Ezequiel 39
39
1At ralal cui̱nk, ta̱ye resil li raylal li ta̱cha̱lk saꞌ xbe̱n laj Gog. Ye re nak la̱in li nimajcual Dios ninye chi joꞌcaꞌin. La̱in yo̱ injoskꞌil saꞌ a̱be̱n, at Gog. La̱at li kꞌaxal nim a̱cuanquil saꞌ xbe̱neb laj Mesec ut saꞌ xbe̱neb laj Tubal. 2La̱in tatcuisi chak saꞌ la̱ naꞌaj li cuan saꞌ li norte ut tatintakla chi pletic riqꞌuineb li cuanqueb saꞌ eb li tzu̱l li cuanqueb Israel. 3Tincuisi la̱ tzimaj li cuan saꞌ la̱ tzꞌe ukꞌ ut tincuisi ajcuiꞌ saꞌ la̱ nim ukꞌ li cheꞌ li kꞌes ruꞌuj li nacuteꞌ riqꞌuin tzimaj. 4Saꞌ eb li tzu̱l li cuanqueb Israel tatcamsi̱k a̱cuochbeneb la̱ soldado, joꞌ eb ajcuiꞌ li jun chꞌol chic tenamit li yo̱keb chi tenkꞌa̱nc a̱cue. Ut tincanabeb le̱ tibel chixtiuheb li soꞌsol ut eb li joskꞌ aj xul li cuanqueb saꞌ qꞌuicheꞌ. 5La̱at tatcamsi̱k saꞌ li cꞌaleba̱l. La̱in li nimajcual Dios ninyehoc re aꞌin. 6La̱in tintakla li xam saꞌ xbe̱neb li cuanqueb Magog ut saꞌ xbe̱neb ajcuiꞌ li cuanqueb chi cꞌojcꞌo xchꞌo̱leb chire li palau. Ut eb aꞌan teꞌxqꞌue retal nak la̱in li Dios. 7Riqꞌuin li cꞌaꞌru tinba̱nu tincꞌutbesi chiruheb lin tenamit Israel nak lin cꞌabaꞌ, aꞌan Santo. Incꞌaꞌ chic tinqꞌue chi muxecꞌ lin santil cꞌabaꞌ. Ut chixjunileb li xni̱nkal ru tenamit teꞌxqꞌue retal nak la̱in li Ka̱cuaꞌ lix santil Dioseb laj Israel. 8Relic chi ya̱l cuulac re xkꞌehil nak ta̱cꞌulma̱nk li cꞌaꞌru yo̱quin chixyebal e̱re, chan li Ka̱cuaꞌ li nimajcual Dios. 9Eb li tenamit li cuanqueb Israel teꞌe̱lk chi be̱c saꞌ cꞌaleba̱l. Teꞌxxoc re teꞌxcꞌat chokꞌ xsiꞌ li cheꞌ re pletic ut eb li tzimaj ut li cꞌaꞌak chic re ru quicꞌanjelac re pletic. Chiru cuukub chihab yo̱keb chixcꞌatbal. 10Incꞌaꞌ teꞌxic aj siꞌ saꞌ cꞌaleba̱l, chi moco teꞌxyocꞌ xsiꞌeb saꞌ qꞌuicheꞌ xban nak teꞌxcꞌat chokꞌ xsiꞌeb li cꞌaꞌru quicꞌanjelac re pletic. Ut teꞌxmakꞌ chiruheb li xicꞌ nequeꞌiloc reheb li cꞌaꞌru quimakꞌeꞌ chiruheb laj Israel junxil, chan li Ka̱cuaꞌ. 11Li Ka̱cuaꞌ quixye: —Saꞌ eb li cutan nak ta̱cꞌulma̱nk aꞌin, la̱in tinqꞌue xnaꞌaj laj Gog re ta̱mukekꞌ cuiꞌ aran Israel saꞌ li ru takꞌa li nequeꞌnumeꞌ cuiꞌ li nequeꞌxic saꞌ li este jun pacꞌal li palau Mar Muerto. Aran ta̱mukekꞌ laj Gog rochbeneb li qꞌuila soldado. Xban aꞌan incꞌaꞌ chic ta̱ru̱k teꞌnumekꞌ li tenamit. “Hamón-gog” ta̱qꞌuehekꞌ chokꞌ xcꞌabaꞌ li naꞌajej aꞌan. 12Eb laj Israel yo̱keb chixmukbal li camenak chiru cuukub po re teꞌxsabesi li naꞌajej. 13Chixjunileb li tenamit Israel teꞌxmukeb li camenak. Ut li cutan aꞌan teꞌxninkꞌei nak ta̱qꞌuehekꞌ inlokꞌal la̱in, chan li Ka̱cuaꞌ. 14Nak acak xnumeꞌ li cuukub po, teꞌxsicꞌ ruheb li cui̱nk li teꞌxic chixbeninquil li naꞌajej chi rilbal ma toj cuanqueb li camenak li toj ma̱jiꞌ mukbileb re teꞌxsabesi chi us li naꞌajej. 15Telajeꞌnumekꞌ yalak bar saꞌ li naꞌajej ut teꞌxqꞌue retalil lix bakeleb li camenak li teꞌxtau re nak eb laj mukunel teꞌxmuk saꞌ li ru takꞌa Hamón-gog. 16Chi joꞌcaꞌin teꞌxsabesi chi us li naꞌajej. Ut aran ta̱cua̱nk jun li tenamit Hamona xcꞌabaꞌ. 17Li nimajcual Dios quixye cue; —At ralal cui̱nk, bokeb li joskꞌ aj xul ut eb li qꞌuila pa̱y ru li xul li nequeꞌrupupic re teꞌcha̱lk saꞌ li mayejac li yo̱quin chixcauresinquil. Aꞌan jun nimla mayejac saꞌ eb li tzu̱l li cuanqueb Israel. Ta̱cua̱nk li tib re teꞌxtiu ut ta̱cua̱nk li quicꞌ re teꞌrucꞌ. 18Teꞌxtiu xtibeleb li ni̱nkeb xcuanquil, ut teꞌrucꞌ xquiqꞌueleb li queꞌtaklan saꞌ ruchichꞌochꞌ. Chanchanakeb li carner ut li toro ut li chiba̱t, li queꞌqꞌuiresi̱c Basán, li ni̱nkeb xtibel. 19Saꞌ li mayejac li yo̱quin chixcauresinquil teꞌxtzaca li xe̱bul toj retal teꞌnujak. Teꞌrucꞌ li quicꞌ toj retal teꞌnujak. Chanchan teꞌcala̱k xban. 20Teꞌcuaꞌak toj retal teꞌcꞌojla̱k xchꞌo̱leb. Cua̱nk nabal li tzacae̱mk chokꞌ reheb. Cua̱nk xtibeleb li cacua̱y, ut lix tibeleb li ni̱nkeb xcuanquil li nequeꞌxic chirixeb li cacua̱y, joꞌ ajcuiꞌ lix tibeleb li soldados, chan li nimajcual Dios. 21La̱in tincꞌutbesi lin lokꞌal chiruheb chixjunileb li xni̱nkal ru tenamit. Ut chixjunileb teꞌril lin cuanquil nak la̱in tinrakok a̱tin saꞌ xbe̱neb saꞌ ti̱quilal ut tinqꞌueheb chixtojbal lix ma̱queb. 22Chalen saꞌ li cutan aꞌan eb laj Israel teꞌxqꞌue retal nak la̱in li Ka̱cuaꞌ lix Dioseb. 23Ut eb li xni̱nkal ru tenamit teꞌxnau nak eb laj Israel queꞌcꞌameꞌ chi pre̱xil saꞌ jalan tenamit xban li ma̱usilal queꞌxba̱nu nak queꞌxkꞌetkꞌeti ribeb chicuu. Joꞌcan nak la̱in xincanabeb xjuneseb. Xinkꞌaxtesiheb saꞌ rukꞌeb li xicꞌ nequeꞌiloc reheb ut eb laj Israel queꞌcamsi̱c saꞌ li ple̱t. 24Quinqꞌueheb chixcꞌulbal li raylal aꞌ yal chanru xcꞌulubeb xban lix yibal ru xnaꞌlebeb ut xban lix ma̱usilaleb. Xban aꞌan nak quincanabeb xjuneseb. 25Li nimajcual Dios quixye: —Abanan anakcuan la̱in tincuuxta̱na cuiꞌchic ruheb laj Israel li ralal xcꞌajol laj Jacob, li joꞌ qꞌuial incꞌaꞌ queꞌcamsi̱c. La̱in teꞌcuisi chi pre̱xil re nak ta̱qꞌuehekꞌ xlokꞌal lin santil cꞌabaꞌ. 26Nak cua̱nkeb chic saꞌ lix tenamiteb ut ma̱ ani chic yo̱k chi chꞌiꞌchꞌiꞌi̱nc reheb ta̱julticokꞌ reheb li ma̱usilal queꞌxba̱nu. Ut teꞌxuta̱na̱k xban nak quineꞌxtzꞌekta̱na nak queꞌxkꞌetkꞌeti ribeb chicuu. 27La̱in tincuisiheb lin tenamit saꞌ lix naꞌajeb li xicꞌ nequeꞌiloc reheb. Tincuisiheb saꞌ eb li naꞌajej li cuanqueb cuiꞌ anakcuan. La̱in tinba̱nu aꞌin re nak lix ni̱nkal ru tenamit teꞌxqꞌue retal nak la̱in jun Dios Santo. 28Ut eb lin tenamit teꞌxqꞌue retal nak la̱in li Ka̱cuaꞌ lix Dioseb. Teꞌxqꞌue retal xban nak la̱in quincanaban reheb chi cꞌamecꞌ chi pre̱xil saꞌ jalan tenamit. Abanan anakcuan tebinchꞌutub cuiꞌchic ruheb ut tebinqꞌue cuiꞌchic chi cua̱nc saꞌ lix tenamiteb. Ma̱ jun reheb ta̱cana̱k saꞌ li naꞌajej li cuanqueb cuiꞌ chi pre̱xil. 29Ut ma̱ jaruj chic tincanabeb xjuneseb xban nak tinqꞌue lin musikꞌ reheb li ralal xcꞌajol laj Israel, chan li nimajcual Dios.
Currently Selected:
Ezequiel 39: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
