Kujombolola 7
7
Vanu va Njambi vakupwa 144,000
1 #
Njele 49:36; Ndan 7:2; Zak 6:5 Munima yevi njamwene tungelo vawana vemanene ku vimbango viwana vya ano asi, vemikile lihunzi mu vimbango viwana ngeci kesi lihuwe asi, nambe a mema a kalunga, nambe ku muti woshe-iwoshe. 2Co njamwene kangelo mukwavo atundilila mu ngangela na kasateso ka Njambi wakuyoya. Watambekele na lijwi lyakama kuli vaje tungelo vawana vaje Njambi waanene nzili yakuviisa asi na mema a kalunga. 3#Ezek 9:4,6 Co kangelo wendekele ngwendi, “Kesi uviise asi, nambe mema a kalunga, nambe miti, noo tunaka cizivukiso ca kasateso ka Njambi yetu a maholo a vangamba vendi.” 4Co vanjilekele ngeci vungi vwa vaje vavaakele cizivukiso ca kasateso ka Njambi a maholo avo vapwile 144,000. Vatundile ku miyati likumi na ivali ya vanu va Isalele. 5Co mu naanga ya Yunda vaje vavaakele cizivukiso vapwile 12,000. Co mu naanga ya Luvena vaje vavaakele cizivukiso vapwile 12,000, co mu naanga ya Ngande vaje vavaakele cizivukiso vapwile 12,000, 6co mu naanga ya Ashele vaje vavaakele cizivukiso vapwile 12,000, co mu naanga ya Nafetali vaje vavaakele cizivukiso vapwile 12,000, co mu naanga ya Manase vaje vavaakele cizivukiso vapwile 12,000, 7co mu naanga ya Simyoni vaje vavaakele cizivukiso vapwile 12,000, co mu naanga ya Levi vaje vavaakele cizivukiso vapwile 12,000, co mu naanga ya Isakale vaje vavaakele cizivukiso vapwile 12,000, 8co mu naanga ya Zembuloni vaje vavaakele cizivukiso vapwile 12,000, co mu naanga ya Yosefa vaje vavaakele cizivukiso vapwile 12,000, co mu naanga ya Mbenjemani vaje vavaakele cizivukiso vapwile 12,000.
Mbunga yakama
9Munima yevi njakengele, co njamwene mbunga yakama, naumo wai wasele kulava vanu voshe vaje! Vatundile ku miyati yoshe na ku mafuti oshe na ku vanu voshe na ku vindaka vyoshe, co vemanene kulutwe lwa litanda na kulutwe lwa Muna Manga, vazalele vuzalo vwakutoka, co vakwatele minango ya mashakavale mu mavoko avo. 10Vatambekele na majwi akama ngwavo, “Kwamena kwatunda kuli Njambi yetu, uje natumbama a litanda, na kuli Muna Manga!” 11Co tungelo voshe vemanene kuzengeleka litanda na vakulunu na vaje vikashama vawana vakuyoya. Co valyumbilile asi kulutwe lya litanda na vihanga vyavo vyakwatele mu livulu, co valemesele Njambi, 12vendekele ngwavo, “Ewa! Kushangazala na vumpau na mana nakukandelela na kasingimiko na nzili na vukama vyapwa vya Njambi yetu ku myaka yoshe! Ewa!”
13Co umo wa vaje vakulunu wanjihwile ngwendi, “Veya ava vanu vanazala vuzalo vwakutoka, co vanatundu kuli?” 14#Ndan 12:1; Mat 24:21; Mak 13:19 Co njakumbulwile ngwange, “Mwane, yange kunjizivuka, yove uzivuka.”
Co wendekele kuli yange ngwendi, “Ava vakevo vanu vanatundu mu n̄avava yakama kujeneka vushonde. Co vanakushu vuzalo vwavo nakuvutokesa too mu maninga a Muna Manga. 15Mukemwo vanemana kulutwe lwa litanda lya Njambi nakumupangela mutanya na vutsiki mu Njuvo yendi. Co uje natumbama a litanda akavanyunga. 16#Isa 49:10 Vakevo kuvakazivi lalo njala nambe lihwila, co lalo litangwa nambe lihunzi lya ntwima kulikavenyeka embwe, 17#Mya 23:1; Ezek 34:23; Mya 23:2; Isa 49:10; 25:8 omwo Muna Manga, uje ali mukati ka litanda, akapwa kanyungi kavo, co akavatwamenena ku tuvwelu-vwelu twa mema a mwonyo. Co Njambi akasikumuna misozi yoshe ku mesho avo.”
The Bible in Mbunda ©The Bible Society of Zambia, 2006