak anakcuan tinqꞌue lix tibeb re teꞌxtzaca. 19Ut moco jun cutan ta ajcuiꞌ tinqꞌueheb chi tiꞌoc tib. Chi moco cuib cutan, chi moco o̱b, chi moco laje̱b cutan, chi moco junmay cutan. 20Tinqꞌueheb ban chi tiꞌoc tib chi cuulaj cuulaj chiru jun po toj retal teꞌnujak ut teꞌxaꞌcuak xban xqꞌuial li teꞌxtzaca. Teꞌyibok chic xban nak incꞌaꞌ chic teꞌraj ru. Tinba̱nu reheb chi joꞌcan xban nak xineꞌxtzꞌekta̱na ut xban ajcuiꞌ nak quineꞌxcuechꞌi ut queꞌxye nak kꞌaxal us raj cui incꞌaꞌ xeꞌel Egipto, chan li Ka̱cuaꞌ. 21Ut laj Moisés quixye re li Ka̱cuaꞌ: —La̱in yo̱quin chi cꞌamoc be chiru cuakib ciento mil (600,000) chi cui̱nk ut la̱at nacaye nak ta̱qꞌueheb chi tiꞌoc tib chiru jun po. 22¿Ma cuan ta biꞌ nabalak li carner ut li cuacax re takacamsi ut takaqꞌue chixtiuheb? ¿Ma ta̱tzꞌaklok ta biꞌ reheb cui ta takaqꞌue chixtiuheb chixjunil li car li cuanqueb saꞌ li palau? chan laj Moisés. 23Ut li Ka̱cuaꞌ quichakꞌoc ut quixye re laj Moisés: —¿Ma nacacꞌoxla la̱at nak ma̱cꞌaꞌ incuanquil chixba̱nunquil aꞌin? Anakcuan ta̱cuil ma ta̱uxma̱nk tana li cꞌaꞌru xinye malaj ut incꞌaꞌ, chan li Ka̱cuaꞌ. 24Ut laj Moisés quixye reheb li tenamit cꞌaꞌru quixye li Ka̱cuaꞌ. Quixchꞌutubeb laje̱b xca̱cꞌa̱l (70) li nequeꞌcꞌamoc be ut quixxakabeb chixjun sutam li tabernáculo. 25Ut li Ka̱cuaꞌ quicube chak saꞌ jun li chok ut quia̱tinac riqꞌuin laj Moisés. Ut quixqꞌue lix musikꞌ reheb li laje̱b xca̱cꞌa̱l li cui̱nk li nequeꞌcꞌamoc be joꞌ li cuan riqꞌuin laj Moisés. Nak li musikꞌ cuan riqꞌuineb, queꞌoc chi a̱tinac joꞌ profetas. Abanan incꞌaꞌ chic quicꞌulman chi joꞌcan mokon. 26Cuib reheb li laje̱b xca̱cꞌa̱l li cui̱nk incꞌaꞌ queꞌco̱eb cuan cuiꞌ li tabernáculo. Queꞌcana ban saꞌ lix muheba̱leb. Aꞌaneb laj Eldad ut laj Medad. Ut li musikꞌ qui-oc riqꞌuineb usta incꞌaꞌ queꞌel saꞌ lix muheba̱leb ut queꞌa̱tinac joꞌ profeta. 27Jun li sa̱j cui̱nk co̱ saꞌ junpa̱t riqꞌuin laj Moisés ut quixye re: —Laj Eldad ut laj Medad yo̱queb chi yehoc ra̱tin profeta saꞌ li naꞌajej li cuanqueb cuiꞌ lix muheba̱leb, chan. 28Laj Josué li ralal laj Nun cuan aran. Aꞌan li natenkꞌan re laj Moisés chalen saꞌ xsa̱jilal. Quixye re laj Moisés: —At ka̱cuaꞌ Moisés, ta̱ye reheb nak teꞌxcanab a̱tinac, chan. 29Abanan laj Moisés quixye re: —¿Ma x-oc chi cakocꞌ la̱ chꞌo̱l chicuix? Us raj cui li Ka̱cuaꞌ tixqꞌue lix musikꞌ reheb chixjunileb lix tenamit re nak chixjunileb teꞌyehok ra̱tin profeta, chan. 30Chirix aꞌan laj Moisés ut eb li nequeꞌcꞌamoc be saꞌ xya̱nkeb laj Israel queꞌsukꞌi saꞌ lix muheba̱leb. 31Ut li Ka̱cuaꞌ quixtakla chak saꞌ li este jun li cacuil ikꞌ li quixcꞌam chak nabaleb laj to̱nkꞌ li queꞌchal chak saꞌ xjayal li palau. Yo̱queb chi rupupic chixjun sutam li naꞌajej li cuanqueb cuiꞌ lix muheba̱leb. Jun metro xteram li yo̱queb chi rupupic. Cuanqueb chi nachꞌ ut cuanqueb toj chi najt joꞌ xnajtil nequeꞌbe̱c chiru jun cutan. 32Chixjunil li cutan ut chixjunil li kꞌojyi̱n aꞌan ut li cutan jun chic yo̱queb chixchapbaleb laj to̱nkꞌ eb laj Israel. Li ani quixxoc caꞌchꞌin ajcuiꞌ quixxoc laje̱b tu̱b li xul. Ut queꞌxcanab saꞌ chꞌochꞌ chixjun sutam li naꞌajej re teꞌchakik. 33Toj yo̱queb ajcuiꞌ chi xtiubal xtibel laj to̱nkꞌ nak quichal xjoskꞌil li Ka̱cuaꞌ saꞌ xbe̱neb laj Israel. Joꞌcan nak quixtakla jun li yajel saꞌ xbe̱neb ut nabaleb queꞌcam. 34Joꞌcan nak li naꞌajej aꞌan queꞌxqꞌue “Kibrot-hataava” chokꞌ xcꞌabaꞌ xban nak aran queꞌxmuk li tenamit li queꞌcam xban nak junes cuaꞌac queꞌxcꞌoxla. 35Nak queꞌel Kibrot-hataava, eb laj Israel queꞌco̱eb toj saꞌ li naꞌajej Hazerot ut aran queꞌcana.
Currently Selected:
Números 11: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
