Hebreos 6

1Joꞌcan nak incꞌaꞌ yo̱kex chi cꞌoxlac junes chirix li xetzol chak saꞌ xticlajic le̱ pa̱ba̱l. Toj cuan ban nabal te̱tzol chirix li Cristo re nak texqꞌui̱k saꞌ le̱ pa̱ba̱l. Ac nequenau nak ma̱cuaꞌ riqꞌuin kayehom kaba̱nuhom natauman li colba-ib. Riqꞌuin ban xpa̱banquil li Dios. 2Ac nequenau xya̱lal li cubi haꞌ. Nequenau xya̱lal li xqꞌuebal li kukꞌ saꞌ xbe̱neb laj pa̱banel. Ac nequenau nak teꞌcuacli̱k cuiꞌchic chi yoꞌyo li camenak. Ut nequenau ajcuiꞌ nak ta̱cuulak xkꞌehil nak ta̱rakekꞌ a̱tin chi junaj cua saꞌ xbe̱neb li ma̱jiꞌ nequeꞌpa̱ban. 3Anakcuan chikaqꞌue kachꞌo̱l chixtzolbal kib re nak toqꞌui̱k saꞌ li kapa̱ba̱l. Joꞌcan takaba̱nu cui li Dios naxqꞌue ke. 4Cuanqueb li ac xeꞌxtau xya̱lal. Xeꞌxcꞌul li rusilal li Dios. Xeꞌxcꞌul li Santil Musikꞌej. 5Nequeꞌxnau nak ya̱l li ra̱tin li Dios. Ac xeꞌtzꞌakon caꞌchꞌin riqꞌuin lix cuanquil li acꞌ ruchichꞌochꞌ li ta̱cha̱lk. 6Cuan li ac xeꞌtzꞌakon riqꞌuin li rusilal li Dios ut nequeꞌxtzꞌekta̱na chirix xchꞌo̱l. Chanchan nak yo̱queb cuiꞌchic chixqꞌuebal chiru cruz li Jesucristo, li Ralal li Dios. Yo̱queb chixqꞌuebal chi hobecꞌ ut chi seꞌe̱c xbaneb li tenamit. Eb aꞌan incꞌaꞌ chic naru teꞌyotꞌekꞌ xchꞌo̱l ut incꞌaꞌ chic teꞌxjal xcꞌaꞌux xban nak yo̱queb chixtzꞌekta̱nanquil li Jesucristo. 7Li ani naxba̱nu li naxye li ra̱tin li Dios, aꞌan chanchan li chꞌochꞌ narucꞌ li haꞌ. Cha̱bil li acui̱mk na-el chiru ut nacꞌanjelac re laj acuinel. Li chꞌochꞌ aꞌan osobtesinbil xban li Dios. Li ani naxba̱nu li naraj li Dios osobtesinbil xban li Dios. 8Aban li ani incꞌaꞌ naxba̱nu re li naxye li ra̱tin li Dios, aꞌan chanchan li chꞌochꞌ junes qꞌuix ut yibru pim na-el chiru; ma̱cꞌaꞌ na-oc cuiꞌ li chꞌochꞌ aꞌan. Li ani incꞌaꞌ naxba̱nu li naraj li Dios, tzꞌekta̱nanbileb xban li Dios ut cꞌatbil nak teꞌosokꞌ.

Li Cristo nocoxtenkꞌa re nak incꞌaꞌ ta̱chꞌina̱nk li kachꞌo̱l

9Ex inherma̱n, usta xkaye chi joꞌcan, ninnau nak la̱ex moco joꞌcanex ta chic anakcuan. Cha̱bil chic le̱ naꞌleb xban nak colbilex. 10Li Dios ti̱c xchꞌo̱l. Naxnau chanru le̱ cꞌanjel. Li Dios naxnau nak nequera aꞌan. Nacꞌutun ajcuiꞌ nak nequera li Dios xban nak xetenkꞌa le̱ rech aj pa̱banel junxil ut toj yo̱quex ajcuiꞌ chixtenkꞌanquileb anakcuan. Incꞌaꞌ nasach saꞌ xchꞌo̱l li Dios le̱ cꞌanjel li nequeba̱nu. 11Takaj nak che̱junju̱nkalex te̱qꞌue e̱chꞌo̱l chixba̱nunquil li usilal chalen toj saꞌ rosoꞌjic le̱ yuꞌam. Chi joꞌcan te̱cꞌul chi tzꞌakal le̱ kꞌajca̱munquil li yechiꞌinbil e̱re xban li Dios. 12Incꞌaꞌ nakaj nak te̱cuiba e̱chꞌo̱l. Cheba̱nu ban joꞌ nequeꞌxba̱nu li nequeꞌpa̱ban chi anchal xchꞌo̱l. Incꞌaꞌ nequeꞌtitzꞌ. Nequeꞌxcuy ut nequeꞌre̱chani li yechiꞌinbil xban li Dios. 13Ma̱cꞌaꞌ junak mas nim xcuanquil chiru li Dios. Joꞌcan nak li Dios quixpatzꞌ xcꞌabaꞌ chi ribil rib nak quixyechiꞌi li rosobtesinquil laj Abraham. 14Quixye re:

Relic chi ya̱l tatcuosobtesi ut tinqꞌue chi qꞌuia̱nc la̱ cualal a̱cꞌajol. (Gén. 22:16-17)

15Joꞌcan nak laj Abraham najt quixcuy roybeninquil ut incꞌaꞌ quititzꞌ toj retal quixcꞌul lix ma̱tan quiyechiꞌi̱c re xban li Dios. 16Nak na-uxman li juramento napatzꞌman xcꞌabaꞌ junak li kꞌaxal nim xcuanquil re nak nachꞌola ru li ya̱l ut narakeꞌ ajcuiꞌ li cuechꞌi̱nc ib. 17Joꞌcan nak li Dios quixyechiꞌi li ma̱tan riqꞌuin juramento. Quiraj xcꞌutbal chiruheb li teꞌe̱chani̱nk re nak tzꞌakal ya̱l li yo̱ chixyebal. Ut incꞌaꞌ tixjal ru li ra̱tin. 18Joꞌcan utan nak li cuib chi naꞌleb aꞌin incꞌaꞌ naru xjalbal ru. Aꞌaneb aꞌin: xbe̱n, nak li Dios quixyechiꞌi li ma̱tan; ut xcab, nak quixba̱nu li juramento. Riqꞌuin aꞌan nakanau nak li Dios incꞌaꞌ naticꞌtiꞌic. Joꞌcan nak cauhak taxak li kachꞌo̱l. La̱o xkasicꞌ li kacolbal riqꞌuin li Dios ut nakanau nak take̱chani li quixyechiꞌi ke. Aꞌan li nakayoꞌoni. 19Nakayoꞌoni nak takacꞌul li junelic yuꞌam. Aꞌan naxqꞌue xcacuil li kachꞌo̱l joꞌ nak li ancla#Saꞌ li versículo 6:19 “Ancla” xcꞌabaꞌ li nimla chꞌi̱chꞌ li nacꞌanjelac re xchapbal li nimla jucub re nak incꞌaꞌ chic ta̱be̱k chiru li haꞌ. Li chꞌi̱chꞌ aꞌan jun a̱lal chꞌi̱chꞌ naqꞌueman saꞌ li haꞌ. Chapcho riqꞌuin jun nimla cꞌa̱m, laso, malaj cadena. Nacubsiman saꞌ xchamal li haꞌ ut cau rib saꞌ xnaꞌaj. Incꞌaꞌ chic na-ecꞌan li jucub toj nak na-ocsiman cuiꞌchic li ancla saꞌ li jucub. naxchap li jucub chiru li haꞌ. Cau rib ut incꞌaꞌ na-ecꞌan saꞌ xnaꞌaj. Xban nak nakapa̱b li Jesucristo, cuanco chi sum a̱tin riqꞌuin li Dios. 20Li Jesucristo ac xco̱ saꞌ li santil choxa chi jaloc a̱tin chikix. Aꞌan laj cꞌamol be chiku. Li Jesucristo, aꞌan tzꞌakal xyucuaꞌil aj tij chi junelic joꞌ nak quicuan laj Melquisedec.

Currently Selected:

Hebreos 6: kek

Highlight

Copy

Compare