Ezequiel 1
1
Laj Ezequiel quiril lix lokꞌal li Dios saꞌ visión
1La̱in laj Ezequiel laj tij. La̱in jun saꞌ xya̱nkeb laj Israel li queꞌchapeꞌ ut queꞌcꞌameꞌ saꞌ li naꞌajej Babilonia. Cocꞌameꞌ chire li nimaꞌ Quebar. O̱b cutan chic xticlajic xca̱ li po re li laje̱b xcaꞌcꞌa̱l chihab nak li Dios quixcꞌutbesiheb li visión chicuu. Quiteli li choxa chicuu nak quicuil. 2Ac o̱b chihab xcꞌambal li rey Joaquín aran Babilonia. 3Saꞌ li chihab aꞌan, saꞌ li roꞌ xbe li xca̱ po nak cuanquin saꞌ xchꞌochꞌeb laj Babilonia chire li nimaꞌ Quebar quicuabi nak li Ka̱cuaꞌ quia̱tinac cuiqꞌuin la̱in li ralal laj Buzi. Chanchan nak quixqꞌue li rukꞌ saꞌ inbe̱n nak quicuecꞌa lix cuanquil. 4Quicuil nak yo̱ chak chi cha̱lc saꞌ li norte jun cacuil ikꞌ. Li ikꞌ aꞌan yo̱ chak chixcꞌambal jun li chok sutsu riqꞌuin xam ut nalemtzꞌun. Chanchan yo̱ chi repoc joꞌ nak narepoc li ca̱k. Ut saꞌ li chok nacꞌutun jun li xam ut saꞌ li xam cuan jun li nalemtzꞌun joꞌ li kꞌan chꞌi̱chꞌ bronce. 5Ut saꞌ li xam queꞌcꞌutun ca̱hib li chanchaneb ángel yoꞌyo̱queb. Chanchan nequeꞌiloc cui̱nk. 6Chixju̱nkaleb cuanqueb ca̱hib li riloba̱l ut ca̱hib lix xiqꞌueb. 7Ut lix tzelequeb ti̱queb ut li rokeb chanchan rokeb li cuacax ut nalemtzꞌun joꞌ li kꞌan chꞌi̱chꞌ bronce. 8Rubeleb lix xicꞌ ca̱hib cuan li rukꞌeb chanchan rukꞌeb cui̱nk. Chixju̱nkaleb ca̱ ca̱ li riloba̱leb ut ca̱ ca̱ lix xiqꞌueb saꞌ xca̱ pacꞌalileb. 9Nequeꞌxcꞌul ribeb lix xiqꞌueb chi ribileb rib. Ut nak nequeꞌbe̱c incꞌaꞌ nequeꞌxic chirix. Ti̱c ban chiru nequeꞌxic. 10Joꞌcaꞌin nequeꞌiloc li ca̱hib chi riloba̱l li junju̱nk chi ángel: Li cuan chiruheb, aꞌan chanchan na-iloc cui̱nk. Li cuan saꞌ lix nimeb, aꞌan chanchan na-iloc cakcoj. Ut li cuan saꞌ lix tzꞌeheb, aꞌan chanchan na-iloc bo̱yx. Ut li cuan chirixeb, aꞌan chanchan na-iloc tꞌiu. 11Ut helho ruheb lix xiqꞌueb saꞌ xbe̱neb chi xju̱nkaleb. Cuib lix xiqꞌueb nequeꞌxcꞌul ribeb ut riqꞌuin li cuib chic nequeꞌxtzꞌap rib. 12Nak nequeꞌbe̱c chi xju̱nkaleb ti̱c chiruheb nequeꞌxic. Nequeꞌxic bar nequeꞌcꞌameꞌ cuiꞌ xban lix musikꞌ. Incꞌaꞌ tento nak toj teꞌxsukꞌisi ribeb nak nequeꞌbe̱c. 13Eb li ca̱hib li yoꞌyo̱queb, li chanchaneb ángel, aꞌan queꞌcꞌutun saꞌ li visión joꞌ li ru xam li yo̱ xxamlel. Cuan li xam chanchan yo̱ chi be̱c saꞌ xya̱nkeb ut nalemtzꞌun ut saꞌ li xam narepoc li ca̱k. 14Ut li ca̱hib li chanchaneb ángel nequeꞌchal nequeꞌxic saꞌ junpa̱t joꞌ nak narepoc li ca̱k. 15Nak yo̱quin chirilbaleb li ca̱hib li chanchaneb ángel quicuil ajcuiꞌ ca̱hib li rueda saꞌ ruchichꞌochꞌ. Junju̱nk li rueda cuan chixcꞌatkeb li junju̱nk li chanchaneb ángel. 16Li ca̱hib chi rueda juntakꞌe̱teb xyi̱banquileb. Eb li rueda aꞌan nequeꞌlemtzꞌun chanchan li cha̱bil pec crisólito. Ut eb li ruedas aꞌan quicuil chanchan nak cuan chic jun li rueda chi saꞌ li jun chic. 17Saꞌ xca̱ pacꞌalil nequeꞌxic li ruedas aꞌan. Nak nequeꞌxic incꞌaꞌ nequeꞌxsukꞌisi ribeb. 18Ut li chꞌi̱chꞌ li sursu li cuan chiru li rueda cuan nabal xnakꞌeb ru saꞌ li ca̱hib chi rueda. Xiu xiu rilbal. 19Nak nequeꞌbe̱c li ca̱hibeb li chanchaneb ángel, nequeꞌbe̱c ajcuiꞌ li ruedas rochbeneb. Ut nak eb li chanchaneb ángel nequeꞌcuacli, eb li ruedas nequeꞌcuacli ajcuiꞌ. 20Eb li chanchaneb ángel beresinbileb xban lix musikꞌ ut nequeꞌxic bar nequeꞌcꞌameꞌ cuiꞌ. Ut eb li ruedas nequeꞌxic bar nequeꞌxic cuiꞌ li chanchaneb ángel. 21Nak nequeꞌbe̱c li chanchaneb ángel, nequeꞌbe̱c ajcuiꞌ li ruedas. Ut nak nequeꞌxakli, nequeꞌxakli ajcuiꞌ li ruedas. Nak nequeꞌcuacli, nequeꞌcuacli li ruedas xban nak lix musikꞌeb li chanchaneb ángel na-ecꞌasin reheb li ruedas. 22Ut saꞌ xbe̱neb li ca̱hib li chanchaneb ángel cuan li chanchan choxa nalemtzꞌun joꞌ li lem. 23Ut rubel li chanchan choxa helho̱queb lix xicꞌ chi ti̱c ut nequeꞌxcꞌul ribeb. Ut riqꞌuin li cuib chic li xiqꞌueb nequeꞌxtzꞌap ribeb. 24Ut quicuabi lix ya̱b lix xiqꞌueb nak yo̱queb chi be̱c chanchan nak na-ecꞌan xya̱b rok li haꞌ, malaj ut chanchan xya̱b xcux li nimajcual Dios, malaj ut chanchan xya̱beb li qꞌuila tenamit, malaj ut chanchan xya̱b li jun tu̱b chi soldados. Ut nak nequeꞌxakli, nequeꞌxcubsi lix xiqꞌueb. 25Nak nequeꞌxakli nequeꞌxcubsi lix xiqꞌueb, na-abiman jun xya̱b cux na-el chak saꞌ xbe̱n li chanchan choxa, li cuan saꞌ xbe̱n lix jolomeb li chanchaneb ángel. 26Ut saꞌ xbe̱n li chanchan choxa li cuan saꞌ xbe̱neb li chanchaneb ángel, quicꞌutun jun li cꞌojariba̱l yi̱banbil riqꞌuin li cha̱bil raxi pec zafiro. Ut saꞌ li cꞌojariba̱l aꞌan chunchu jun li chanchan cui̱nk. 27Ut quicuil ajcuiꞌ li cui̱nk li chunchu saꞌ li cꞌojariba̱l chanchan li kꞌan chꞌi̱chꞌ bronce li jun tokol naticla saꞌ lix cꞌa̱mal xsaꞌ toj takecꞌ. Chanchan yo̱ xxamlel. Ut li jun tokol chic li naticla saꞌ lix cꞌa̱mal xsaꞌ toj takꞌa chanchan xam. Cꞌajoꞌ nak nalemtzꞌun chi xjun sutam. 28Nalemtzꞌun lix lokꞌal li Dios nak quicuil. Chanchan li xo̱quikꞌab li naxqꞌue rib saꞌ li chok nak yo̱ li hab. Nak quicuil lix lokꞌal li Dios, quincut cuib saꞌ chꞌochꞌ ut quicuabi xya̱b xcux nak qui-oc chi a̱tinac.
Currently Selected:
Ezequiel 1: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
