Ezequiel 27
27
1Li Ka̱cuaꞌ quixye cue: 2—At ralal cui̱nk, bicha li bich re rahil chꞌo̱lej chirixeb laj Tiro. 3Li tenamit Tiro cuan chire li palau. Eb li cuanqueb Tiro nequeꞌyacoc riqꞌuin nabal chi tenamit li cuanqueb chire li palau. Ta̱ye reheb laj Tiro nak la̱in li nimajcual Dios ninye chi joꞌcaꞌin: La̱ex aj Tiro nequeye nak cꞌajoꞌ le̱ chꞌinaꞌusal ut nequeye ajcuiꞌ nak tzꞌakal e̱re e̱ru. 4Kꞌaxal nim e̱cuanquil saꞌ xbe̱neb li nequeꞌcꞌanjelac saꞌ li palau. Chanchanex jun li nimla jucub yi̱banbil chi chꞌinaꞌus. 5Chixjunil li cheꞌ li quicꞌanjelac nak quiyi̱ba̱c li jucub, aꞌan chaj li quicꞌameꞌ chak saꞌ li tzu̱l Senir. Li cheꞌ li nachapoc re lix tꞌicrul, aꞌan chacalteꞌ li quicꞌameꞌ chak Líbano. 6Ut eb li cheꞌ re xberesinquil li jucub queꞌyi̱ba̱c riqꞌuin li ji li quicꞌameꞌ chak Basán. Ut li cheꞌ li yi̱banbil cuiꞌ li tem, aꞌan chaj li quicꞌameꞌ chak Quitim. Qꞌuebil lix sahob ru li tem riqꞌuin marfil. 7Li nimla tꞌicr li naberesin re yi̱banbil riqꞌuin li cha̱bil tꞌicr lino li cuan xsahob ru. Quicꞌameꞌ chak Egipto. Li bandera yi̱banbil riqꞌuin li cha̱bil tꞌicr azul ut púrpura li quicꞌameꞌ chak saꞌ li tenamit Elisa li cuan chire li palau. 8Eb li nequeꞌchꞌeꞌoc re li cheꞌ li naberesin re li jucub queꞌchal chak saꞌ eb li tenamit Sidón ut Arvad. Eb li cui̱nk aj Tiro li cuanqueb xnaꞌleb, aꞌaneb li nequeꞌjaloc re lix be. 9Cuanqueb saꞌ li jucub li cui̱nk li queꞌchal chak Gebal re nak teꞌxyi̱b li jucub nak ta̱poꞌekꞌ. Ut eb li nequeꞌchal saꞌ jalan jucub queꞌcuulac e̱riqꞌuin chi yacoc. 10Eb li cui̱nk re Persia, Lud ut Fut queꞌcꞌanjelac saꞌ xya̱nkeb le̱ soldado. Queꞌxtꞌuyub chiru li tzꞌac lix puniteb ut lix chꞌi̱chꞌeb re xcolbal re xchꞌo̱leb. Ut xbaneb aꞌan quiqꞌueheꞌ e̱lokꞌal. 11Eb li cui̱nk re Arvad queꞌcꞌacꞌalen saꞌ xbe̱n li tzꞌac li sutsu cuiꞌ li tenamit. Ut eb li cui̱nk re Gamad queꞌcꞌacꞌalen saꞌ eb li cab li najt xteram. Ut queꞌxtꞌuyub chiru li tzꞌac lix chꞌi̱chꞌeb re xcolbal re xchꞌo̱leb. Ut xbaneb aꞌan quicꞌutun le̱ chꞌinaꞌusal. 12Eb laj Tarsis queꞌyacoc e̱riqꞌuin xban nak cuan nabal cꞌaꞌru e̱re. Queꞌxjal li cꞌaꞌru e̱re riqꞌuin li plata, ut li cacuil chꞌi̱chꞌ hierro joꞌ ajcuiꞌ li kꞌunil chꞌi̱chꞌ ut li plomo. 13Eb laj Javán, eb laj Tubal ut eb laj Mesec queꞌyacoc e̱riqꞌuin. Queꞌxjal li cꞌaꞌru e̱re riqꞌuineb li lokꞌbil mo̱s ut li secꞌ yi̱banbil riqꞌuin bronce. 14Joꞌcaneb ajcuiꞌ laj Togarma queꞌyacoc e̱riqꞌuin. Ut queꞌxjal li cꞌaꞌru e̱re riqꞌuineb li cacua̱y re trabajic ut re pletic joꞌ eb ajcuiꞌ li mu̱l. 15Eb laj Dedán ut eb li cuanqueb chire li palau queꞌyacoc e̱riqꞌuin. Queꞌxjal li cꞌaꞌru e̱re riqꞌuin li marfil ut li cheꞌ ébano. 16Eb laj Edom queꞌyacoc ajcuiꞌ e̱riqꞌuin xban nak cuan nabal cꞌaꞌru e̱re. Queꞌxjal li cꞌaꞌru e̱re riqꞌuin li tꞌicr púrpura, li cha̱bil tꞌicr lino, li akꞌej cuan xsahob ru, ut li cha̱bil pec perla, ut coral joꞌ ajcuiꞌ li rubíes. 17Eb laj Judá ut eb laj Israel queꞌyacoc e̱riqꞌuin. Queꞌxjal li cꞌaꞌru e̱re riqꞌuin li trigo li nachal saꞌ eb li tenamit Minit ut Panag. Queꞌxjal ajcuiꞌ riqꞌuin li xyaꞌal cab, li aceite olivo ut li sununquil ban. 18Eb laj Damasco queꞌyacoc e̱riqꞌuin xban nak cuan nabal cꞌaꞌru e̱re ut biomex. Queꞌxjal li cꞌaꞌru e̱re riqꞌuin li vino li nachal chak Helbón ut li saki lana li nachal chak Zahar. 19Eb laj Dan ut eb laj Javán queꞌyacoc e̱riqꞌuin. Queꞌxjal li cꞌaꞌru e̱re riqꞌuin li cꞌaꞌru yi̱banbil riqꞌuin hierro, ut riqꞌuin li sununquil ban, ut li cha̱bil mirra. 20Eb laj Dedán queꞌxjal li cꞌaꞌru e̱re riqꞌuin li cha̱bil tꞌicr li nequeꞌxqꞌue saꞌ li carruaje. 21Eb laj Arabia ut eb li cuanqueb xcuanquil aran Cedar queꞌyacoc e̱riqꞌuin. Queꞌxjal li cꞌaꞌru e̱re riqꞌuin li cocꞌ carner ut li te̱lom carner ut li te̱lom chiba̱t. 22Eb laj Sabá ut eb laj Raama queꞌyacoc ajcuiꞌ e̱riqꞌuin. Queꞌxjal li cꞌaꞌru e̱re riqꞌuin li sununquil ban, li cha̱bil pec terto xtzꞌak, ut li oro. 23Eb laj Harán, eb laj Cane, eb laj Edén, eb laj Sabá, eb laj Asiria ut eb laj Quilmad queꞌyacoc ajcuiꞌ e̱riqꞌuin. 24Queꞌxjal li cꞌaꞌru e̱re riqꞌuin li tꞌicr azul cꞌajoꞌ xchꞌinaꞌusal, li tꞌicr li qꞌuebil xsahob ru, li cha̱bil nokꞌ qꞌuila pa̱y xbonol li tzꞌulbil ut li caxon xnaꞌaj li tꞌicr yi̱banbil riqꞌuin li cheꞌ chacalteꞌ. 25Nequeꞌchal nequeꞌxic li ni̱nki jucub re Tarsis chixcꞌambal li cꞌaꞌru e̱re. Cꞌajoꞌ nak quexbiomoꞌ. Chanchanex jun li nimla jucub kꞌaxal nabal li ri̱k. 26Ta̱sachekꞌ e̱ru. Chanchan nak ta̱cꞌamekꞌ li jucub saꞌ xyi li palau xbaneb laj chꞌeꞌol re. Ut li cacuil ikꞌ li nachal saꞌ li este tixjori li jucub saꞌ xchamal li palau. 27Saꞌ li cutan nak tex-osokꞌ talajeꞌosokꞌ chixjunil li cꞌaꞌru cuan e̱re. Ta̱sachekꞌ saꞌ li haꞌ le̱ biomal ut le̱ cꞌay. Teꞌsachekꞌ ruheb chixjunileb le̱ jucub ut eb laj chꞌeꞌol reheb joꞌ eb ajcuiꞌ li nequeꞌjaloc xbe li jucub ut eb li nequeꞌyi̱ban re. Ut teꞌosokꞌ ajcuiꞌ eb li soldado joꞌ eb ajcuiꞌ laj yaconel. 28Eb li tenamit li cuanqueb chire li palau sicsotkeb xbaneb xxiu nak teꞌrabi lix ya̱b xcuxeb chixjunileb li nequeꞌcꞌanjelac saꞌ li jucub nak yo̱keb chi osocꞌ saꞌ li palau. 29Eb li yo̱keb chi cꞌanjelac saꞌ eb li jalan jucub teꞌe̱lk saꞌ li palau ut teꞌxic chi chꞌochꞌel. 30Teꞌxjap reheb chi ya̱bac che̱rix chi kꞌaxal ra saꞌ xchꞌo̱leb. Teꞌxqꞌue li poks saꞌ xjolomeb ut teꞌxtolcꞌosi ribeb saꞌ cha. 31Teꞌxjo li rismal xjolomeb xban xrahil xchꞌo̱leb ut teꞌxqꞌue li kꞌes ru tꞌicr chirixeb. Teꞌya̱bak chi kꞌaxal ra saꞌ xchꞌo̱leb xban nak xsacheꞌ e̱ru. 32Nak yo̱keb chi ya̱bac che̱rix, teꞌxbicha li bich aꞌin re rahil chꞌo̱lejil ut teꞌxye: ¿Ani ta̱ru̱k xjuntakꞌe̱tanquil e̱riqꞌuin la̱ex aj Tiro, li xex-osoꞌ saꞌ li palau? 33Nequeꞌsahoꞌ xchꞌo̱l nabaleb li xni̱nkal ru tenamit chixcꞌulbal le̱ cꞌay nak nequetakla yalak bar. Xban le̱ biomal, nequeꞌbiomoꞌ ajcuiꞌ eb li rey li cuanqueb saꞌ ruchichꞌochꞌ. 34Saꞌ xkꞌehil nak ta̱sachekꞌ e̱ru saꞌ li palau ta̱osokꞌ chixjunil le̱ cꞌay saꞌ li haꞌ. Ut ta̱sachekꞌ ruheb chixjunileb li nequeꞌcꞌanjelac che̱ru. 35Chixjunileb li cuanqueb chire li palau teꞌsachk xnaꞌlebeb nak teꞌril li cꞌaꞌru te̱cꞌul. Eb li rey teꞌoc xxiu ut sicsotkeb teꞌcana̱k. Chiruheb ta̱cꞌutu̱nk nak yo̱k xxiuheb. 36Eb laj yaconel li cua̱nkeb saꞌ li xni̱nkal ru tenamit teꞌsachk xchꞌo̱l ut teꞌxucuak chirilbal li cꞌaꞌru xeꞌxcꞌul. Ta̱sachekꞌ e̱ru ut incꞌaꞌ chic texcua̱nk.—
Currently Selected:
Ezequiel 27: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
