Kwituluka mu Mashiko 1
1
Cizivukiso
1Awa akewo majwi aje endekele Mosesa kuli vanu va Isalele omo vakele mu mambo mu ngangela ya Ndonga ya Yondau. Vakele mu vyana vya Yondau kuyehi na Sufe, akati ka nganda ya Palane na Tofele, na Lambani, na Hazelote, na Ndizahambe. 2Vungenzi vwakutunda ku Munkinda wa Sinai nakweta ku Kandeshe Mbaleneya a ngila yakwita ku lifuti lya malundu lya Endome vwapwile vungenzi vwa matangwa likumi na limo. 3A litangwa lyakulivanga ku ngonde yamulikumi na imo mu mwaka wamumakumi awana omo vanu va Isalele vanatundu laja mu Ingito, Mosesa wavalekele vyoshe vije vyamushikile Shukulu Kalunga kuvalekavyo. 4#Kul 21:21-35 Eci calingiwile omo Shukulu Kalunga nafungulula laja Mwene Sihone wa vaAmoli, uje washwanene mu nganda ya Heshevone, na Mwene Onge wa Mbashane, uje washwanene mu vinganda vya Ashetalote, na Endele. 5Omo vakele mu ngangela ya Yondau mu lifuti lya Mowavi, Mosesa washangumukile kunungulwila vanu va Isalele mashiko na vilongesa vya Njambi ngwendi,
6“Omo twakele ku Munkinda wa Sinai, Shukulu Kalunga Njambi yetu wendekele kuli yetu ngwendi, ‘Muneshwala simbu yakama manene ku munkinda uno. 7Katukeni muye kulutwe, ku lifuti lya malundu lya vaAmoli, na ku lifuti lyoshe lije lyazengelekako, na ku Cana ca Yondau, na ku lifuti lya malundu, na ku cikulo, na mu mbwela, na ku ngenge ya Lishali lya Menditelenyani. Yeni mu lifuti lya Kanana, na musambwa ya Minkinda ya Lembanone, kweta na ku Ndonga yakama ya Yufuleti. 8Kengeni, njamyana lifuti lyoshe eli lije yange Kalunga njalikulaesele kulyana kuli vakukulwila veni, va Avilahama, na Isake, na Yakomba, na ku vatekulwila vavo. Co yeni mukalishwane.’ ”
Mosesa aangula maako
(Kut 18:13-27)
9Mosesa wendekele kuli vanu va Isalele ngwendi, “A simbu ije twakele ku Munkinda wa Sinai, njamilekele ngwange, ‘Cipangi cakumitwamenena cinapu cakama manene kuli yange. Kunjasa kucilinga ange lika embwe. 10Shukulu Kalunga Njambi yeni namitumisa manene. Co kengeni, ololo munapu muvavangi ngwe vingongonosi vya kwilu. 11Shukulu Kalunga Njambi ya vakukulwila veni namitumisa manene visimbu vyakutuvakana 1,000 ngwe mwamikulaesele! 12Oloni yange ange lika, co njasa vatijo kwambata citele cakulema ngacije cakusompa milonga yeni? 13Ngecivene, anguleni vanalume vamo vakunyanyama, vaka-mana na lutsimo lwaluvwa ku muyati umo na umo, vapwe vantwama veni, co njikavana moko yakumisompa.’ 14Co neni lalo mwatavele ngweni eci cinapu cuma cacivwa kucilinga. 15Ngecivene, njaangwile vanalume vaka-mana na lutsimo lwaluvwa, vaje vatundile ku miyati yeni, co njavapwisile vantwama veni. Vamo vashikile vanu 1,000, vakwavo vashikile vanu 100, vakwavo vashikile vanu makumi atanu, co vamo vashikile vanu likumi lika, co lalo njangwile vamyata vakwavo va mu miyati yeni.
16“A simbu ije vene njalekele vantwama veni ngwange, munapande kusompa mwamuvwa vin̄anda vyoshe vije vivanena vanu kuli yeni, n̄anda ya vaIsalele nambe n̄anda ya vaka-kwija vaje valinakukala akati keni. 17Akusompa kweni, kesi mukakale na kahangu oloni munapande kusompa munu na munu mu cifwa cimolika, apwe iya nambe iya. Co kesi mukakale na lyova ali munu umo embwe, omwo kusompa kwakundama kuli Njambi. Nga mulonga umo unapu waukalu, co uneneni kuli yange, ngeci njikausompe. 18A simbu ije vene njamilekele vyuma vyoshe vije vimwapandele kulinga.
Kutuma vaka-kunenga kutunda ku Kandeshe Mbaleneya
(Kul 13:1-33)
19“Twalingile vije vyatushikile Shukulu Kalunga Njambi yetu. Twatundile ku Munkinda wa Sinai, twetile mukati ka mambo yakama yakutewesa mu ngila yakwita mu lifuti lya malundu lya vaAmoli, co twetele ku Kandeshe Mbaleneya. 20Asinoni njamilekele ngwange, ‘Ololo munete mu lifuti lya malundu lya vaAmoli, likelyo lifuti lyanatwana Shukulu Kalunga Njambi ya vakukulwila vetu. 21Co kengeni, Kalunga Njambi yeni namyana lifuti eli ngeci mukakovelemo nakulishwana omwo linapu lyeni ngwe muje mwamishikile Shukulu Kalunga Njambi ya vakukulwila veni. Co kesi mukazive lyova nambe kujujuka.’
22“Oloni yeni voshe mwezile kuli yange nakwendeka ngweni, ‘Akulivanga tutumeniko vanu kulutwe lwetu vakanenge lifuti lije, ngeci vakutuleke ngila mukajo twapande kuya nayo, co na vinganda vyamwo vyafwa vatijo.’
23“Viyongola evi vyapwile viyongola vyavivwa kuli yange, ngecivene, njaangwile vanalume likumi na vavali umo ku muyati umo na umo. 24Asinoni vaile ku lifuti lya malundu nakweta ku Cana ca Eshekole, co velwile lifuti. 25Ngecivene, vezile na vushuka vumo vuje vakawanene muje mu lifuti, co vatunenelelevwo nakutuleka ngwavo, ‘Lifuti lije lyalinakutwana Shukulu Kalunga Njambi yetu linapu lyalivwa manene.’
26 #
Kwi 9:23; VaHe 3:16 “Nameme ngoco yeni mwavyanene kuyamo oloni mwatengulukilile kushika kwa Shukulu Kalunga Njambi yeni, co kumukasa kukovela mu lifuti lije embwe. 27Co mwalinyenyetelele mu vimbalaka vyeni mwendekele ngweni, ‘Shukulu Kalunga watuzinda, ikeye watutundisile mu Ingito nakutukundika mu mavoko a vaAmoli, ngeci vatunyongese. 28Tuyila kulijo? Tuli na lyova omwo vandolome vetu vaje twatumine kuje vanatuzivalesa ku vimbunge nakutuleka ngwavo vaje vanu vali kuje vali na nzili manene na vulaja kutuvakana yetu, co vakevo lalo vakala mu vinganda vya vivumbe vyakweta ndo na kwilu. Co kuje lalo vakamweneko makisi-kisi!’
29“Oloni yange njamilekele ngwange, ‘Kesi mujujuke nambe kuvazivila lyova embwe. 30Shukulu Kalunga Njambi yeni uje atwama kulutwe lweni, ikeye akamilwilako, ngwe muje mwalingile mu Ingito, 31#Vil 13:18 na mu mambo lalo. Co munamono muje Shukulu Kalunga Njambi yeni wamyendesele mu vungenzi vweni vwoshe kweta na ku mutambela uno, ngwe muje munu mwakalele munendi.’ 32#VaHe 3:19 Nameme njamilekele vyuma evi, oloni yeni kumwakulaelele Shukulu Kalunga Njambi yeni, 33uje simbu yoshe watwamene kulutwe lweni nakumiwanena mutambela wakutungila cilombo cendi, nakumisholwela ngila. Co ikeye watwamene kulutwe lweni mu manda ya tuhya ku vutsiki, na mu manda ya lishelwa ku mutanya.
Shukulu Kalunga ahisa Isalele
(Kul 14:20-45)
34“Omo Shukulu Kalunga wazivile kulinyenyeta kweni, co waluvalele, nakulisinga ngwendi, 35#VaHe 3:18 ‘Mwa vushunga naumo wai wa ali vanu ava va cisemwa eci ca vuvi akakovela mu lifuti lije lyalivwa lije linjakulaesele kulyana kuli vakukulwila vavo. 36Kuvanga Kalembi muna Njefune, ikeye akakovelamo. Ikeye lika wa kulongwa kuli yange, co njikamwana ikeye na vatekulwila vendi lifuti lije lyakanengele.’ 37Shukulu Kalunga waluvalele nange lalo omwo yeni, co wendekele ngwendi, ‘Nambe yove Mosesa kuukakovela mu lifuti lije embwe, 38kuvanga lika mukwasi wove Yoshwa muna Nune, ikeye akakovelamo. Co mukolese ngeci akatwamenene vanu va Isalele kushwana lifuti lije.’
39“Co Shukulu Kalunga wendekele kuli yetu voshe ngwendi, ‘Vana veni vavandondo vaje mwendekele ngweni vakavafungulula ku vitozi veni vaje kanda vacikale na mana akwangula vyavivwa nevi vyavivi, vakevo vakakovela mu lifuti lije. Co njikavana lifuti lije ngeci vakatungemo. 40Oloni yeni, tengulukeni muye mu mambo mu ngila yakuya ku Linema lya Akava.’
41“Co mwanjikumbulwile ngweni, ‘Tunalingi vuvi mwane kuli Shukulu Kalunga. Ololo tuya nakulwa na vanu ava, ngwe muje mwatushikile Shukulu Kalunga Njambi yetu.’ Asinoni munu na munu walipakatele vitwa vyendi vya nzita, co mwayongwele ngweni cikapwa cacasi kufungulula lifuti eli lya malundu.
42“Oloni Shukulu Kalunga wendekele kuli yange ngwendi, ‘Vanangule ngwove kesi vaye nakulwa embwe, omwo yange kunjikakala navo, co vitozi vavo vakavafungulula.’ 43Ngecivene, njamilekele ngwange evi vikevyo vyanendeka Shukulu Kalunga, oloni kumwanjitolililile embwe. Mwatengulukilile kushika kwa Shukulu Kalunga, co mu kulyalesa kweni mwaile nakulwa na vaka-lifuti lya malundu. 44Co vaAmoli vaje vakele mu lifuti lya malundu vamishekele nakumilwisa ngwe njame ya vimuka. Co vakevo vamishekele nakumyetesa ku Holema nakumifungulwila muje mu lifuti lya malundu lya Endome. 45Ngecivene, mwelukile nakulilila kuli Shukulu Kalunga ngeci amikwase, oloni kamitolililile embwe. 46Ngecivene, mwakele matangwa amangi ku Kandeshe.
Currently Selected:
Kwituluka mu Mashiko 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006