Ezequiel 18
18
1Li Ka̱cuaꞌ quia̱tinac cuiꞌchic cuiqꞌuin ut quixye cue: 2—¿Cꞌaꞌru nequecꞌoxla chirix li jaljo̱quil ru a̱tin aꞌin li yo̱queb chixyebal chirixeb laj Israel? Li naꞌbej yucuaꞌbej nequeꞌxlou li uvas rare ut aꞌ chic lix cocꞌaleb nequeꞌecꞌan lix rahil re.#Saꞌ li versículo 18:2 lix ya̱lal aꞌan, aꞌin: Eb li naꞌbej yucuaꞌbej xeꞌma̱cob ut eb li alal cꞌajolbej chic teꞌtojok re lix ma̱queb. 3La̱in li yoꞌyo̱quil Dios ninye e̱re nak chi ya̱l ma̱ jun cua chic ta̱yema̱nk li jaljo̱quil ru a̱tin aꞌin saꞌ li naꞌajej Israel. 4Chixjunileb li cristian cueheb la̱in joꞌ li naꞌbej yucuaꞌbej joꞌ eb ajcuiꞌ li alal cꞌajolbej. Ut li ani nama̱cob, aꞌan ta̱ca̱mk. 5Cui junak li cui̱nk ti̱c xchꞌo̱l, aꞌan nacuan saꞌ ti̱quilal ut naxba̱nu li us. 6Incꞌaꞌ naxlokꞌoniheb li yi̱banbil dios li cuanqueb Israel, chi moco naxcuaꞌ li tzacae̱mk mayejanbil saꞌ li tzu̱l. Incꞌaꞌ naxchꞌic rib riqꞌuin rixakil li ras ri̱tzꞌin, chi moco nacuan riqꞌuin li rixakil nak yo̱ xyajel re li po. 7Ma̱ ani naxrahobtesi chi moco na-elkꞌac. Naxkꞌaxtesi li nequeꞌxcanab riqꞌuin chokꞌ xprenda li ani natoꞌonin. Naxqꞌue xtzacae̱mk li ta̱tzꞌoca̱k ut naxqꞌue rakꞌ li ma̱cꞌaꞌ rakꞌ. 8Incꞌaꞌ naxpatzꞌ ral lix tumin li naxqꞌue chi toꞌ. Incꞌaꞌ naxsicꞌ xbiomal riqꞌuin xtoꞌoninquil tumin. Incꞌaꞌ naxcꞌu̱luban xchꞌo̱l xba̱nunquil li ma̱usilal ut narakoc a̱tin saꞌ xya̱lal nak cuan junak chꞌaꞌajquilal. 9Li jun aꞌan naxpa̱b lin chakꞌrab ut naxqꞌue xchꞌo̱l chixba̱nunquil li ninye. Aꞌan ti̱c xchꞌo̱l ut ta̱cua̱nk xyuꞌam, chan li Ka̱cuaꞌ Dios. 10Ma̱re li cui̱nk li ti̱c xchꞌo̱l cuan junak li ralal aj e̱lkꞌ nacamsin ut naxba̱nu li incꞌaꞌ us li ma̱ jun sut quixba̱nu li yucuaꞌbej. 11Ut ma̱re naxtzaca li tzacae̱mk mayejanbil saꞌ eb li tzu̱l chiruheb li jalanil dios, ut naxchꞌic rib riqꞌuin li rixakil li ras ri̱tzꞌin. 12Ma̱re naxrahobtesiheb li nebaꞌ ut li tenkꞌa̱c teꞌraj ut na-elkꞌa̱c. Incꞌaꞌ naxkꞌaxtesi li cꞌaꞌru quiqꞌueheꞌ re chokꞌ prenda. Naxlokꞌoniheb li jalanil dios ut naxba̱nu li ma̱usilal. 13Naxpatzꞌ nabal li ral li tumin li naxqꞌue chi toꞌ. ¿Ma ta̱cana̱k ta biꞌ chi yoꞌyo li alalbej aꞌan? Incꞌaꞌ. Aꞌan ta̱camsi̱k xban li ma̱usilal li quixba̱nu ut xcꞌulub nak ta̱camsi̱k. 14Ma̱re li cui̱nk li incꞌaꞌ us xnaꞌleb cuan junak li ralal naxqꞌue retal nak incꞌaꞌ us naxba̱nu lix yucuaꞌ. Ut li alalbej incꞌaꞌ tixba̱nu joꞌ naxba̱nu lix yucuaꞌ. 15Incꞌaꞌ naxcuaꞌ li tzacae̱mk mayejanbil saꞌ eb li tzu̱l chiruheb li jalanil dios, chi moco tixlokꞌoniheb li jalanil dios li cuanqueb Israel. Ut incꞌaꞌ tixchꞌic rib riqꞌuin rixakil li ras ri̱tzꞌin. 16Incꞌaꞌ naxrahobtesiheb li ras ri̱tzꞌin ut naxkꞌaxtesi li cꞌaꞌru naqꞌueheꞌ re chokꞌ prenda. Incꞌaꞌ na-elkꞌac. Naxqꞌue xcuaheb li nequeꞌtzꞌoca ut naxqꞌueheb rakꞌ li ma̱cꞌaꞌ rakꞌeb. 17Incꞌaꞌ naxcꞌu̱luban xchꞌo̱l xba̱nunquil li ma̱usilal ut incꞌaꞌ naxpatzꞌ ral li tumin li naxqꞌue chi toꞌ. Naxba̱nu li cꞌaꞌru naxye saꞌ lin chakꞌrab ut naxba̱nu li cꞌaꞌru ninye. Li alalbej aꞌan incꞌaꞌ ta̱ca̱mk xban li ma̱c quixba̱nu lix yucuaꞌ. Ta̱cua̱nk ban xyuꞌam. 18Li yucuaꞌbej ta̱ca̱mk xban li ma̱c li quixba̱nu nak quixmakꞌ chiru li ras ri̱tzꞌin li cꞌaꞌru cuan reheb ut qui-elkꞌa̱c. Quixba̱nu li ma̱usilal reheb li ras ri̱tzꞌin. 19Ma̱re la̱ex te̱ye, “¿Cꞌaꞌut nak li alalbej incꞌaꞌ ta̱tzꞌako̱nk riqꞌuin li raylal li tixcꞌul li yucuaꞌbej?” Li alalbej incꞌaꞌ ta̱ca̱mk xban nak quixba̱nu li us ut quicuan saꞌ ti̱quilal ut quixba̱nu li cꞌaꞌru naxye saꞌ lin chakꞌrab. Joꞌcan nak ta̱cua̱nk lix yuꞌam. 20Li ani ta̱ma̱cobk, aꞌan ta̱ca̱mk. Li alalbej incꞌaꞌ tixcꞌul li raylal saꞌ xcꞌabaꞌ li ma̱c li quixba̱nu lix yucuaꞌ. Chi moco li yucuaꞌbej tixcꞌul li raylal saꞌ xcꞌabaꞌ li ma̱c li quixba̱nu li ralal. Li ani nacuan saꞌ ti̱quilal tixcꞌul lix kꞌajca̱munquil ut li ani naxba̱nu li ma̱c tixcꞌul lix tojbal ma̱c. 21Cui li cui̱nk li incꞌaꞌ us xnaꞌleb tixcanab li ma̱cobc ut tixpa̱b lin chakꞌrab ut tixba̱nu li ti̱quilal ut li us, aꞌan incꞌaꞌ ta̱ca̱mk. Ta̱cua̱nk ban xyuꞌam. 22Chixjunil li ma̱c li quixba̱nu chak junxil incꞌaꞌ ta̱julticokꞌ re li Dios ut incꞌaꞌ ta̱camsi̱k xban nak quixjal xnaꞌleb ut quixba̱nu li us. 23Li nimajcual Dios quixye: —¿Ma nasahoꞌ ta biꞌ inchꞌo̱l nak junak ta̱ca̱mk xban li ma̱usilal li quixba̱nu? Incꞌaꞌ. Nasahoꞌ ban saꞌ inchꞌo̱l nak naxjal xcꞌaꞌux ut naxcanab xba̱nunquil li ma̱usilal ut ta̱cua̱nk xyuꞌam. 24Abanan cui junak ti̱c xchꞌo̱l tixjal xnaꞌleb ut tixba̱nu li ma̱usilal li nequeꞌxba̱nu li incꞌaꞌ useb xnaꞌleb, li jun aꞌan ta̱ca̱mk. Ut incꞌaꞌ tixcꞌul xkꞌajca̱munquil li us li quixba̱nu junxil. Ta̱ca̱mk xban li ma̱c li quixba̱nu ut xban nak quixkꞌetkꞌeti rib. 25Ut cui la̱ex te̱ye nak moco ti̱c ta li cꞌaꞌru yo̱quin chixba̱nunquil, la̱in li Ka̱cuaꞌ tinye e̱re: Abihomak la̱ex aj Israel. ¿Ma ya̱l nak moco ti̱c ta li cꞌaꞌru yo̱quin chixba̱nunquil? ¿Ma ma̱cuaꞌ ta biꞌ la̱ex li incꞌaꞌ nequexcuan saꞌ ti̱quilal? 26Cui li ti̱c xchꞌo̱l tixcanab cua̱nc saꞌ ti̱quilal ut tixba̱nu li ma̱usilal, aꞌan ta̱ca̱mk saꞌ xcꞌabaꞌ li ma̱usilal li quixba̱nu. Xma̱c li ma̱usilal li yo̱k chixba̱nunquil ta̱ca̱mk. 27Cui junak yo̱ chixba̱nunquil li ma̱usilal tixjal xcꞌaꞌux ut tixba̱nu li us ut ta̱cua̱nk saꞌ ti̱quilal, li jun aꞌan tixcol rix lix yuꞌam. 28Xban nak quixqꞌue retal nak moco us ta nak yo̱ chi kꞌetoc a̱tin, joꞌcan nak quixcanab xba̱nunquil li ma̱usilal. Relic chi ya̱l li jun aꞌan ta̱cua̱nk xyuꞌam. Incꞌaꞌ ta̱ca̱mk. 29Ut cui la̱ex aj Israel te̱ye nak moco ti̱c ta li cꞌaꞌru yo̱quin chixba̱nunquil, la̱in li Ka̱cuaꞌ tinye: ¿Ma ya̱l nak moco ti̱c ta li cꞌaꞌru yo̱quin chixba̱nunquil? ¿Ma ma̱cuaꞌ ta biꞌ la̱ex li incꞌaꞌ nequexcuan saꞌ ti̱quilal? 30Ex aj Israel, la̱in tinrakok a̱tin saꞌ e̱be̱n che̱junju̱nkalex, aꞌ yal chanru le̱ yehom e̱ba̱nuhom. Jalomak e̱cꞌaꞌux ut canabomak xba̱nunquil li ma̱usilal li yo̱quex chixba̱nunquil. Me̱qꞌue e̱rib chi sachc xban le̱ ma̱c. 31Canabomak chixjunil le̱ kꞌetba a̱tin li xexma̱cob cuiꞌ. Jalomak e̱cꞌaꞌux ut acꞌak chic le̱ yuꞌam. ¿Cꞌaꞌut nak te̱qꞌue e̱rib chi ca̱mc xban le̱ ma̱c, ex aj Israel? 32La̱in ma̱ jun e̱re nacuaj ta̱ca̱mk. Jalomak ban le̱ cꞌaꞌux ut ta̱cua̱nk le̱ yuꞌam, chan li nimajcual Dios.
Currently Selected:
Ezequiel 18: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
