Kwituluka mu Mashiko 2
2
Myaka ije vanu va Isalele vakele mu mambo
1 #
Kul 21:4
“Asinoni akukotoka twaile mu mambo, mu ngila yakuya ku Linema lya Akava, ngwe muje mwatushikile Shukulu Kalunga. Co twakele matangwa amangi nakwendangana mu lifuti lya malundu lya Endome.
2“Co Shukulu Kalunga wanjilekele ngwendi, 3‘Munakala matangwa amangi nakwendangana mu lifuti lino lya malundu. Ngeci ololo tengulukeni muye ku kunto. 4#Kus 36:8 Leka vanu ava ngwove mukaita mu lifuti lya malundu lya Endome, mutambela wa vavushoko vweni, vatekulwila va Isau. Vakamizivila lyova, oloni yeni mukanyanyame. 5Kesi mukavalwise embwe, omwo kunjikamyana lifuti lyavo nameme mutambela umo waundondo-ndondo, omwo njanene laja lifuti lya Endome kuli vatekulwila va Isau. 6Mukalanda vyakulya na vimbongo kuli vakevo ngeci mukalye. Co lalo mukalanda mema na vimbongo ngeci mukanwe.’
7“Anukeni muje mwamivezikisile Shukulu Kalunga Njambi yeni mu vyuma vyoshe vije vimwapangele na mavoko eni. Ikeye vavenya waminyungile omo mwakele nakwendangana mukati ka mambo ije yakama yakukomokesa. Shukulu Kalunga Njambi yeni wakele amo neni a myaka eyi makumi awana, co kumwajenekele cuma na cimo cai.
8“Ngecivene, twatuvakanene vatekulwila va Isau vaje vakala mu lifuti lya Endome, co twasezele ngila ije yatundile ku vinganda vya ku Elata, na ku Eziongembele. Co twaile ku ngila yakuya ku Lishali lya Mwongwa, co twatengulukile lalo ku kunto ya ngangela nakuya ku ngila yakuya ku mambo ya Mowavi. 9#Kus 19:37 Co Shukulu Kalunga wendekele nange ngwendi, ‘Kesi mukayandese vaMowavi embwe nambe kuvalwisa. Kunjikamyana lifuti lyavo kupwa vushwana vweni embwe, nambe mutambela umo, omwo njanene laja nganda ya Ale kuli vatekulwila va Lote kupwa vushwana vwavo.’ ”
10(Laja mu nganda ya Ale mwakele makisi-kisi vaje vavatumbwile ngwavo vaEmime, vakevo vapwile vanu vavalaja manene na nzili ngwe vaAnakime, muyati ukwavo wa makisi-kisi. 11Vakevo lalo vavatumbwile lizina limo na vaAnakime ngwavo vaLefaime, oloni vaMowavi vavatumbwile ngwavo vaEmime. 12VaHoli navo vakele mu Endome, oloni vatekulwila va Isau vavashekele mu lifuti lije, co vanyongesele muyati wavo woshe njwa, co vengilemo vakevo muje vene, ngwe muje muvalingile vaIsalele mu lifuti lije lyavanene Shukulu Kalunga kupwa vushwana vwavo.)
13“Co Shukulu Kalunga wendekele ngeci tukatuke tujavuke Ndonga Zelende, co twajavukile ndonga ije. 14#Kul 14:28-35 Ngecivene, kutunda a simbu ije twatundile ku Kandeshe Mbaleneya kweta a simbu ije twajavukile Ndonga ya Zelende yapwile myaka makumi atatu na itanu na itatu, noo cisemwa coshe ca vanalume vaje vaka-kulwa nzita vanyongele ngwe muje mwalisingile Shukulu Kalunga kuli vakevo. 15Co Shukulu Kalunga wavanyongesele njwa voshe vaje vaka-kulwa nzita.
16“Co casholokele ngeci, omo vanalume voshe vaka-kulwa nzita vaje vakele akati ka vakwavo vatsile, 17Shukulu Kalunga wendekele nange ngwendi, 18‘Ku litangwa lya lelo mulinakwita ku nginga ya lifuti lya Mowavi ku ngila yakwita ku Ale. 19#Kus 19:38 Co omo mukashwenya kuyehi na lifuti lya vaAmoli, kesi mukayandese vatekulwila va Lote nambe kushangumuka kulwa navo nzita embwe, omwo kunjikamyana lifuti lyavo kupwa vushwana vweni, omwo njalyanene laja vatekulwila va Lote kupwa vushwana vwavo.’ ” 20(Lifuti eli lyapwile lya vaLefaime, vaje vakele muje laja. Co vaAmoli vavatumbwile ngwavo vaZamezumime. 21Vakevo vapwile vavalaja na vukama, co lalo vapwile vavangi ngwe vaAnakime muyati wa makisi-kisi. Oloni Shukulu Kalunga wavanyongesele ku mesho a vaAmoni, ngecivene, vaAmoni vatambwile lifuti lyavo, co vatungilemo. 22Shukulu Kalunga walingile cuma cimo kuli vaEndome, vatekulwila va Isau, vaje vakala mu lifuti lya malundu lya Endome. Co Shukulu Kalunga wanyongesele lalo vaHoli ku mesho avo, ngecivene, lifuti lyavo valitambwile vaEndome, co vatungilemo, mukemwo muvali nakukala na ololo. 23Lifuti lya ku ngenge ya Menditelenyani vatungilemo vanu vaje vatundile ku lin̄anda lya Kelete. Co vakevo vanyongesele vaAvime, vavenya lifuti, co vatambwile lifuti lyavo lyoshe kutunda ku mbwela nakweta na ku nganda ya Ngaza.)
24“Co Shukulu Kalunga wendekele kuli yetu ngwendi, ‘Ololo katukeni mujavuke Ndonga ya Alenone. Kengeni, Mwene Sihone wa vaAmoli wa ku Heshevone, njinamwaka mu mavoko eni amo na lifuti lyendi. Mulwiseni, ngeci mukatambule lifuti lyendi. 25Co kutunda ku litangwa lya lelo vene njikazivisa vanu lyova lyakumitewa. Co munu woshe akaziva ali yeni akajaja na lyova.’
VaIsalele vafungulula Mwene Sihone
(Kul 21:21-30)
26“Njatumine miluwa kutunda ku mambo ya Kendemote kuli Mwene Sihone wa ku Heshevone na majwi a kwoloka ngwange, 27‘Tutave twite mu lifuti lyove. Tukaita lika mu tapalo, kutukai noku-noku embwe. 28Co tukalanda vyakulya vitukalya na mema atukanwa. Cumalika citushakako kwita mu lifuti lyove, 29noo tunajavuka Ndonga ya Yondau nakweta mu lifuti lije lyatwana Shukulu Kalunga Njambi yetu. Tutaveni lika twite mu lifuti lyeni ngwe muje muvalingile vatekulwila va Isau, vaje vakala mu Endome, na vaMowavi, vaje vakala mu Ale.’
30“Oloni Mwene Sihone wa ku Heshevone katutavesele kwita mu lifuti lyendi embwe, omwo Shukulu Kalunga Njambi yeni wakaluwisile mbunge yendi, ngeci amukundike mu mavoko eni ngwe mucinapu lelo.
31“Co Shukulu Kalunga wendekele kuli yange ngwendi, ‘Kenga njikana Mwene Sihone amo na lifuti lyendi mu mavoko eni. Tambuleni lifuti lyendi ngeci lipwe lyeni.’ 32Sihone wezile na vanu vendi voshe mukulwa netu kuyehi na nganda ya Njahaze, 33oloni Shukulu Kalunga Njambi yetu wamukundikile mu mavoko etu, ngeci twamutsiile, na vana vendi voshe, na vanu vendi voshe. 34Co a simbu ije vene twafungulwile nakunyongesa vinganda vyendi vyoshe, co twatsiile vanu voshe, vanalume, na vanakazi, na vanike, naumo wai wasaleleo. 35Oloni twambatele vimuna nakupukula vije vyakele mu vinganda vyavo. 36Shukulu Kalunga Njambi yetu wakundikile vinganda vyoshe mu mavoko etu kutunda ku Aloele kumukulo wa Cana ca Alenone, na nganda ya mukati ka cana cije, nakweta na ku Ngilyande kwoshe. Co kukwakele nganda imo yakele na civumbe cakukola cakutwonwesa. 37Oloni kutwaile kuyehi na lifuti lya vaAmoni embwe, nambe ku ngenge ya Ndonga ya Njavoke nambe ku vinganda vya ku lifuti lya malundu, nambe ku mitambela yeka, kuje Shukulu Kalunga Njambi yetu watushikile ngwendi kesi tukayeko.
Currently Selected:
Kwituluka mu Mashiko 2: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
