Yombi Cizivukiso
Cizivukiso
Yombi wapwile munu wakufuka manene, nameme kakundamena kuli vanu va Isalele, walemesele Shukulu Kalunga, co mwa vushunga wapwile munu wamuvwa. Oloni Satana wendekele kuli Njambi nakuvangela Yombi ngwendi Yombi alinakupangela Njambi omwo Njambi alinakumuvezikisa. Njambi watavesele Satana ngeci ambate vufuko vwa Yombi na vana vendi, co mamaneselelo mwonyo wendi kumona nga Yombi anga akulaela kuli Njambi. Oloni Yombi anga wakulaelele.
Asinoni vasamba vatatu va Yombi vezile nakumuzembeleka. Vakulaelele ngeci ciindu nakukakala mwamuvwa vyapwile vimweso vya vivezikiso vya Njambi. Omwo Yombi kendukile mwamuvwa, co vaje vasamba vendi vatatu vayongwele ngeci Njambi alinakuhisa Yombi omwo vuvi. Yombi wavakumbulwile ngwendi ikeye kakele na mulonga, co eci capwile ngeci vakevo vakele na mulonga. Yombi na vasamba vendi vakele nakulikanangana, na vamo vai vamwene ngeci vanahi, nameme ku mamaneselelo, vasamba va Yombi valikelele kukandula vimata.
Yombi wakele nakuyanda manene, co visimbu vimo omwo a vimata evi wasanene Njambi ngeci aije amulumbunwine omwo vika wakele nakuyanda. Omo vasamba vendi volokele kuluu, Yombi wayongwele ngeci munu kasa kuwana mana akukumbulula vihula vyakama vyakuyoya. Kuvanga Njambi lika ikeye ali na mana aje. Yombi wamanesele majwi nakulisinga ngwendi kakele na mulonga wa vuvi.
A simbu eyi, kwemanene mukwenje lizina lyendi Elihu wakele nakwendeka, welukilile vimo vije vivendekele laja, oloni ikeye wapopolwele mitambela yoshe noku-noku muje valikandwile vimata. Elihu wamanesele na majwi amehi akushangazala kunyunga kwa Njambi a vije vilinakusholoka.
Mamaneselelo Njambi walisholwele kuli Yombi, oloni kalumbunwine tuyando twa Yombi. Oloni Njambi wamwesekele ngeci vyuma vyavingi vije vyakalingi vanu kuvasa kuvizivisisa, vanu kuvasa kulinga vije vyakalingi Njambi. Njambi wapopolwele Yombi akwendeka vyuma vyavingi oku wazivukile vyavindondo, oloni Njambi wendekele lalo ngwendi Yombi wapwile ngamba yendi wa kulongwa. Ngecivene, mamaneselelo, livulu eli lyendeka muje Njambi mwavezikisilile Yombi nakumwana vufuko muvali-muvali kutuvakana laja.
Yombi kazivisisile omwo vika wayandele, waviililile manene, oloni kavyanene Njambi nambe kutunda kuli ikeye. Yombi wakulaelele ngeci litangwa limo, Njambi akamwamena (19:25-27).
Kulumbununa vyuma vili mu livulu
Vushangumukilo 1:1–2:13
Yombi na vasamba vendi 3:1–31:50
a. Kulinyenga kwa Yombi 3:1-26
b. Visimutwiya vyakulivanga 4:1–14:22
c. Visimutwiya vyamucivali 15:1–21:34
d. Visimutwiya vyamucitatu 22:1–27:23
e. Kushangazala mana 28:1-28
f. Majwi a Yombi a mamaneselelo 29:1–31:40
Visimutwiya vya Elihu 32:1–37:24
Shukulu Kalunga akumbulula Yombi 38:1–42:6
Mamaneselelo 42:7-17
Currently Selected:
Yombi Cizivukiso: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006