Ezequiel 38

Resil li cꞌaꞌru tixcꞌul li rey Gog

1Li Ka̱cuaꞌ quia̱tinac cuiqꞌuin ut quixye cue: 2—At ralal cui̱nk, ilon cuan cuiꞌ li tenamit Magog. Ut ta̱ye resil li raylal li ta̱cha̱lk saꞌ xbe̱n laj Gog, li kꞌaxal nim xcuanquil chi takla̱nc saꞌ li naꞌajej Magog, li cuanqueb cuiꞌ li tenamit Mesec ut Tubal. 3Ta̱ye re: Joꞌcaꞌin xye li nimajcual Dios. La̱in yo̱ injoskꞌil saꞌ a̱be̱n, at Gog. La̱at li nim a̱cuanquil chi takla̱nc saꞌ eb li tenamit Mesec ut Tubal. 4La̱in tatinqꞌue chi sukꞌi̱c cha̱cuix. Chanchan nak tinqꞌue chꞌi̱chꞌ saꞌ a̱cue. Chanchan quelonbilat nak tatsukꞌi̱k a̱cuochbeneb la̱ qꞌuila soldado, eb li nequeꞌxic chi rokeb joꞌ eb ajcuiꞌ li nequeꞌxic chirix cacua̱y. Ac cauresinbileb riqꞌuin xchꞌi̱chꞌ re xcolbal re xchꞌo̱leb ut cuan xchꞌi̱chꞌ re pletic saꞌ rukꞌeb. 5Eb li soldado aj Persia ut eb li soldado aj Cus, ut eb li soldado aj Fut cua̱nkeb a̱cuochben. Ut cua̱nkeb ajcuiꞌ xchꞌi̱chꞌ re xcolbal re xchꞌo̱leb ut cua̱nkeb xpunit chꞌi̱chꞌ. 6Ut cua̱nkeb ajcuiꞌ a̱cuochbeneb lix soldado laj Gomer ut eb laj Togarma li cuanqueb saꞌ li norte. Teꞌcha̱lk rochbeneb lix qꞌuila soldado. 7Joꞌcan ut, at Gog, cauresi a̱cuib ut cauresiheb la̱ soldado li joꞌ qꞌuial teꞌoque̱nk cha̱cuix. Ut la̱at tattakla̱nk saꞌ xbe̱neb. 8Nak acak xnumeꞌ nabal chihab la̱at tattakla̱k chi pletic saꞌ jun li tenamit colbil chiru li ple̱t. Li tenamit isinbileb chak saꞌ eb li xni̱nkal ru tenamit li queꞌjeqꞌui̱c cuiꞌ ru junxil. Li tenamit aꞌan juqꞌuinbil nak quicuan junxil. Abanan queꞌchꞌutuba̱c cuiꞌchic ruheb aran Israel ut ac queꞌxyi̱b cuiꞌchic lix tenamiteb. Ut cuanqueb saꞌ lix tenamiteb chi ma̱cꞌaꞌeb xcꞌaꞌux. 9Chanchan nak nachal li ca̱k-sut-ikꞌ ut chanchan nak ta̱muku̱nk li tenamit saꞌ li chok nak tatxic chi pletic riqꞌuineb li tenamit a̱cuochben la̱ qꞌuila soldado. 10Joꞌcaꞌin xye li nimajcual Dios a̱cue, at Gog: nak ta̱cuulak xkꞌehil nak tatxic chi pletic, ta̱cꞌoxla ut ta̱cꞌu̱b ru cꞌaꞌru li incꞌaꞌ us ta̱ba̱nu. 11Ut ta̱ye, “La̱in tinxic chi pletic riqꞌuin jun li tenamit incꞌaꞌ cau rib. Li tenamit aꞌan cuanqueb chi ma̱cꞌaꞌ xcꞌaꞌuxeb ut cꞌojcꞌo xchꞌo̱leb. Moco sutsu̱queb ta saꞌ tzꞌac lix tenamit ut ma̱cꞌaꞌ xpuertil.” 12La̱at tatxic ut ta̱cꞌam chokꞌ a̱cue li cꞌaꞌru reheb li tenamit li queꞌisi̱c chak saꞌ xya̱nkeb li xni̱nkal ru tenamit. Nabaleb lix queto̱mk ut nabal li cꞌaꞌru reheb. Lix naꞌajeb cuan saꞌ xyiheb li xni̱nkal ru tenamit. 13Eb laj Sabá ut eb laj Dedán ut eb laj yaconel li cuanqueb Tarsis ut chixjunileb li cuanqueb xcuanquil teꞌxye a̱cue, “¿Ma xatchal chi elkꞌac ut chixchapbal chokꞌ a̱cue li cꞌaꞌru cuan reheb? ¿Ma xachꞌutubeb la̱ qꞌuila soldado chixmakꞌbal chiruheb li plata, li oro ut eb li queto̱mk ut chixjunil li cꞌaꞌak re ru cuan reheb?” chaꞌkeb a̱cue. 14Joꞌcan ut, at ralal cui̱nk, tat-a̱tinak riqꞌuin laj Gog ut ta̱ye re: Joꞌcaꞌin xye li nimajcual Dios. Saꞌ eb li cutan nak eb lin tenamit Israel cua̱nkeb saꞌ tuktu̱quil usilal, la̱ex te̱qꞌue retal. 15Tatcha̱lk saꞌ la̱ naꞌaj li cuan saꞌ li norte. La̱at yo̱kat chi cꞌamoc be chiruheb li qꞌuila soldado li teꞌcha̱lk cha̱cuix. Chixjunileb aꞌan teꞌcha̱lk chirix cacua̱y ut cauhakeb rib. 16Chanchan nak li chok tixmuk li tenamit nak texxic chi pletic riqꞌuineb lin tenamit Israel. Saꞌ eb li cutan teꞌcha̱lk tatintakla saꞌ lin tenamit chi pletic re nak chixjunileb li xni̱nkal ru tenamit teꞌxqꞌue retal nak la̱in li Ka̱cuaꞌ nak tincꞌut lin santilal chiruheb nak tinqꞌue laj Gog chi numta̱c saꞌ xbe̱neb laj Israel. 17Joꞌcaꞌin xye li nimajcual Dios re laj Gog: ¿Ma ma̱cuaꞌ ta biꞌ la̱at quina̱tinac chak cha̱cuix junxilaj nak quina̱tinac riqꞌuineb li profeta aj Israel li queꞌcꞌanjelac chicuu? Chiru nabal chihab eb aꞌan queꞌxye resil nak la̱in tatintakla chi pletic riqꞌuineb laj Israel. 18Saꞌ eb li cutan nak laj Gog ta̱oc chi pletic saꞌ li tenamit Israel, cꞌajoꞌ nak teꞌxchikꞌ injoskꞌil, chan li Ka̱cuaꞌ Dios. 19Saꞌ li cutan aꞌan kꞌaxal ta̱numta̱k lin joskꞌil. Relic chi ya̱l ta̱cua̱nk jun li cacuil hi̱c saꞌ li tenamit Israel. 20Nak tixqꞌue li hi̱c, eb li car, ut eb li xul li nequeꞌrupupic ut chixjunileb li joskꞌ aj xul ut eb li nequeꞌxquelo rib saꞌ chꞌochꞌ, joꞌ eb ajcuiꞌ li cristian sicsotkeb xbaneb xxiu chicuu. Telajeꞌtꞌanekꞌ li tzu̱l ut li u̱l ut eb li tzꞌac teꞌjorekꞌ ut teꞌtꞌanekꞌ saꞌ chꞌochꞌ. 21Ut la̱in tinqꞌue chi camsi̱c laj Gog rochbeneb lix soldado saꞌ eb li tzu̱l li cuanqueb saꞌ lin tenamit Israel. Ut eb lix soldado teꞌxcamsi ribeb chi ribileb rib. 22Tebinqꞌue chi camsi̱c ut tinqꞌue li caki yajel saꞌ xbe̱n laj Gog ut saꞌ xbe̱neb lix qꞌuila soldado ut saꞌ xbe̱neb chixjunileb li yo̱keb chi oque̱nc chirix. Kꞌaxal cau li hab ta̱cha̱lk saꞌ xbe̱neb. Ta̱tꞌanekꞌ li sakbach saꞌ xbe̱neb rochben xam ut azufre. 23Joꞌcaꞌin nak tincꞌut chiruheb li xni̱nkal ru tenamit nak kꞌaxal nim incuanquil ut santin. Riqꞌuin aꞌin teꞌxqꞌue retal nak la̱in li nimajcual Dios.

Currently Selected:

Ezequiel 38: kek

Highlight

Copy

Compare