Filipu 1
1
1 #
Vil 16:12
Mukanda wakutunda kuli yange Paulu na Timateo, vangamba va Yesu Kilistu.
Kuli voshe vanu va Njambi mu Filipu vaje vali muli Kilistu Yesu, amo na vantwama va cikungulukilo na vakwasi.
2Njambi Tatetu na Mwene Yesu Kilistu vamyane kutetela na kwoloka.
Lilombelo lya Paulu
3Njikakandelela kuli Njambi yange omwo ali yeni simbu yoshe njikamiyongola, 4co simbu yoshe njikamilombelela yeni voshe, njikalombela nakujolela, 5omwo a ngila ije munanjikwasa mu vipangi vya muzimbu wauvwa, tunde a litangwa lyakulivanga nakweta ku lelo. 6Ngecivene, njazivuka ngwange Njambi, uje washangumukile cipangi eci cacivwa muli yeni, akatwalao noo nacimanesa a Litangwa lya Yesu Kilistu. 7Simbu yoshe yeni kumwatundile mu mbunge yange! Ngecivene, cinapu cacivwa kuli yange kukala na mbunge yangacije ali yeni voshe. Omwo yeni voshe mu vaka-kupanga amo nange mu vipangi vyananjana Njambi, nambe ololo omo njili mu kamenga nambe lalo omo njapwile wakupatuka mukwamena muzimbu wauvwa nakuukolesa mbe. 8Omwo Njambi napu mukaleo wange nazivuka ngwendi njendeka vushunga omo njendeka ngwange vizango vyange vyakulova ali yeni vilinakutunda ku mbunge ya Yesu Kilistu ikeye vavenya.
9Njilombela ngwange cizemo ceni citwaleo mukukola manene, amo na mana a vushunga amo nakwangula kwa vushunga, 10ngeci mwase kwangula vyavivwa. Asinoni mukapwe vaka-kupatuka ku mazilo oshe nakujeneka mulonga Litangwa lya Kilistu. 11Kuyoya kweni kupwe kwakushula na vushunga vwavuvwa vyuma vije Yesu Kilistu lika asa kusholola, ku vumpau nakushangazala kwa Njambi.
Kuyoya kwange kwapwa Kilistu
12Njishaka muzivuke, vakwetu, ngwange vyuma evi vinalingiwa kuli yange vinakwasa kutwala muzimbu wauvwa kulutwe. 13#Vil 28:30 A cuma eci, vaka-kunyunga lipela voshe na voshe veka lalo kuno vazivuka ngwavo yange njili mu kamenga omwo njapwa nji ngamba ya Kilistu. 14Co kukala kwange mu kamenga cinakwasa manene vaka-kukulaela kukulaela manene muli Mwene, ngeci vapwe vaka-kusimpa simbu yoshe mukwambulula lijwi#1:14 LIJWI: Kunungulula kumo ngwavo, lijwi lya Njambi. kujeneka lyova.
15Mwa vushunga vene kuli vamo vambulula Kilistu omwo vali na lifuwa na vimata, oloni veka vambulula na cizango cacivwa. 16Ava vamucivali vacilinga omwo cizemo, omwo vanazivuka ngwavo Njambi nanjana vipangi vyakwamena muzimbu wauvwa. 17Ava vakulivanga kuvasa kwambulula Kilistu mwa vushunga, oloni cakutunda kuli munzinzime wa kulyalesa, valinakuyongola ngeci vawezeleleko manene ku tuyando twange omo njili mu kamenga.
18Kukwesi mulonga! Njilinakujolela a vyuma evi, nameme ngoco Kilistu valinakumwambulula mweka na mweka, nambe na cizango cacivi nambe na cizango cacivwa. Co njilinakutwalao kujolela, 19omwo njinazivuka ngwange a malombelo eni naakukwasa kuje kutunda ku Munzinzime wa Yesu Kilistu vakanjipatula. 20Cizango cange cakama na cinyangavili cange ngeci kunjikajuka mu vipangi vyange, oloni ku visimbu vyoshe, vunene vene a simbu ino, njikashula nakusimpa kwoshe, ngeci muvutunu vwange vwoshe njikane kasingimiko kuli Kilistu, nambe njitsa nambe njiyoya. 21Omwo mwonyo unapu vikajo? Kuli yange unapu Kilistu! Ngecivene, kutsa cikapwa nganyo kuli yange. 22Oloni nga mukuyoya njasa kuwezelelako ku vipangi vyavivwa, co kunjasa kuzivuka cuma muka njinapande kwangula. 23Vananjikokela mu mitambela yoshe eyi ivali. Njishaka manene kuseza mwonyo ou njikakale amo na Kilistu, eci cikeco cinahyana manene, 24oloni cakama manene omo yeni, nga kunjaciyoya tai. 25Njazivuka mwamuvwa cuma eci, ngecivene, njazivuka ngwange njikakala neni. Njikakala amolika neni voshe, mukuwezelelako akuya kweni kulutwe namukujolela mukukulaela, 26ngeci omo njili neni lalo, mukakala naa mukasa kulyaleselao ali yange mu mwonyo weni muli Kilistu Yesu.
27Ngecivene, cuma cakama manene eci, myonyo yeni iyoye ngwe muushaka muzimbu wauvwa wa Kilistu, ngeci nambe njasa kwija nakumimona nambe embwe, njakuziva ngeci munemana mbe a vutumbe vuno, co na cizango cimolika mulinakulwa amolika akukulaela a muzimbu wauvwa. 28Kesi mukale na lyova lya vitozi veni, oloni simpeni simbu yoshe, eci cikavasholwela vukaleo ngeci vakevo kuvakahyana oloni yeni mukahyana, omwo Njambi ikeye akamihyanesa. 29Omwo vanamyana vwana vwakupangela Kilistu, kesi lika akumukulaela, oloni nakumuyandela lalo. 30#Vil 16:19-40 Ololo mwasa kuwana mutambela wakulwa amo nange. Inapu nzita imolika ngeci ije mwamwene njilinakulwa ku simbu ya kunima, co ngwe mumwazivi, anga vene njilinakulwa ololo.
Currently Selected:
Filipu 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006