Kujombolola 8
8
Kasateso kamucitanu na tuvali
1Omo Muna Manga wavatwile kaje kasateso kamucitanu na tuvali, mwilu mwolokele kuluu litambelo limo lya ola. 2Asinoni njamwene tungelo vaje vatanu na vavali vaka-kwimana ku mesho a Njambi, co vavaanene malupembo atanu na avali.
3 #
Amo 9:1; Kut 30:1,3 Co kangelo mukwavo, uje wakele na lilonga lyakwenyekela insense, wezile nakwimana ku mutula. Vamwanene insense yaingi ngeci awezeleleko ku malombelo a vanu va Njambi voshe nakuwalambula a mutula wa ngolinde uje unemana kulutwe lwa litanda. 4Co vwisi vwa insense yakwenyeka vwakakumukilile mwilu amo na malombelo a vanu va Njambi kutunda mu mavoko a uje kangelo wemanene ku mesho a Njambi. 5#VaLe 16:12; Ezek 10:2; Kut 19:16; Kuj 11:19; 16:18 Asinoni kangelo wanonele lilonga lyakwenyekela insense, walishulile na tuhya twakutunda ku mutula, co walyumbilile asi. Co kwakele mikalateto na cililimo cakama na milangi ya mihyato na mandunduma akama.
Malupembo
6Asinoni vaje tungelo vatanu na vavali vakele na malupembo atanu na avali valivwaeselele cimweja ngeci vaimbe.
7 #
Kut 9:23-25; Ezek 38:22 Kangelo wakulivanga wembile lupembo lwendi, co kwanyokele nyonzi ya mamanya na tuhya, vyakukumbasana na maninga vyetikilile asi, co litambelo lyamucitatu lya asi lyenyele njwa na litambelo lyamucitatu lya mwila woshe wakuzivuluka lyenyele njwa.
8Asinoni kangelo wamucivali wembile lupembo lwendi. Cuma cimo cakulifwa ngwe munkinda wakama ulinakwenya vacumbilile mu mema a kalunga. Co litambelo lyamucitatu lya mema a kalunga lyemukile maninga, 9co litambelo lyamucitatu lya vikashama vakuyoya mu mema a kalunga lyatsile, na litambelo lyamucitatu lya mato lyanyongele.
10 #
Isa 14:12
Asinoni kangelo wamucitatu wembile lupembo lwendi. Co ngongonosi yakama, yakele nakwenya ngwe mutetango, yawile kutunda kwilu nakuwila a litambelo lyamucitatu lya vindonga na a masima a tuvwelu-vwelu. 11#Njele 9:15 (Lizina lya ije ngongonosi likelyo “Mwaze”.) Co litambelo lyamucitatu lya mema lyemukile kupwa mwaze, co vanu vavangi vatsile mukunwa ku mema aje, omwo akewo atengulukile kupwa mwaze.
12 #
Isa 13:10; Ezek 32:7; Njwe 2:10,31; 3:15 Asinoni kangelo wamuciwana wembile lupembo lwendi. Co litambelo lyamucitatu lya litangwa valipupile na litambelo lyamucitatu lya ngonde na litambelo lyamucitatu lya vingongonosi, ngeci ceke cavyo cizimbalese litambelo lyamucitatu lyakuvyazima kwaco, co kukwakele ceke a simbu ya litambelo lyamucitatu lya mutanya na litambelo lyamucitatu lya vutsiki.
13Asinoni njakengele, co njazivile ngonga uje wakele nakupulula kwilu a mukambwila wendekele na lijwi lyakama ngwendi, “Kekange kayando! Kayando! Kayando kakama kuli vaje vakala ano asi, omwo vililimo vije vinasalako vya malupembo a vaje tungelo vatatu vikaluma!”
The Bible in Mbunda ©The Bible Society of Zambia, 2006