Ezequiel 22
22
Lix ma̱queb laj Jerusalén
1Li Ka̱cuaꞌ quia̱tinac cuiqꞌuin ut quixye cue: 2—At ralal cui̱nk, la̱at ta̱teneb li raylal aꞌin saꞌ xbe̱neb li tenamit aꞌin li junes camsi̱nc nequeꞌxba̱nu. Ta̱ye resil reheb li raylal li ta̱cha̱lk saꞌ xbe̱neb xban li ma̱usilal nequeꞌxba̱nu. 3Ta̱ye reheb: Joꞌcaꞌin naxye li nimajcual Dios. Cuulac re xkꞌehil nak te̱cꞌul li raylal xban nak xecamsiheb le̱ rech tenamitil ut xemux e̱rib nak xeyi̱b li jalanil dios. 4Xban nak la̱ex xecamsiheb le̱ ras e̱ri̱tzꞌin, joꞌcan nak ta̱se̱ba̱nk chi cha̱lc li raylal saꞌ e̱be̱n. Ut muxbil chic e̱ru xban nak xeyi̱b le̱ jalanil dios. Xma̱c aꞌan tex-osokꞌ. Texhobekꞌ ut texseꞌe̱k xbaneb chixjunileb li xni̱nkal ru tenamit. 5Texhobekꞌ xban le̱ ma̱usilal xbaneb li tenamit li cuanqueb chi najt joꞌ eb ajcuiꞌ li cuanqueb chi nachꞌ. La̱ex li tenamit naꞌno e̱ru xban li ma̱usilal nequeba̱nu nak nequelokꞌoniheb li jalanil dios. 6Eb li nequeꞌtaklan saꞌ e̱ya̱nk la̱ex aj Israel nequeꞌxba̱nu li cꞌaꞌru nequeꞌraj xjuneseb xban nak cuanqueb saꞌ xcuanquil. Joꞌcan nak nequeꞌxcamsi ras ri̱tzꞌineb. 7Eb aꞌan incꞌaꞌ nequeꞌxra xnaꞌ xyucuaꞌeb. Nequeꞌxrahobtesiheb li jalan xtenamiteb. Ut nequeꞌxba̱nu raylal reheb li ma̱cꞌaꞌ xnaꞌ xyucuaꞌeb joꞌ eb ajcuiꞌ li xma̱lcaꞌan. 8Xetzꞌekta̱naheb li naꞌajej li niquine̱lokꞌoni cuiꞌ ut nequemux ru li hiloba̱l cutan. 9Saꞌ e̱ya̱nk cuanqueb li nequeꞌyoꞌoban ticꞌtiꞌ chirixeb li ras ri̱tzꞌin re nak teꞌcamsi̱k. Cuanqueb li nequeꞌxcuaꞌ li tzacae̱mk li quimayeja̱c chiruheb li jalanil dios saꞌ eb li tzu̱l. Ut nequeꞌxba̱nu li ma̱usilal. 10Cuanqueb li nequeꞌxchꞌic rib riqꞌuin li rixakil lix yucuaꞌeb, ut cuanqueb cui̱nk nequeꞌxchꞌic rib riqꞌuineb li ixk nak yo̱queb chixcꞌulbal lix yajel re li po. 11Cuanqueb li cui̱nk nequeꞌxmakꞌ rixakil li ras ri̱tzꞌin. Ut cuanqueb li cui̱nk nequeꞌxchꞌic rib riqꞌuineb li ralib. Ut cuanqueb ajcuiꞌ li nequeꞌxchꞌic rib riqꞌuin lix rabin li xcab xyucuaꞌ. 12Cuanqueb cui̱nk nequeꞌtumina̱c ru re teꞌxcamsi ras ri̱tzꞌin. Cuanqueb li nequeꞌxpatzꞌ nabal li ral li tumin li nequeꞌxqꞌue chi toꞌ. Cuanqueb li nequeꞌxsicꞌ lix biomaleb riqꞌuin xmakꞌbal xtumineb li ras ri̱tzꞌin. Incꞌaꞌ chic niquineꞌxcꞌoxla la̱in. La̱in li Ka̱cuaꞌ Dios ninyehoc re aꞌin. 13Relic chi ya̱l nak la̱ex xechikꞌ injoskꞌil xban nak xesicꞌ le̱ biomal riqꞌuin xba̱nunquil li ma̱usilal ut xecamsiheb le̱ ras e̱ri̱tzꞌin. 14¿Ma toj cauhak ta biꞌ e̱chꞌo̱l ut ma toj cauhak ta biꞌ e̱rib saꞌ li cutan nak la̱in texinqꞌue chixtojbal rix le̱ ma̱c? La̱in li Ka̱cuaꞌ Dios xinyehoc re nak texinqꞌue chixtojbal rix le̱ ma̱c ut la̱in tinba̱nu li cꞌaꞌru xinye. 15La̱in texinjeqꞌui yalak bar saꞌ ruchichꞌochꞌ saꞌ xya̱nkeb li jalan tenamit. Ut incꞌaꞌ chic ta̱ru̱k te̱ba̱nu li ma̱usilal. 16Xicꞌ chic tex-ilekꞌ ut textzꞌekta̱na̱k xbaneb li xni̱nkal ru tenamit. Riqꞌuin aꞌin te̱qꞌue retal nak la̱in li Ka̱cuaꞌ Dios.— 17Li Ka̱cuaꞌ quia̱tinac cuiqꞌuin ut quixye cue: 18—At ralal cui̱nk, eb laj Israel ma̱cꞌaꞌ nequeꞌoc cuiꞌ chicuu la̱in. Chanchaneb li chꞌi̱chꞌ cobre. Ut chanchaneb li cacuil chꞌi̱chꞌ hierro ut plomo li na-elaꞌan nak ac xcꞌateꞌ saꞌ xam li cha̱bil plata re risinquil lix tzꞌajnil. 19Joꞌcan nak la̱in li nimajcual Dios ninye: Xban nak ma̱cꞌaꞌ chic nequex-oc cuiꞌ, joꞌcan nak la̱in texinchꞌutub aran Jerusalén. 20Xban nak yo̱ injoskꞌil saꞌ e̱be̱n, joꞌcan nak la̱in texinchꞌutub ut tinrakok a̱tin saꞌ e̱be̱n. Chanchan nak nequeꞌxchꞌutub li plata, li cobre, li hierro ut li plomo joꞌ ajcuiꞌ li kꞌan chꞌi̱chꞌ ut nequeꞌxqꞌue saꞌ li tikcual xam re nak ta̱haꞌokꞌ. 21Xban nak yo̱ injoskꞌil saꞌ e̱be̱n, la̱in texinchꞌutub ut tinrakok a̱tin saꞌ e̱be̱n. Chanchan nak texcuapu riqꞌuin tikcual xam re nak tex-osokꞌ. 22La̱ex li cuanquex Jerusalén, ta̱rakekꞌ a̱tin saꞌ e̱be̱n re nak ta̱e̱lk li incꞌaꞌ us saꞌ e̱ya̱nk, joꞌ nak nahaꞌoꞌ li plata saꞌ li xam. Riqꞌuin aꞌin te̱qꞌue retal nak la̱in li nimajcual Dios xinqꞌuehoc e̱re chixtojbal rix e̱ma̱c xban nak yo̱ injoskꞌil saꞌ e̱be̱n.— 23Li Ka̱cuaꞌ quia̱tinac cuiqꞌuin ut quixye cue: 24—At ralal cui̱nk, ye reheb laj Israel nak yo̱ injoskꞌil saꞌ xbe̱neb ut tebinqꞌue chixtojbal rix lix ma̱queb. Chanchaneb li chꞌochꞌ li incꞌaꞌ akꞌinbil. Chanchaneb li chꞌochꞌ li incꞌaꞌ naxqꞌue hab saꞌ xbe̱n. 25Eb li nequeꞌcꞌamoc be chanchaneb li cakcoj li yo̱queb chixjapbal re saꞌ xbe̱n lix tib. Nequeꞌxcamsiheb li rech tenamitil ut nequeꞌxmakꞌ chiruheb li cꞌaꞌru reheb. Nabaleb li xma̱lcaꞌan xban nak queꞌcamsi̱c lix be̱lomeb. 26Eb laj tij queꞌxkꞌet lin chakꞌrab ut queꞌxmux ru lin santil naꞌaj. Incꞌaꞌ nequeꞌxqꞌue retal bar cuan li santobresinbil ut bar cuan li muxbil ru, chi moco nequeꞌxcꞌut chiru li tenamit li cꞌaꞌru santobresinbil ut li cꞌaꞌru muxbil ru, chi moco nequeꞌxqꞌue xlokꞌal li hiloba̱l cutan. Ut la̱in tzꞌekta̱nanbilin xbaneb. 27Eb li nequeꞌtaklan saꞌ li tenamit chanchaneb chic laj xoj li yo̱queb chixtꞌupbal lix tibeb. Nequeꞌxcamsiheb li ras ri̱tzꞌin xban xsicꞌbal xbiomaleb. 28Ut eb li profetas nequeꞌxmuk lix ma̱queb. Chanchaneb li cui̱nk li nequeꞌxbon li tzꞌac re xmukbal li tzꞌaj cuan chiru. Aꞌaneb aj balakꞌ ut nequeꞌbalakꞌic riqꞌuin xyebal nak li cꞌaꞌru nequeꞌxye, aꞌan cꞌutbil chiruheb inban la̱in. Abanan la̱in incꞌaꞌ xina̱tinac riqꞌuineb. 29Eb li tenamit junes rahobtesi̱nc nequeꞌxcꞌoxla xba̱nunquil. Ut aj e̱lkꞌeb. Nequeꞌxba̱nu raylal reheb li nebaꞌ ut reheb li tenkꞌa̱c teꞌraj. Nequeꞌxrahobtesiheb ajcuiꞌ li jalan xtenamiteb li incꞌaꞌ xcꞌulubeb rahobtesi̱c. 30La̱in xinsicꞌ jun saꞌ xya̱nkeb re nak tixcoleb chicuu. Xinsicꞌ jun naru tixchꞌolob lix ya̱lal chiruheb re nak incꞌaꞌ tinsacheb lin tenamit. Abanan ma̱ jun cha̱bil xintau. 31Joꞌcan nak la̱in tincuisi lin joskꞌil saꞌ xbe̱neb. Chanchanakin li xam nak tinsach ruheb. Aꞌaneb ajcuiꞌ teꞌtojok re li ma̱usilal xeꞌxba̱nu. La̱in li nimajcual Dios ninyehoc re aꞌin.—
Currently Selected:
Ezequiel 22: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
