Ezequiel 2
2
Laj Ezequiel quisiqꞌueꞌ ru xban li Dios chi cꞌanjelac chokꞌ profeta
1Li Ka̱cuaꞌ quixye cue: —At ralal cui̱nk, cuaclin. La̱in tina̱tinak a̱cuiqꞌuin, chan. 2Ut nak quinra̱tina li Ka̱cuaꞌ, quichal cuiqꞌuin lix musikꞌ ut quinixxakab ut la̱in quicuabi nak quinra̱tina. 3Ut li Ka̱cuaꞌ quixye cue: —At ralal cui̱nk, yo̱quin cha̱taklanquil riqꞌuineb li ralal xcꞌajol laj Israel. Eb li tenamit aꞌan kꞌaxal kꞌetkꞌeteb ut queꞌxkꞌet li cua̱tin. Eb aꞌan joꞌ eb ajcuiꞌ lix xeꞌto̱nil yucuaꞌeb yo̱queb chi ma̱cobc chicuu toj chalen anakcuan. 4Kꞌaxal joskꞌeb ut kꞌaxal cauheb xchꞌo̱l. La̱in yo̱quin cha̱taklanquil riqꞌuineb re nak ta̱ye reheb: Joꞌcaꞌin xye li Ka̱cuaꞌ Dios. 5Ma̱re chan nak teꞌrabi. Cui ut incꞌaꞌ, ma̱cꞌaꞌ xjalenquil, xban nak aꞌaneb jun tenamit kꞌaxal kꞌetkꞌeteb. Abanan teꞌxnau nak quicuan jun profeta saꞌ xya̱nkeb re xchꞌolobanquil lix ya̱lal chiruheb. 6Ut la̱at, ralal cui̱nk, matxucuac chiruheb chi moco tatxucuak xban li cꞌaꞌru teꞌxye a̱cue. Kꞌaxal ra ta̱nak cuiꞌ li cꞌaꞌru teꞌxye a̱cue. Chanchan li qꞌuix ut chanchan nak cuancat saꞌ xya̱nkeb laj xo̱cꞌ nak cua̱nkat saꞌ xya̱nkeb. Abanan matxucuac xban li cꞌaꞌru teꞌxye a̱cue chi moco tatxucuak chiruheb xban nak li tenamit aꞌan kꞌaxal kꞌetkꞌeteb. 7Ta̱ye li cua̱tin reheb, usta teꞌrabi usta incꞌaꞌ, xban nak li tenamit aꞌan aj kꞌetoleb a̱tin. 8Abanan la̱at, at ralal cui̱nk, abi li cꞌaꞌru yo̱quin chixyebal a̱cue. Ma̱kꞌetkꞌeti a̱cuib joꞌ yo̱queb li tenamit aꞌan. Te la̱ cue ut tzaca li cꞌaꞌru tinqꞌue a̱cue, chan. 9Ut quicuil jun li ukꞌej yo̱ chixqꞌuebal cue jun li botbil hu. 10Quixte li hu chicuu ut tzꞌi̱banbil ru li hu xcaꞌ pacꞌalil. Saꞌ li hu aꞌan tzꞌi̱banbil retalil chixjunil li ya̱bac ut li raylal li ta̱cha̱lk saꞌ xbe̱neb laj Israel.
Currently Selected:
Ezequiel 2: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
