Zefaniya 3
3
Vuvi vwa Yelusalema nakupatuka
1Yelusalema inanyongo, nganda ya vanu vaka-kutengulukila, na vaka-vuvi, vantwama vayo vakayandesa vanu vavo. 2Kuyatolililile kuli Shukulu Kalunga nambe kutava kunangula kwendi. Kuyakulaelele kuli Shukulu Kalunga nambe kulomba vukwasi vwendi. 3Vamyata vayo valinakwaana ngwe vindumba, co maako vayo vanapu ngwe tungunga va njala na mutupu, vaje valya citsiya palanga noo ku mutondo. 4Vaka-kwimanena vapwa vaka-kulyalesa na vaka-muuka, co vaka-kukombelela vakajwalesa vije vinajele, co vatengulula lishiko lya Njambi ngeci vafuke mu ngila kesi ikeyo. 5Oloni Shukulu Kalunga anga acili mu nganda, co akalingi vije vya vushunga, co kesi kulinga vije vyavivi embwe. A mutondo na mutondo kesi kwonwa mukunena vushunga kuli vanu vendi. Oloni vaka- vushunga anga vacili nakulinga vuvi kuvesi na shwamwa.
6Shukulu Kalunga alinakwendeka ngwendi, “Njamanesele miyati yoshe ya vanu njwa, njanyongesa vinganda vyavo, nakuseza vivumbe vyavo na tuposhi twavo mitumbo. Co vinganda vinapu vingundu vyangoco, naumo wai alinakwenda mu vitapalo, vanu voshe vanai. 7Co njayongwele ngwange amo vanu vange vakasa kunjikomoka nakutava kunangula kwange, ngeci kesi vakevale vilongesa vije vinjavalongesele. Oloni vwasi-vwasi vonwele kulisingimika, co valingile vyuma vyavivi manene kutuvakana muje mwalaja.”
8Shukulu Kalunga alinakwendeka ngwendi, “Vandameneni litangwa lije omo njikakatuka mukusompa miyati ya vanu. Njinayongola kukungulula miyati ya vanu na vumwene amolika ngeci vamone nzili ya vukalu vwange. Co ano asi oshe akanyonga na tuhya twa vukalu vwange vwakama-kama.
9“Asinoni njikatengulula vimbunge vya vanu, co vakalombela lika kuli yange, kesi ku vinjambi veka lalo embwe. Co voshe vakanjononoka. 10Nameme vaje vakala kulyala ku Sundane, vanu vange vaje vashandokele, vakanena vin̄ombelo kuli yange. 11A simbu ije, yeni vanu vange kumukazivi lalo shwamwa a kwononoka mashiko ange embwe. Co njikatundisa vanu voshe vaje vaka-kulyalesa nakulishasha, co kumukanjitengulukila lalo a lilundu lyange lyakujela embwe. 12Mu Yelusalema njikasezamo lika vanu vaka-kulilumbilisa na vaka-kulikeesa, vaje vakaija kuli yange mukuvakwasa. 13#Kuj 14:5 Vanu va mu Isalele vaje vanasalao kuvakalingi lalo vuvi ku munu umo embwe, co kuvakendeka makuli, nambe kweseka kukwisa vakwavo. Co vakavezika nakukala mu kwoloka, co naumo wai akavazivisa lyova.”
Mwaso wakujolela
14Imbeni nakutambeka nakujolela
yeni vanu va mu Isalele!
Joleleni na vimbunge vyeni vyoshe
yeni vanu va mu Yelusalema!
15Shukulu Kalunga namanesa cihiso ceni,
natundisa vitozi veni voshe.
Shukulu Kalunga mwene wa Isalele ali amo neni,
kukwesi cuma ceka lalo cakumizivisa lyova cai.
16Simbu ikaija omo vakendeka
kuli vanu va mu Yelusalema ngwavo,
“Yeni vanu va mu Siyone kesi muzive lyova!
Kesi mutave mavoko eni azeye embwe!
17Shukulu Kalunga Njambi yeni ali amo neni,
nzili yendi ikamihyanesa.
Shukulu Kalunga akavwaelela neni,
co akamyana mwonyo wauha
omwo ikeye wamizema!
Akaimba nakujolela ali yeni,
18ngwe kujolela kwa vanu vali ku ciwano.”
Shukulu Kalunga alinakwendeka ngwendi,
“Kunjikatava ngeci muvulumuke lalo,
co lalo kunjikatava ngeci muzive shwamwa!
19Simbu ilinakwija!
Njikanyanyamesa vaka-kumiyandesa,
co njikapatula vilema voshe
nakwilwisa vinzinda voshe kwimbo,
co njikatengulula shwamwa yavo kupwa kasingimiko,
na vaka-kaye voshe vakavashangazala.
20Simbu ilinakwija!
Njikelwisila vanu veni kwimbo vaje valishandokele,
co njikamitsimanesa mu kaye mwoshe,
co mukakala mwamuvwa lalo ngwe laja.”
Mukemwo mwanendeka Shukulu Kalunga.
Currently Selected:
Zefaniya 3: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
