Ezequiel 21

Li Ka̱cuaꞌ tixqꞌueheb laj Babilonia chi numta̱c saꞌ xbe̱neb laj Israel

1Ut li Ka̱cuaꞌ quia̱tinac cuiqꞌuin ut quixye cue: 2—At ralal cui̱nk, ilon cuan cuiꞌ li tenamit Jerusalén ut ta̱ye resil reheb li raylal li ta̱cha̱lk saꞌ xbe̱n lin templo ut saꞌ xbe̱neb ajcuiꞌ laj Israel. 3Ta̱ye reheb chi joꞌcaꞌin: Aꞌan aꞌin li naxye li Ka̱cuaꞌ: La̱in xicꞌ chic nequexcuil. La̱in tincuisi lin chꞌi̱chꞌ saꞌ li rochoch ut tinsach ruheb li ti̱c xchꞌo̱leb joꞌ eb ajcuiꞌ li yibru xnaꞌlebeb. 4Joꞌcan nak la̱in tinsach ruheb chixjunileb li ti̱queb xchꞌo̱l joꞌ eb ajcuiꞌ li yibru xnaꞌlebeb. Ta̱ticla̱k chak saꞌ li sur ut ta̱cuulak toj saꞌ li norte. 5Ut chixjunileb teꞌxqꞌue retal nak la̱in li Ka̱cuaꞌ xincuisi lin chꞌi̱chꞌ saꞌ li rochoch ut incꞌaꞌ chic tinxoc saꞌ xnaꞌaj. 6Joꞌcan nak tatya̱bak, at ralal cui̱nk, xban xrahil a̱chꞌo̱l chiruheb. Ya̱ban chi kꞌaxal ra saꞌ a̱chꞌo̱l. 7Nak teꞌxpatzꞌ a̱cue cꞌaꞌut nak yo̱cat chi ya̱bac, la̱at ta̱ye reheb, “Yo̱quin chi ya̱bac xban resil li raylal li cha̱lc re.” Nak te̱rabi resil la̱ex, cꞌajoꞌ nak texxucuak. Ma̱cꞌaꞌak chic xmetzꞌe̱u le̱ rok e̱rukꞌ. Sicsotkex aj chic xban e̱xiu ut chixjunilex ta̱chꞌina̱nk e̱chꞌo̱l. Cuulac re xkꞌehil. Relic chi ya̱l ta̱cꞌulma̱nk, chan li nimajcual Dios. 8Li Ka̱cuaꞌ quia̱tinac cuiqꞌuin ut quixye cue: 9—At ralal cui̱nk, ta̱ye resil li cꞌaꞌru ta̱cꞌulma̱nk. Ta̱ye: Joꞌcaꞌin xye li Ka̱cuaꞌ li nimajcual Dios. Li chꞌi̱chꞌ ac kꞌesnanbil. Ac cauresinbil chi us. 10Li chꞌi̱chꞌ aꞌin ac cauresinbil re camsi̱nc. Kꞌesnanbil ut nalemtzꞌun. Eb li cualal incꞌajol queꞌxtzꞌekta̱na lix kꞌusbaleb. ¿Ma ta̱sahokꞌ ta biꞌ xchꞌo̱leb riqꞌuin li xinye? 11Li chꞌi̱chꞌ kꞌesnanbil re ut cauresinbil re ta̱kꞌaxtesi̱k saꞌ rukꞌ li ani ta̱camsi̱nk reheb. 12At ralal cui̱nk, chatya̱bak chi cau xban nak eb lin tenamit, aꞌaneb li teꞌsachekꞌ ruheb xban li chꞌi̱chꞌ aꞌan. Chixjunileb li tenamit, joꞌ eb ajcuiꞌ li cuanqueb xcuanquil teꞌsachekꞌ ruheb. Joꞌcan nak ten re la̱ chꞌo̱l xban li raylal li cha̱lc re. 13La̱in tinyal rixeb laj Judá. ¿Ma ta̱ru̱k ta biꞌ teꞌxcuy li raylal? Relic chi ya̱l ta̱sachekꞌ ru lix cuanquilaleb, chan li nimajcual Dios. 14At ralal cui̱nk, ta̱ye resil li cꞌaꞌru ta̱cꞌulma̱nk. Ta̱pokꞌpokꞌi la̱ cuukꞌ re nak laj camsinel tixtiquib camsi̱nc. Cheꞌxcꞌulak cuibak oxibak sut li raylal aꞌin. Aꞌan aꞌin li chꞌi̱chꞌ li ta̱camsi̱nk reheb chixjunileb yalak bar cua̱nkeb. Ma̱ jun reheb teꞌcolekꞌ. 15Cꞌajoꞌ nak teꞌxucuak xban li chꞌi̱chꞌ. Nabaleb li teꞌcamsi̱k xban. Saꞌ chixjunileb li oqueba̱l teꞌril li chꞌi̱chꞌ. Cꞌajoꞌ nak nalemtzꞌun. Cauresinbil re ta̱camsi̱nk. 16Li chꞌi̱chꞌ aꞌan li ta̱camsi̱nk reheb li cuanqueb saꞌ li nim ut aꞌan ajcuiꞌ ta̱camsi̱nk reheb li cuanqueb saꞌ li tzꞌe. Aꞌan ta̱camsi̱nk reheb yalak bar cuanqueb. 17La̱in tinpokꞌpokꞌi li cuukꞌ ut ta̱cube̱k lin joskꞌil. La̱in li nimajcual Dios ninyehoc re aꞌin. 18Li Ka̱cuaꞌ quia̱tinac cuiqꞌuin ut quixye cue: 19—At ralal cui̱nk, ta̱qꞌue retalil cuib li be li teꞌnumekꞌ cuiꞌ lix reyeb laj Babilonia riqꞌuin lix chꞌi̱chꞌ. Li cuib chi be teꞌticla̱k saꞌ jun chi naꞌajej. Ta̱qꞌue retalil saꞌ li xa̱la be cꞌaꞌru tenamitil naxic cuiꞌ li junju̱nk chi be. 20Jun li be ta̱xic saꞌ li tenamit Rabá lix naꞌajeb li ralal xcꞌajol laj Amón. Ut li jun chic ta̱xic saꞌ li tenamit Jerusalén li cauresinbil re pletic. Aꞌan lix tenamiteb li ralal xcꞌajol laj Judá. 21Lix reyeb laj Babilonia tixxakab rib saꞌ xa̱la be ut incꞌaꞌ tixnau bar cuan li be ta̱xic cuiꞌ. Tixkꞌehi riqꞌuin lix tzimaj ut ta̱patzꞌok riqꞌuineb lix dios. Ut ta̱kꞌehi̱nk riqꞌuin lix sa̱seb li xul li quixmayeja re tixnau bar cuan li be ta̱xic cuiꞌ. 22Nak tixkꞌehi ta̱cꞌutekꞌ chiru nak ta̱xic Jerusalén li cuan saꞌ lix nim ukꞌ. Aran tixyi̱b lix naꞌajeb re teꞌxsut rix li tenamit. Ut teꞌxyi̱b ajcuiꞌ lix cꞌanjeleba̱l ut lix takleba̱l re teꞌoc cuiꞌ saꞌ li tenamit ut teꞌxchap. Li rey tixjap re, re nak eb li soldados teꞌoc chi pletic ut teꞌxtiquib xcamsinquileb li tenamit. 23Eb li cuanqueb Jerusalén incꞌaꞌ teꞌxpa̱b nak oqueb re chi pletic eb laj Babilonia xban nak queꞌxba̱nu li contrato riqꞌuineb. Abanan lix ya̱lal aꞌin, aꞌan re nak ta̱julticokꞌ reheb li ma̱c li queꞌxba̱nu ut re ajcuiꞌ xcꞌutbal chiruheb nak teꞌchapekꞌ. 24Joꞌcan nak la̱in li nimajcual Dios ninye: —Che̱ru nacꞌutun nak cuan le̱ ma̱c. Riqꞌuin chixjunil li nequeba̱nu nacꞌutun le̱ ma̱c. Xban nak xekꞌetkꞌeti e̱rib, joꞌcan nak texchapekꞌ. 25La̱at lix reyeb laj Israel, incꞌaꞌ us la̱ naꞌleb. Xamux a̱cuib xban li ma̱usilal xaba̱nu. Xcuulac xkꞌehil nak ta̱toj rix la̱ ma̱c xban nak xnumta la̱ ma̱usilal. 26La̱in li nimajcual Dios ninye a̱cue: —Isi la̱ corona li cuan saꞌ a̱jolom, joꞌ ajcuiꞌ li tꞌicr li nacatzꞌap cuiꞌ a̱jolom. Anakcuan ta̱jala̱k chixjunil. Li ma̱cꞌaꞌ xcuanquil ta̱qꞌuehekꞌ xcuanquil, ut li cuan xcuanquil ta̱isi̱k xcuanquil. 27Ta̱osokꞌ chixjunil. La̱in tinpoꞌ ru chixjunil. Ut incꞌaꞌ chic ta̱yi̱ba̱k toj saꞌ li cutan nak ta̱cha̱lk li jun li quinqꞌue xcuanquil chi rakoc a̱tin. Saꞌ li cutan aꞌan la̱in tinkꞌaxtesi saꞌ rukꞌ li cꞌanjel aꞌan. 28La̱at, at ralal cui̱nk, ta̱ye resil li cꞌaꞌru ta̱uxma̱nk. Ta̱ye: Joꞌcaꞌin xye li nimajcual Dios che̱rix la̱ex li ralal xcꞌajol laj Amón. La̱ex li nequexhoboc reheb laj Israel. Li chꞌi̱chꞌ ac isinbil chak saꞌ li rochoch. Kꞌesnanbil re ut nalemtzꞌun. Ac cauresinbil re ta̱camsi̱nk. 29Eb li visión li nequeril moco ya̱l ta ut li cꞌaꞌru nequekꞌehi ticꞌtiꞌ. Numtajenak le̱ ma̱usilal ut incꞌaꞌ us le̱ naꞌleb. Abanan cuulac re xkꞌehil nak te̱toj rix le̱ ma̱usilal nak texcamsi̱k chi chꞌi̱chꞌ. 30Xocomak le̱ chꞌi̱chꞌ saꞌ li rochoch, la̱ex aj Amón. La̱in tinrakok a̱tin saꞌ e̱be̱n saꞌ li naꞌajej li quexyoꞌla cuiꞌ, saꞌ li naꞌajej li cuanquex cuiꞌ. 31La̱ex te̱qꞌue retal nak la̱in tincuisi lin joskꞌil saꞌ e̱be̱n. Chanchan jun li xam li yo̱ che̱cꞌatbal. Texinkꞌaxtesi saꞌ rukꞌeb li cui̱nk li kꞌaxal joskꞌeb, li nequeꞌrahobtesin, ut teꞌxsach e̱ru. 32La̱ex tex-osokꞌ saꞌ li xam ut le̱ quiqꞌuel ta̱hoyekꞌ saꞌ le̱ naꞌaj. Ut ma̱ ani chic ta̱jultica̱nk e̱re xban nak la̱in li Ka̱cuaꞌ Dios ninyehoc re aꞌin.—

Currently Selected:

Ezequiel 21: kek

Highlight

Copy

Compare