Hebreos 5

1Saꞌ xya̱nkeb laj judío cuanqueb xyucuaꞌil aj tij. Li junju̱nk sicꞌbil ru saꞌ xya̱nkeb li cui̱nk chi cꞌanjelac chiru li Dios. Naxtenkꞌaheb li tenamit riqꞌuin xqꞌuebal li mayej quicꞌ ut li cꞌaꞌak chic re ru chi mayejil re xtojbal rix lix ma̱queb. 2Li xyucuaꞌil aj tij, aꞌan yal cui̱nkeb joꞌ la̱o. Joꞌcan nak naxtokꞌoba ruheb ut naxtenkꞌaheb saꞌ usilal li nequeꞌma̱cob xban nak incꞌaꞌ nequeꞌxnau xya̱lal li yo̱queb chixba̱nunquil. 3Xban nak yal cui̱nk li xyucuaꞌil aj tij, joꞌcan nak rajlal namayejac re xtojbal rix lix ma̱c aꞌan. Ut namayejac ajcuiꞌ re xtojbal rix lix ma̱queb chixjunileb li tenamit. 4Lix cꞌanjel li xyucuaꞌil aj tij kꞌaxal lokꞌ, aban ma̱ jun naxyoꞌob xcꞌanjel yal xjunes rib. Eb aꞌan sicꞌbil ruheb xban li Dios. Li Dios naxxakabeb chi cꞌanjelac joꞌ nak quixakaba̱c laj Aarón najter. 5Joꞌcan ajcuiꞌ li Jesucristo. Moco yal xjunes ta quixxakab rib chi cꞌanjelac chokꞌ xyucuaꞌil aj tij. Aban li Dios quiqꞌuehoc re lix lokꞌal ut quixqꞌue chi cꞌanjelac nak quixye re:

At cualal, anakcuan xinqꞌue a̱cuanquil. (Sal. 2:7)

6Quiyeheꞌ cuiꞌchic re xban li Dios joꞌ naxye saꞌ li Santil Hu:

La̱at aj tij chi junelic joꞌ nak quicuan laj Melquisedec. (Sal. 110:4)

7Nak li Jesucristo quicuan arin saꞌ ruchichꞌochꞌ quiya̱bac nak quitijoc. Chi cau xya̱b xcux quitzꞌa̱man chiru li Dios, li cuan xcuanquil chi coloc re chiru li ca̱mc. Ut li Dios quirabi lix tij xban nak quixkꞌaxtesi rib re xba̱nunquil lix cꞌanjel li Dios. 8Usta Ralal li Dios li Jesucristo, quixcꞌul ajcuiꞌ li raylal ut quixcꞌut chiku chanru li pa̱ba̱nc riqꞌuin li raylal quixcꞌul. 9Riqꞌuin li raylal li quixcꞌul li Jesucristo quitzꞌakobresi̱c ru chi cꞌanjelac chokꞌ xyucuaꞌil aj tij. Ut saꞌ xcꞌabaꞌ aꞌan cuan li colba-ib chi junelic reheb li teꞌpa̱ba̱nk re. 10Li Dios quixxakab li Jesucristo chokꞌ xyucuaꞌil aj tij joꞌ nak quicuan laj Melquisedec.

Kꞌaxal xiu xiu chokꞌ ke cui ta̱cuiba̱nk li kachꞌo̱l

11Toj cuan raj chic nabal naraj chꞌoloba̱c xya̱lal che̱ru chirix aꞌin. Abanan chꞌaꞌaj xchꞌolobanquil xya̱lal xban nak incꞌaꞌ chic nequeraj rabinquil. 12Anakcuan la̱ex raj chic aj tzolonel xban nak ac junxil nequexpa̱ban. Abanan ta̱raj toj ta̱cꞌutekꞌ cuiꞌchic che̱ru li ac xetzol chak junxil nak xepa̱b chak li Dios. Chanchanex chic li cꞌulaꞌal li toj natuꞌuc li toj ma̱jiꞌ natzacan. 13La̱ex nequenau nak junak cꞌulaꞌal toj natuꞌuc toj ma̱cꞌaꞌ xnaꞌleb. Incꞌaꞌ naxnau bar cuan li us ut bar cuan li incꞌaꞌ us. 14Eb li che̱quel cristian jalan xtzacae̱mkeb. Moco sicꞌbil ta ru li nequeꞌxtzaca. Aꞌan retalil nak ac xeꞌqꞌui saꞌ xpa̱ba̱leb ut nequeꞌxnau chic bar cuan li us ut bar cuan li incꞌaꞌ us.

Currently Selected:

Hebreos 5: kek

Highlight

Copy

Compare