Ezequiel 17
17
Li jaljo̱quil ru a̱tin chirix li acui̱mk ut li xul tꞌiu xcꞌabaꞌ
1Li Ka̱cuaꞌ quia̱tinac cuiqꞌuin ut quixye cue: 2—At ralal cui̱nk, ta̱serakꞌi jun li jaljo̱quil ru a̱tin reheb li ralal xcꞌajol laj Israel. 3Ta̱ye reheb chi joꞌcaꞌin: aꞌan aꞌin li naxye li nimajcual Dios. Quicuulac Líbano jun li nimla xul tꞌiu xcꞌabaꞌ. Najt rok lix xicꞌ ut nabal pa̱y ru lix color. Kꞌaxal cau narupupic. Quixchap lix kꞌunal saꞌ li ruꞌuj jun li nimla chacalteꞌ. 4Quixtok li ruꞌuj li cheꞌ ut quixcꞌam toj saꞌ lix chꞌochꞌeb laj yaconel ut aran quirau saꞌ lix tenamiteb laj Babilonia. 5Co̱ cuiꞌchic Israel ut quixcꞌam ajcuiꞌ li riyajil li cꞌa̱m li cuan saꞌ li tenamit Israel ut quirau saꞌ li cha̱bil chꞌochꞌ chire li nimaꞌ re nak ta̱qꞌui̱k. 6Quimok li iyaj. Incꞌaꞌ najt xteram quicuulac, abanan nabal li rukꞌ qui-el. Eb li rukꞌ queꞌxhel rib saꞌ xjayal li tenamit li cuan cuiꞌ li tꞌiu. Ut lix xeꞌ co̱ saꞌ li chꞌochꞌ. Nabal li rukꞌ ut nabal ajcuiꞌ lix xak. 7Ut cuan jun chic li xul tꞌiu li xchal saꞌ jun chic tenamit li cuan saꞌ li sur. Co̱ Israel. Nabal lix xicꞌ ut cau narupupic. Lix xeꞌ li acui̱mk joꞌ ajcuiꞌ li rukꞌ queꞌxhel rib saꞌ xjayal li cuan cuiꞌ li tꞌiu jun chic re nak li tꞌiu aꞌan tixtꞌakresi. 8Li jun to̱n chi acui̱mk aꞌan ac aubil saꞌ cha̱bil chꞌochꞌ chire li nimaꞌ re nak chꞌinaꞌus ta̱qꞌui̱k ut tixhel rib li rukꞌ ut tixqꞌue li ru. 9Li Ka̱cuaꞌ quixye cue: —Ta̱ye reheb nak joꞌcaꞌin xye li Ka̱cuaꞌ: ¿Ma tixchap ta biꞌ chic xxeꞌ? ¿Ma incꞌaꞌ ta biꞌ ta̱michꞌekꞌ lix xeꞌ xban li tꞌiu li xchal saꞌ li este ut ta̱sachekꞌ li ru ut ta̱chakik? Chixjunil lix xak li toj rax ru teꞌchakik. Ut eb li teꞌmichꞌok re moco nabalakeb ta, chi moco cauhakeb ta xmetzꞌe̱uheb. 10¿Ma us ta biꞌ ta̱e̱lk li acui̱mk aꞌin? ¿Ma incꞌaꞌ ta biꞌ ta̱chakik chi junaj cua xban li tikcual ikꞌ li ta̱cha̱lk saꞌ li este? Usta rax raxak ru ta̱chakik saꞌ xnaꞌaj. 11Ut li Ka̱cuaꞌ quia̱tinac cuiꞌchic cuiqꞌuin ut quixye cue: 12—Patzꞌ reheb laj Israel li kꞌaxal kꞌetkꞌeteb ma xeꞌxtau ru li jaljo̱quil ru a̱tin li xaye reheb. Ye reheb nak aꞌan aꞌin lix ya̱lal. Lix reyeb laj Babilonia quicuulac Jerusalén ut quixcꞌam toj Babilonia li rey rochbeneb li nequeꞌtenkꞌan re. 13Ut quixcꞌam ajcuiꞌ jun reheb li ralal li rey li cuan xcuanquil ut quixba̱nu li contrato riqꞌuin. Quixpuersi ru chixba̱nunquil li juramento nak tixba̱nu li cꞌaꞌru quixye saꞌ li contrato. Ut quixcꞌameb ajcuiꞌ chirix li cui̱nk li cauheb rib li cuanqueb Jerusalén. 14Queꞌxba̱nu chi joꞌcan re xcubsinquil xcuanquileb li ralal xcꞌajol laj Judá re nak incꞌaꞌ chic teꞌcua̱nk joꞌ jun tenamit. Caꞌaj cuiꞌ riqꞌuin xba̱nunquil li cꞌaꞌru queꞌxyechiꞌi saꞌ li contrato naru nequeꞌcuan. 15Abanan lix reyeb laj Judá quixkꞌetkꞌeti rib chiru lix reyeb laj Babilonia. Ut quixtaklaheb lix takl Egipto chixsicꞌbaleb li cacua̱y ut nabaleb li soldados. ¿Ma ta̱ru̱k ta biꞌ tixba̱nu li cꞌaꞌru naxcꞌoxla xba̱nunquil lix reyeb laj Judá? ¿Ma ta̱ru̱k ta biꞌ tixcol rib nak ac xkꞌet li cꞌaꞌru quixye saꞌ li contrato? 16La̱in li yoꞌyo̱quil Dios ninye nak relic chi ya̱l lix reyeb laj Judá ta̱ca̱mk aran Babilonia xban nak incꞌaꞌ quixba̱nu li quixye saꞌ li contrato. Quixtzꞌekta̱na li juramento li quixba̱nu riqꞌuin lix reyeb laj Babilonia li quiqꞌuehoc re saꞌ lix cuanquil. 17Lix reyeb laj Egipto ma̱cꞌaꞌ tixba̱nu re xtenkꞌanquileb usta tixtakla nabal li soldado chi pletic. Incꞌaꞌ teꞌxcuy nak eb laj Babilonia teꞌxyi̱b lix takleba̱l chixjun sutam li tenamit re teꞌoc Jerusalén chixcamsinquileb nabaleb laj Judá. 18Lix reyeb laj Judá quixtzꞌekta̱na li juramento li quixba̱nu ut quixkꞌet li contrato nak quixba̱nu chixjunil li cꞌaꞌak re ru aꞌin. Joꞌcan nak moco naru ta tixcol rib. 19La̱in li yoꞌyo̱quil Dios ninye nak relic chi ya̱l la̱in tinqꞌue chixtojbal lix ma̱c xban nak quixtzꞌekta̱na li contrato li quixba̱nu cuiqꞌuin riqꞌuin juramento. 20La̱in tinqꞌue chixtojbal lix ma̱c xban nak quinixtzꞌekta̱na. Chanchan nak tinchap aꞌan saꞌ lin raꞌal nak tincanab chi cꞌamecꞌ Babilonia. 21Chixjunileb li yo̱keb chi e̱lelic rochbeneb lix soldado teꞌcamsi̱k. Eb li incꞌaꞌ teꞌcamsi̱k teꞌjeqꞌui̱k ruheb yalak bar. Ut riqꞌuin aꞌan te̱qꞌue retal nak la̱in li Ka̱cuaꞌ quinyehoc re aꞌin. 22Aꞌan aꞌin li naxye li nimajcual Dios: —La̱in tinchap li ruꞌuj jun li chacalteꞌ najt xteram. Tinchꞌot lix kꞌunal saꞌ ruꞌuj ut tincuau saꞌ xbe̱n jun li tzu̱l najt xteram. 23Tincuau aran Israel saꞌ li tzu̱l li kꞌaxal najt xteram. Cha̱bilak li chacalteꞌ aꞌan ut nabalak li rukꞌ ut ta̱u̱chi̱nk ajcuiꞌ. Qꞌuila pa̱y ru li xul li nequeꞌrupupic teꞌxyi̱b lix soqueb saꞌ li rukꞌ li cheꞌ ut teꞌxcol ribeb saꞌ lix mu. 24Chixjunileb li cheꞌ li cuanqueb saꞌ li qꞌuicheꞌ teꞌxnau nak la̱in nintꞌaneb li cheꞌ li najt xteram ut ninqꞌue chi qꞌui̱c li cocꞌ rokeb. La̱in ninchakihobresiheb li cheꞌ li rax ru ut ninqꞌueheb chi raxocꞌ li chaki. La̱in li Ka̱cuaꞌ quinyehoc re aꞌin ut la̱in ninba̱nu li cꞌaꞌru ninye.—
Currently Selected:
Ezequiel 17: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
