Yombi 1
1
Satana eseka Yombi
1Kwakele munalume umo lizina lyendi Yombi, uje wakele mu lifuti lya Uze. Wapwile muka-vushunga na kulongwa, nakukomoka Njambi, nakulitenga ku vuvi. 2Ikeye wakele na vana va vanalume vatanu na vavali na vana va vanakazi vatatu, 3co wakele na vimanga vakupwa 7,000, na tumelo vakupwa 3,000, na vingombe vakupwa 1,000 vakulimisa, na vimulu vakupwa 5,000. Wakele lalo na vangamba vavangi manene, co munalume ou wapwile wakufuka manene kutuvakana vanu voshe vaje vakele mu ngangela.
4Co vana va Yombi va vanalume umo na umo wakele nakulinga ciwano, co walanyeleko vakwavo voshe kwijako, co simbu yoshe vakele nakulanya vandokazi vavo vatatu kukala amo navo. 5Ku mutondo omo ciwano cinahu, Yombi wakele nakwinduka mutondo-tondo nakukombelela vin̄ombelo vya kwenyeka kupwisa ku umo na umo wa vana vendi mukuvajelesa. Ikeye wakele nakulinga eci simbu yoshe omwo wayongwele ngeci amo umo wa vana vendi nalingi vuvi nakushaula Njambi kwakujeneka kucizivuka.
6 #
Kus 6:2
Co capwile ngeci a litangwa lije omo vana va Njambi#1:6 VANA VA NJAMBI: Tungelo vaje vakapangela Njambi mwilu. vezile nakulisholola ku mesho a Shukulu Kalunga, co na Satana lalo wakele akati kavo. 7Shukulu Kalunga wehwile Satana ngwendi, “Unakala kuli?”
Co Satana wamukumbulwile ngwendi, “Njinakala nakwendangana oku noku, kwendangana-endangana ano a kaye oshe.”
8Shukulu Kalunga wehwile Satana ngwendi, “Unamono ngamba yange Yombi ndi? Kukwesi umo ano a kaye muka-vushunga na kulongwa, nakukomoka Njambi nakulitenga ku vuvi ngwe Yombi.”
9 #
Kuj 12:10
Co Satana wakumbulwile ngwendi, “Kuma Yombi anga akakulemesa nga navimo vyai awanao? 10Omwo yove ukamunyungu simbu yoshe na naanga yendi na vyuma vyoshe alinavyo. Co ukavezikisa vyuma vyoshe vyalinga, co yove unamwana vingombe vavangi manene vaje vanashulisa lifuti lyoshe. 11Oloni nga utundisa vyuma vyoshe evi vyalinavyo, co akakushaula citona-mesho!” 12Shukulu Kalunga wendekele kuli Satana ngwendi, “Mwamuvwa. Vyuma vyoshe vyalinavyo vili mu mavoko ove, oloni kuwapandele kumuvulumuna.” Ngecivene, Satana watundile ku mesho a Shukulu Kalunga.
Kunyonga kwa vufuko na vana va Yombi
13Co litangwa limo omo vana va Yombi valingile ciwano ku njuvo ya mukulunu wavo, 14kanganda wezile kuli Yombi ngwendi, “Tunakala nakulima na vingombe mu mahya, na vimulu vanakala nakulila kumukulo wa cana. 15Co ngecomu vaSavene#1:15 VASEVENE: Muyati umo wa vanu vaka-kwendangana nakupukula vyuma vakutunda mu mbwela. vatulwisile nakwiva vimuna voshe. Co vangamba vove voshe vanavatsii kuvanga ange lika njinaputumukao ngeci njinaija nakukuleka.”
16Omo kanda acimanese kwendeka, co kanganda mukwavo wezile nakuleka Yombi ngwendi, “Muhyato unatsii vimanga amo na tunyungi, kuvanga ange lika njinaputumukao ngeci njinaija nakukuleka.”
17Omo kanda acimanese kwendeka, co kanganda mukwavo wezile nakumuleka ngwendi, “Vimbunga vitatu vya vaKalendeya#1:17 VAKALENDEYA: Muyati umo wa vanu vaka-kwendangana nakupukula vyuma vakutunda ku kunto. vanezile nakutulwisa, vanambata tumelo nakuya navo, co vanatsii vangamba vove voshe, kuvanga ange lika njinaputumukao ngeci njinaija nakukuleka.”
18Omo kanda acimanese kwendeka, kanganda mukwavo wezile nakumuleka ngwendi, “Vana vove vanakele nakulinga ciwano ku njuvo ya mukulunu wavo, 19co kenga, lihunzi lyakama lyatundile mu mambo lyalundumwine njuvo muje muvakele nakuvatsiya voshe, kuvanga ange lika njinaputumukao ngeci njinaija nakukuleka.”
20Yombi wakatukile watavwile vuzalo vwendi mukuviilila. Co watewile ku mutwe wendi, walyumbilile asi nakulemesa Shukulu Kalunga. 21Wendekele ngwendi,
“Njasemukile mutotototo mwimo lya vanana,
njikeluka lalo mutotototo.
Shukulu Kalunga wanjanene,
co ikeye lalo natambula.
Vashangazale lizina lyendi!”
22Mu vyuma vyoshe evi vyalingiwile, Yombi kalingile vuvi nambe kushaula Njambi.
Currently Selected:
Yombi 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006