Zefaniya 2
2
Muka-kwimanena asana vanu ngeci vatenguluke
1Yeni muyati wa vanu vakujeneka shwamwa, yongoleni a vuvi vweni, co tengulukeni 2simbu kanda vacimitwale kulyala ngwe lijungu lipekumuka na lihunzi, simbu kanda litangwa liije omo Shukulu Kalunga akasholola vukalu vwendi nakuminyanyamesa ngwe tuhya mutukenyeka vyuma. 3Ilukeni kuli Shukulu Kalunga yeni voshe vaka-kulilumbilisa va mu lifuti, vaje valinakwononoka mashiko endi. Lingeni vije vya vushunga, co lilumbiliseni ku mesho a Shukulu Kalunga. Amo mukaputumuka ku cihiso a litangwa lije omo Shukulu Kalunga akasholola vukalu vwendi.
Kunyonga kwa miyati ya vanu vaje valyatele na Isalele
4 #
Isa 14:29-31; Njele 47:1-7; Ezek 25:15-17; Njwe 3:4-8; Amo 1:6-8; Zak 9:5-7 Naumo wai akasala mu nganda ya Ngaza. Ashekelone ikapwa ngundu. Co vanu va mu Ashendonde vakavasheka a simbu ya mutanya, na vanu va mu Ekelone vakavandandumuna nakuvatundisa mu nganda yavo. 5Yeni vaFilisitiya munanyongo, yeni vanu mwakala ku ngenge ya mema a kalunga. Shukulu Kalunga namisompo laja. Akaminyongesa, co naumo wai akasalao ali yeni. 6Co lifuti lyeni lya ku ngenge ya mema a kalunga likemuka mutambela wakulila vimanga. 7Vanu va mu Yunda vaje vasalao vakatambula lifuti lyeni. Vakalisila matanga avo a vimanga kuje, co vakakala mu vinjuvo vya vaka-Ashekelone. Co Shukulu Kalunga Njambi yavo akakala amo navo, co akavavezikisa lalo.
8 #
Isa 15:1—16:14; 25:10-12; Njele 48:1—49:6; Ezek 21:28-32; 25:1-11; Amo 1:13-15 Shukulu Kalunga Muka-nzili yoshe alinakwendeka ngwendi, “Njazivi vanu va Mowavi na Amoni vatuka nakutomba vanu vange, co vali na kulyalesa ngwavo vasa kutambula lifuti lyavo. 9#Kus 19:24 Mwa vushunga vene yange Kalunga Njambi wa Isalele uje wayoya, njilinakulisinga ngeci Mowavi na Amoni vakanyonga ngwe Sondoma na Ngomola. Mafuti avo akemuka mitambela ya vimbulu vya mwongwa muje kuvakasa kulima vimbuto, co mukamena shaku lika. Co vanu vange vaje vakasalao vakapukula nakwambata lifuti lya Mowavi na Amoni.”
10Omu mukemwo mumukanyanyamesa vanu va Mowavi na Amoni a kulyalesa kwavo nakulishasha kwavo akutuka vanu va Shukulu Kalunga Muka-nzili yoshe. 11Shukulu Kalunga akavajujwisa. Akatengulula vinjambi va ano asi nakuvapwisa vangoco, asinoni muyati na muyati wa vanu mu lifuti lyawo vakalemesa Shukulu Kalunga.
12 #
Isa 18:1-7
Co Shukulu Kalunga lalo akatsiya vaka-Sundane.
13 #
Isa 10:5-34; 14:24-27; Nah 1:1—3:19 Shukulu Kalunga akapangesa nzili yendi mukunyongesa Asilya. Co akanyongesa nganda ya Nenevayi nakuyipwisa ngundu, mambo yakujeka mema. 14Nganda ya Nenevayi ikapwa mutambela wakulila matanga a vimanga, na tusitu va miyati-yati vakavutamamo. Co vinkungulu vakakala mukati kavije vingundu na mitambi yakwoya kwavyo ikatuukila mu vinjanena. Co na makololo vakendekela a vipamba vya vikolo, vanu vakavujula mavaya a kendale a kulyala aje avatungisile vinjuvo vyendi. 15Evi vikevyo vivakalinga ku nganda ije ya vaka-kulyalesa a nzili yavo vavenya nakuyongola ngeci valimwamuvwa. Vanu vamwo vayongola ngwavo nganda yavo yapwa yakama manene muno mu kaye koshe, oloni ikemuka ngundu, mutambela uje vakakala tusitu! Co vanu voshe vaje vakaitilamo vakalipika ku mitwe yavo mukumwesa kayengu kavo na vunyengwe vwavo a nganda ije.
Currently Selected:
Zefaniya 2: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006