Ezequiel 28

1Li Ka̱cuaꞌ quia̱tinac cuiqꞌuin ut quixye cue: 2—At ralal cui̱nk, ta̱ye re lix reyeb laj Tiro nak la̱in li nimajcual Dios ninye chi joꞌcaꞌin: Xban nak kꞌaxal nacanimobresi a̱cuib, nacaye saꞌ a̱chꞌo̱l “La̱in diosin”. Nacaye nak la̱at cꞌojcꞌo̱cat saꞌ xcꞌojariba̱l li Dios xban nak la̱ tenamit sutsu xban li palau. Abanan la̱at moco diosat ta. Yal cui̱nkat usta nacacꞌoxla nak cuan a̱naꞌleb joꞌ Dios. 3¿Ma la̱at ta biꞌ kꞌaxal cuan a̱naꞌleb chiru laj Daniel? ¿Ma ma̱cꞌaꞌ cꞌaꞌak re ru mukmu cha̱cuu? 4Xban nak cuan a̱naꞌleb ut nacatau ru lix ya̱lal xaxoc nabal la̱ biomal. Cuan nabal la̱ oro ut la̱ plata saꞌ xnaꞌaj li cꞌaꞌru a̱cue. 5Xban nak cuan a̱naꞌleb nacanau lokꞌoc ut nacanau cꞌayi̱nc. Joꞌcan nak kꞌaxal nabal la̱ biomal. Ut xban la̱ biomal xakꞌetkꞌeti a̱cuib. 6Joꞌcan nak la̱in li nimajcual Dios ninye aꞌin: La̱at nacajuntakꞌe̱ta a̱cuib cuiqꞌuin ut nacacꞌoxla nak cuan a̱naꞌleb a̱junes. 7Joꞌcan nak la̱in tintaklaheb li xni̱nkal ru tenamit li kꞌaxal joskꞌeb chi pletic a̱cuiqꞌuin. Teꞌcha̱lk riqꞌuin xchꞌi̱chꞌeb chixsachbal la̱ biomal ut la̱ chꞌinaꞌusal ut teꞌrisi ajcuiꞌ la̱ lokꞌal. 8La̱at tatca̱mk saꞌ li palau. Kꞌaxal ra ta̱cꞌul nak tat-osokꞌ saꞌ li palau. 9Nak teꞌcha̱lk cha̱camsinquil, ¿ma toj ta̱ye ta biꞌ nak la̱at dios? La̱at moco diosat ta. Yal cui̱nkat saꞌ rukꞌeb li teꞌcamsi̱nk a̱cue. 10La̱at tatca̱mk saꞌ rukꞌeb li jalaneb xtenamit joꞌ nak nequeꞌcam li incꞌaꞌ nequeꞌpa̱ban cue la̱in li tzꞌakal Dios. La̱in li nimajcual Dios ninyehoc re aꞌin.— 11Li Ka̱cuaꞌ quia̱tinac cuiqꞌuin ut quixye cue: 12—At ralal cui̱nk, bicha li bich aꞌin re rahil chꞌo̱lej chirix lix reyeb laj Tiro ut ta̱ye: Li nimajcual Dios xye chi joꞌcaꞌin: Junxil la̱at tzꞌakal a̱cue a̱cuu. Cꞌajoꞌ la̱ naꞌleb ut cꞌajoꞌ la̱ chꞌinaꞌusal. 13Chanchan cuancat saꞌ li naꞌajej Edén saꞌ xnaꞌaj li racui̱mk li Dios. Re xqꞌuebal a̱chꞌinaꞌusal cuan li terto̱quil pec joꞌ li cornerina, li topacio, li jaspe, li crisólito, li berilo, li ónice joꞌ ajcuiꞌ li zafiro ut li carbunclo, li esmeralda, joꞌ ajcuiꞌ li oro. Ac cauresinbileb li pandero ut li xo̱lb re li cutan nak cat-oc saꞌ la̱ cuanquil. 14La̱in catinxakab chirilbaleb li tenamit joꞌ jun li ángel. Chanchan nak cuancat saꞌ lin santil tzu̱l. Ut catbe̱c saꞌ xya̱nkeb li pec li nalemtzꞌun. 15Tzꞌakal re ru caba̱nu nak cat-oc saꞌ la̱ cuanquil. Abanan catiquib xba̱nunquil li ma̱usilal. 16Kꞌaxal latzꞌ a̱cuu chi cꞌayi̱nc ut chi lokꞌoc ut riqꞌuin aꞌan catiquib xba̱nunquil li ma̱usilal ut catma̱cob chicuu. Joꞌcan nak la̱in catcuisi saꞌ lin santil tzu̱l saꞌ xya̱nkeb li pec li nequeꞌlemtzꞌun. 17Cakꞌetkꞌeti a̱cuib xban la̱ chꞌinaꞌusal ut capoꞌ la̱ naꞌleb xban la̱ lokꞌal. Joꞌcan nak la̱in catincut saꞌ chꞌochꞌ re nak chixjunileb li rey teꞌril li xuta̱nal li xacꞌul. 18Xban nak kꞌaxal quinumta li ma̱usilal caba̱nu ut xban nak incꞌaꞌ catyacoc saꞌ xya̱lal, camux ruheb li naꞌajej li nequeꞌlokꞌonin cuiꞌ. Joꞌcan nak la̱in quinloch xxamlel la̱ tenamit re nak ta̱sachekꞌ ru chiruheb chixjunileb li tenamit. Junes cha chic quicana. 19Queꞌsach xchꞌo̱leb chixjunileb li tenamit li queꞌxnau chanru nak catcuan junxil. Kꞌaxal ra cacꞌul. Quisacheꞌ a̱cuu. Incꞌaꞌ chic tatcua̱nk. 20Li Ka̱cuaꞌ quia̱tinac cuiqꞌuin ut quixye cue: 21—At ralal cui̱nk, ilon cuan cuiꞌ li tenamit Sidón ut ta̱ye resil li raylal li ta̱cha̱lk saꞌ xbe̱neb laj Sidón. 22Ta̱ye reheb: Joꞌcaꞌin xye li Ka̱cuaꞌ li nimajcual Dios. La̱in yo̱ injoskꞌil saꞌ e̱be̱n la̱ex aj Sidón. Riqꞌuin li tinba̱nu ta̱qꞌuehekꞌ inlokꞌal. La̱in tinrakok a̱tin saꞌ e̱be̱n la̱ex aj Sidón ut riqꞌuin aꞌan te̱qꞌue retal nak la̱in li Ka̱cuaꞌ li nimajcual Dios ut ta̱cꞌutu̱nk lin santilal. 23La̱in tintakla caki yajel saꞌ e̱be̱n. Yalak bar saꞌ eb li be telajexcamsi̱k. Teꞌcha̱lk che̱jun sutam eb li teꞌcamsi̱nk e̱re. Ut teꞌxqꞌue retal nak la̱in li Ka̱cuaꞌ Dios. 24Incꞌaꞌ chic teꞌcꞌuluk raylal eb laj Israel xbaneb li cuanqueb chixjun sutam. Incꞌaꞌ chic teꞌxcꞌul raylal xbaneb li tenamit aꞌan, li chanchaneb qꞌuix. Chi moco teꞌtzꞌekta̱na̱k chic xbaneb. Ut eb aꞌan teꞌxqꞌue retal nak la̱in li Ka̱cuaꞌ li nimajcual Dios. 25Li Ka̱cuaꞌ Dios quixye: —La̱in tinchꞌutub cuiꞌchic ruheb laj Israel li quinjeqꞌui ruheb. Ut tincꞌut lin santilal chiruheb chixjunileb li xni̱nkal ru tenamit. Eb laj Israel teꞌcua̱nk cuiꞌchic saꞌ lix naꞌajeb li quinqꞌue re laj Jacob laj cꞌanjel chicuu. 26Ut aran teꞌcua̱nk laj Israel chi ma̱cꞌaꞌak xcꞌaꞌuxeb. Teꞌcablak cuiꞌchic ut teꞌrau lix uvas. Ut ma̱ ani chic ta̱chꞌiꞌchꞌiꞌi̱nk reheb xban nak la̱in tinqꞌueheb chixtojbal lix ma̱queb chixjunileb li tenamit li cuanqueb chixjun sutam li queꞌrahobtesin reheb lin tenamit. Ut eb aꞌan teꞌxqꞌue retal nak la̱in li Ka̱cuaꞌ lix Dioseb.—

Currently Selected:

Ezequiel 28: kek

Highlight

Copy

Compare